打機射喪屍係會報應㗎…(改咗名): 不如寫本《變異體圖鑑》

我哋行入IKEA入面，我去咗美食站。去睇睇會唔會有啲嘢食。不過…應該冇。
我仔細揾咗幾次，真係完全冇，唉！好彩有啲肉，應該夠食幾日。
走入內部，有好多嘢都被人帶走咗。不過好彩，仲有幾張床同梳化可以瞓。
「終於有床瞓喇！」我直接瞓喺床上面，真係好攰呀！
「張床好舒服呀…」啊康都係一樣， 揀左另張床就瞓咗去，乜都唔理，好似成世人都冇瞓過床咁。(呃…佢又好似真係理由冇瞓過床喎！)
就係咁，我哋就瞓到半夜三更。一起身，發現一件不得了嘅嘢！
我另一隻手嘅一隻手指都生咗爪，而且兩隻指爪仲可以伸縮。我全身都感覺好精神。
「哇！庭哥你多咗隻爪喎！咦？我對眼……」啊康眼眶入面嘅复眼變成咗人類嘅雙眼！
「我哋…又變異咗多次？」我猜測
「 應該就係喇。」啊康回應「庭哥，嘜你平時睇係咁清晰㗎！好厲害呀！」佢不停四處張望，似乎好鍾意呢種感覺。




咦？如果咁嘅話， 我咪可以十隻手指都生曬爪囉！仲可以伸縮，好方便喎！
突然，我發現地上有個背囊，入面有一啲乾糧、一枝筆同一本簿。
「係咩嚟㗎？」啊康問。
我揭開本簿，入面第一頁寫住:「這本簿係紀錄低變異體嘅種類，同佢哋嘅特性。如果你執到，我可能已經有不測。希望可以幫到你。」不過，後面乜都冇寫過，本簿嘅主人應該已經遇到不測。
「啊康，我有個諗法。」我講。
「咩諗法？」啊康問。
「我哋不如繼續寫落去，幫各類變異體改名、記錄特徵同埋畫埋個樣。」我答。
「畫？」啊康問「你識畫畫㗎咩？」
「識！而且擅長速寫同寫生，仲幾痴迷吓㗎。所以以前我班friend叫我「寫生狂」。」
我揭開下一頁，憑記憶畫咗無眼怪物個樣出嚟。




「哇！好逼真喎！」啊康話。
然後…改咩名呢？無理由真係叫無眼怪物㗎…
我靈機一觸:「不如，叫「盲聶人」呀！」
「聶」字可以講出佢聽覺靈敏，仲可以用諧音暗示佢係一個獵手。
我哋一直傾，去到朝早先完成曬所有變異體。