「輕粵文小說」《新世代魔法界異聞錄》: 新秩序第二章 了解詳情

意識仲係處於混混沌沌嘅陳艾迪被部門嘅人抬走脫離左強大能量嘅辦公處之後，嚟到咗一個個人嘅辦公室。

「艾當家！呢位就係今日面試嘅適格者。」啱啱將艾迪帶入嚟嘅男人對住一個好似上司嘅人匯報，由於意識混混沌沌，所以只係聽到部份嘅內容，例如個上司講話：「我哋個部門唔係咩蛇蟲鼠蟻都可以入得嚟！」不過個男人回答到：「成套預言牌組都同我哋講佢係我哋最需要嘅人！」

個上司似乎唔信呢個男人嘅實力就自己再用塔羅牌抽幾次，之後就狠狠咁樣斥責到話：「即係依家唔相信我哋魔法部嘅實力啦！入得來嘅人基本上壽命去到百幾歲都得，但你睇吓呢條友剩低七年壽命，佢喺未來根本就唔係我哋部門嘅人！」

「艾當家！我並冇質疑嘅意思，只不過七年之後嘅未來我哋唔係出現咗預測矛盾咩，而且就咁計返，無論係舊人定係新人，全部都預測唔到七年之後發生嘅事，即使預測到壽命都無補於事，七年後應該真係存在一個劫難，關乎於成個魔法部所有人嘅未來！」個男人就住最近嘅發現同艾當家講。

勉強而家講到野嘅艾迪突然之間講起左話：「所以話我剩低七年嘅壽命？」感覺到似乎俾人聽到晒所有嘢嘅當家連忙講返句：「依件事唔該請你絕對保密！或者咁樣講由而家開始所有你喺度聽到嘅嘢都請你出咗門口唔好同其他人講。」





「呢件事其實係魔法部已經傳來傳去㗎啦，講同唔講都無所謂只不過出咗部門門口就千祈唔好同外人講。」雖然個男人好似同我講緊但佢亦都好似同艾當家講緊而家嘅情況。

「呢件事絕對冇問題，只不過我想了解目前嘅工作係⋯⋯」艾迪對於服從命令呢件事已經係司空見慣，好大程度上係因為屋企裏面嘅教育模式。

艾當家嘅枱上暫時仲有一張預言卡仲未翻牌，佢就問咗一句：「你確定真係可以補守住一切嘅秘密，為香港服務？」

一講到為香港服務，艾迪雖然仲未知道而家嘅香港即將會面臨咩嘢嘅危機，但佢天生就擁有守護一切嘅心，無論係身邊嘅人定係大自然嘅一切眾生。佢睇到太多人嘅死去，但自己就無能為力，如今似乎有一個方法擺咗喺佢面前，佢義不容辭咁樣講咗句話：「我確定！」

「好啊⋯⋯我哋英屬香港魔法部嘅職責係維護作為英國土地既香港同香港人嘅未來命運！」艾當家就咁樣好似解釋咗但又好似冇解釋到咁樣介紹左，男人又有詳細咁樣介紹左話：「魔法係一種利用大自然能量驅動未來或製造現在效果嘅儀式，同普遍人認識嘅風水差唔多，但我哋會偏向用西方嘅方法嚟守護未來命運。目前有白魔法同黑⋯⋯」





「馬生，你唔需要講咁多啦，接住落嚟嗰啲嘢你再慢慢喺學堂同佢逐一介紹。」艾當家同嗰位姓馬嘅男人講，隨後就叫佢哋兩位可以返返去自己嘅工作單位。

「咁我哋打攪晒啦！」兩個人閂咗門之後，馬先生就帶咗艾迪去左地下嘅一個課室。臨入門口之前，交低左一本書比艾迪，之後就講話：「可能你會聽到有啲唔明白但睇住本書先啦！會有啲章節係跳咗，等陣搵個位坐低就得㗎啦。」一入到課室，望住已經坐低左嘅一班人，艾迪都揀咗個坐位坐。

「咁我哋開始上堂，呢位係我哋嘅新同事，陳艾迪，嚟緊三年嘅時間佢將會同我地一齊接受訓練！」喺課室裏邊馬先生咁樣講。

而係另外一邊，艾當家開咗個張牌，並且講話：「到底係咩原因令到喺我哋呢個魔法部做嘢嘅佢七年之後死呢⋯⋯」當家諗爆頭都諗唔到。