女神呢個稱號令我食左唔少仔(有甜）: 小學

自從上次見到Eric之後，我都開始留意返小學個嗰群組。

佢地計劃呢個星期六返小學，而我本身諗住睇完就算，但係Eric突然拉埋我落水。

Eric：「Emily你會唔會黎架？」

仆你個街呀真係。

On9仔：「Emily？我地都好耐無見啦喎，梗係要去啦。」



肥仔：「係囉係囉，佢係群組成日都唔出聲，我地個嗰都好掛住你呀。」

女班長：「計埋Emily就有六個人啱啱好，我地返完小學之後再一齊食Lunch啦。」

屌你咩，我都無講過野，不過都係算啦，始終都係同學一場，都會想見下佢地嘅。

要維持一段關係，比你考DSE攞五星星仲難，DSE你失左手唔合格都可以再考，但係關係一失左手，可以真係無左。

同埋咁耐無見，每個人都應該變左好多，話唔定會有驚喜，希望一去到即刻見到個嗰都靚仔哂。



如事者，我地就約左星期六係小學到，直到出門口個刻，我個心唔多唔少都有啲期待。

Eric：「咦你黎左啦？」

我：「佢地呢？」

Eric：「咪係前面囉。」佢指一指前面，見到有堆人對住我地揮手。

我望住佢地，原來時間真係可以徹徹底底咁改變一個人。



男嘅就大隻左、靚仔左、高左、女嘅就瘦左、靚女左、眼大左，有啲宜家帶左眼鏡，有啲由帶眼鏡變到唔洗帶眼鏡。

但我無諗過個變化真係咁大，由大家細細粒變到牛高馬大咁，感覺自己就好似錯過左好多野。

阿程：「等左你好耐啦Emily，無見咁耐靚女左喎。」

我：「Sorry呀，頭先塞車所以遲左，不過你地都真係變左好多喎。」

肥仔：「我減肥成功左呀，但係計我話，你先係變得最多個嗰。」

我：「我變得最多？點解咁講？」

女班長：「總感覺你好似經歷左好多野咁，成個人嘅氣場都變左，你之前無咁斯文。」

人即使變到好唔同，但係人永遠都唔會知自己變左，以為自己仲保持初心，但其實原本個嗰你，一早就已經灰飛煙滅。



我：「你都係呀，成熟左好多。」

Eric：「我地唔好企係門口啦，快啲入去啦。」

入到去，發現學校好多野都無變過，操場仲係個嗰操場，小食部仲係個嗰小食部。

彷彿我地就好似仲係個嗰，小學時嘅自己。

漢叔：「喂你地係啲咩人呀？！做咩入黎呀？！！」

Eric：「喂漢叔，你唔記得我啦？我係Eric呀，佢地都係校友黎架。」

漢叔：「哦，原來係你，仲有阿程添，你地想探老師就入去啦。」



漢叔就比我地入去，我對佢嘅印象就係無乜印象，只係一個成日坐係到睇報紙嘅阿叔。

但係見到佢啲頭髮都開始變白，所以啲人成日講歲月不饒人，你地又有無留意屋企人嘅身體都開始變差？

行到去學校嘅地下，有康樂室、音樂室、視藝室，同埋有張枱做接待，啲牆同埋枱仲係當年嘅藍色。

將枱有部電話，仲記得當初媽咪無黎接我放學，我喊到癡線咁打電話比佢。

媽咪：「Emily...你以後...要...好好...生存落去...愛惜自己...唔...唔好同媽咪一樣...」

呢次嘅通話，就係我同媽咪最後嘅對話，事後我先知佢比阿爸殺死左，因為媽咪話佢想離婚。

見到部電話令我諗起個嗰畫面，我一直叫佢，但係佢一粒聲都唔出，最遙遠嘅距離，就係你把電話放在耳邊，但人卻經已升天。

阿程：「你無野呀嘛？」



我：「我無事呀，我地繼續行啦。」我好辛苦咁忍住啲眼淚，扮到無事咁。

當佢地入左去康樂室諗住打乒乓波嘅時候，突然有把男聲係我地後面出現。

鍾sir：「咦？你地黎左呀？做咩唔黎搵我，係到打波呀？」

我聽到之後即刻瞪大隻眼望住佢，佢都好驚訝咁望住我。

我：「係你...？」

一個好嘅老師會教你做人嘅人生道理，一個壞嘅老師，會教你點做人，雙重意思，明嘅就明。