那些年，我等待的那個男孩子: 27

係我F.4果一年，出現左個好強勢嘅F.1女同學。係女校之中，總係有八掛是非，又有人爭做大家姐咁，呢位小師妹真係咩人都唔驚，佢視大師姐為無物，佢連風紀組都唔驚，上堂瞓覺、但出奇地佢成績超好，有時學校見到學生成績好，就會當冇事發生，咁嘅情況真係唔好，所以有風紀帶左果位小妹妹去見Miss孔，正當大家以為佢會俾獅哮功震到飛落山之時，佢竟然可以係訓導處、恐怖雞嘅領土中無穿無爛咁行出黎，呢個真係我地學校近年來嘅奇蹟之一
 
果位妹妹，就係開學時我幫佢扎辮果位，而我只都知佢叫咩英文名，佢係F.1A班Jasmine
 
老老實實，佢真係生得好靚女，笑容好甜好有氣質，佢合埋眼微笑果時係好吸引人，如果佢係男女校讀書嘅話，一定好多人追，好唔明點解佢會揀左我地間女校黎讀，唔通佢又係貪呢到入U率好同出名?點都唔會有人因為想做尼姑修女而黎讀書掛。
 
今日放學後係球場，我終於見到佢挑戰一班師姐啦，係籃球場上，Jasmine槓上左B grade籃球校隊
 
因為基本上冇任何同學會著長衫校服打波，就連校隊都會著返體育衫練波，因為件長衫太太太麻煩啦!!果日Jasmine正正自己係到著長衫打波
 




一班校隊師姐見到之後，就去”訓示”佢，因為如果俾恐怖雞見到，自己身為大師姐，身邊有小師妹做錯而唔去糾正佢嘅話，係會俾佢用連坐法罰架，所以點解我永遠唔會係操場出現就係咁解
 
「嘩…咩事呀?果個F.1妹妹挑戰F.3同F.4嘅 B grade 籃球隊?」Ivana拎住一袋薯片邊食邊睇，我亦都順手去拎幾塊黎食
 
「我輸賭20蚊，個小妹妹贏校隊」
 
Ivana聽到我咁講「殺妳」
 
Jasmine今次槓上嘅係b grade籃球隊嘅TB隊長。TB隊長佢有好多fans架，非常受歡迎。
 




今次Jasmine挑戰嘅又係射key，而且TB隊長仲好輕敵咁讓佢。當我聽到話用單手讓Jasmine果時，就知道，佢太輕敵啦。Jasmine妹妹佢簡單熱左身之後就開始射波，佢入到第三球時，籃球隊同學都開始擔心，因為Jasmine佢真係百發百中，比Ivana更犀利。射到最後嘅3分波，Jasmine都冇失手。同時佢令好多同學另眼相看，體育老師即場邀請Jasmine加入籃球隊，不過佢拒絕左
 
佢仲邊用一隻手指轉波邊對住對方微笑，講左句”承讓承讓”之後，再拋返個波俾人。佢咁樣做法，可能會令自己係學校中樹敵，希望佢會明白啦
 
「喂，20蚊呀」我伸出隻手向Ivana收錢
 
「估唔到校隊都會輸喎」
 
「佢地自己輕敵者」
 




「可能呢個妹妹遲d會引起好多風風雨雨啦」
 
「妳點解咁講呀?」
 
「頭先恐怖雞已經係樓上望實成個過程，塊面仲要係好黑」