打機射喪屍係會報應㗎…(改咗名): 呃…隔夜孔雀肉食唔食得㗎？

孔雀怪快速撲向我哋。啊康雙手捉住孔雀怪條頸，然後雙腳同一隻爪踩實佢嗰幾隻腳。 並且準備用另外一隻爪去斬首！
「嘎嘎嘎嘎！！」孔雀怪用觸鬚尾扯開啊康，然後迅速攻向佢！
我及時捉住孔雀怪嘅四條觸鬚，然後用利爪切斷。正當我想繼續切斷其他觸鬚嘅時候，孔雀怪亦都向我揮動佢嘅鳥爪。
與此同時，啊康捉住咗孔雀怪嘅雙爪。我立即斬向孔雀怪條頸，令佢立即一命嗚呼。
「我哋搞掂咗佢啦，呃…」啊康似乎想叫我個名，不過發現根本唔知我個名「你叫咩名？」
「我叫林梓庭，末日前我班朋友叫我「寫生狂」，不過你鐘意點叫就點叫喇。」我答返佢
「咁…庭哥，呢隻雀我吔係唔係依家處理咗佢？」
「我叫你隨便稱呼，你使唔使咁叫我呀？」
「咁你冇殺死我，又分過食物俾我，我好應該尊重你呀！」
「唉！算啦！你啱啱話隻雀點話？」




「 我哋應該要醃咗佢，超市應該可以揾到粗鹽嚟醃製」
「咁依家快啲去喇，如果唔係隻雀就爛㗎喇！」
我同啊康走咗幾條街，終於揾到一間惠康。
不過入面啲貨架大部份都被人推冧咗，貨品就重有一啲，唔似其他地方咁完全冇曬。
奇就奇在，有啲貨架同食物都有啃咬嘅痕跡。直到見到地上嘅血漬我先知道我瀨咗嘢！
「喂！庭哥！揾到啦！」啊康向我大嗌，仲抱住3~4包鹽。
「吱吱吱吱吱吱吱吱！吱吱吱吱吱吱吱吱！」
「大鑊…」
三隻野獸對住我哋尖叫。嗰啲野獸嘅頭部、皮毛、尾巴有啲似老鼠，不過身體好似一隻廋俏嘅獅子，四肢修長，面容極其兇殘。
「庭哥，我哋好似瀨咗嘢喎…」




我再望向嗰灘血漬，發現啲更恐怖嘅嘢！