我好鍾意玩通靈遊戲，今鑊我瀨咗嘢: 第五日

我唔敢寫太多，驚佢扎醒，我盡量簡潔。

希望你可以快啲忘記隻嘢個樣。有篇文講過，一個人會見到啲咩鬼，完全係取決於自己。睇嚟癲嘅唔只余永樂呢。

成件事開始失控。佢依家隨時會出事，我開始大壓力，好擔心，唔係次次都救到佢。好煩，我唔想救阿！但又一定要救，真係好煩 好煩 好煩。

唔知點解佢無啦啦知道咗Another World嘅嘢，係自己諗到定有人幫？ 要幫嘅唔係應該係我咩？我先係最慘果個喎？我唔知我依家咁樣work唔work，我真係乜都唔知，好討厭呢感覺，好似變返正常人咁，雖然我想，但真係難咗好多，好攰。





我今日周圍行，睇下呢個世界，放空一下，李俊豪果邊依舊進行緊，我知佢有同余永樂講。余永樂竟然記得應承過我嘅嘢，仲睇到我嘅變化，睇嚟真係幾着緊我，仲開始信我講嘅嘢，恐懼果然會令某啲嘢急速生長。

佢想講愛我。嘻。但成個人嘅氣場都好奇怪，好似隨時都會崩潰，望住我嘅眼神非常恐怖，好似姦殺犯，希望佢唔會做啲⋯⋯更癲嘅嘢。

佢搞到婆婆冇飯食不特止，仲整親，收埋咗個鈴鐺。或者係想贖罪，或者係佢由細到大都係咁畀人對待，佢對婆婆嘅一言一行真係令人好心寒，最可怕嘅係佢唔覺得有問題。婆婆冇咗佢一定會過得更好。

婆婆突然話佢就嚟去，我好心痛，佢仲話成日見到果啲嘢，唔怪得知。我真係好想繼續同婆婆買布，唱粵曲，見到佢食我煮嘅嘢個開心樣⋯⋯

一切都會好。





佢強吻我，我好想佢死，但唔可以。

我已經好盡力，究竟我仲有啲咩可以做到？

李俊豪怪怪地，開始唔太覆whatsapp。

唔知趙家寶聽到首分飛燕會諗啲咩呢？我知你聽到。

唔好再叫我家寶。





已經成屋都係。