那些年，我等待的那個男孩子: 5

「起立….」
 
「唔洗…大家坐低!!!」
 
校長好快衝去阿風身邊，再帶佢出課室。我係窗口望出去，校長陪佢上左部的士。
 
「嘩…咩事呢?好似好急咁喎」
 
數學堂落堂果時，老師幫阿風執好書包。我地班主任將阿風個書包交俾兩個同佢家姐同校嘅大姐姐，佢地雙眼都係通紅，然後我就見到我地兩位班主任連同兩個大姐姐一齊搭的士離開。
 


當日嘅班主任課，由隔離班嘅副班主任代為上堂，因為係星期五關係，大家都好希望可以快d放學返屋企休息
 
到左星期一，阿風冇返學，冇人問過佢點解缺席。大約兩星期後我係放學果時，去教員室拎功課俾老師之時，發現上次私家車上邊一個姨姨係到，佢散發出好強嘅氣，另外有兩個同怡姐姐同校嘅姐姐係到
 
「星期五晚，希望兩位班主任同校長可以早少少到，送我地嘅朋友最後一程」好強氣勢嘅姨姨對住我地班主任講
 
「冇問題Miss孔，在公在私，我地都會陪住程先生行完最後嘅道路」
 
「麻煩哂兩位啦，聖嘉勒妳地呢?有幾多人會陪逸怡逸風?」
 


「陪住阿風?」我係到邊聽邊諗
 
「Miss孔，我地校長同班主任會出席，另外我地全班同學都會去陪佢地兩姊弟，始終…程叔叔好錫我地班…」
 
「麻煩哂妳地」
 
「Miss孔…咁佢地三母子而家…」
 
Miss孔背住佢地講「我地英華女校出黎嘅人，唔會咁易就會被失敗打低，Sally非常堅強，佢要樹立榜樣俾對仔女睇，Tony果時都好堅強咁作戰，雖然佢輸左，但佢係作戰到最後一刻」
 


但係佢講呢番說話時眼有淚光，佢亦發現我嘅存在
 
「同學!!!妳係到做咩野?係咪偷聽!!」呢位Miss孔嘅氣場將我完全鎖死
 
「我…我…」一時間我俾佢嚇親，我將功課同升中資料跌左落地下
 
「吼………」Miss孔就好似一隻獅子盯住佢嘅獵物咁望實我
 
「雪凝?妳黎教員室咩事?」Miss Lau終於發現我
 
「我…我黎放低功課…..」此時我已經嚇到想喊，同時Miss孔已經見到我本升中學嘅資料，佢執起黎睇，資料中，我Mark低左英華女校為我第一志願，第二係聖嘉勒
 
Miss孔睇一睇我本升中資料「同學，妳叫咩名」
 
「我…我叫林雪凝，係程逸風同班同學」


 
「妳想入我地英華女校係唔係」
 
「係……」
 
「咁妳認實我!我就係英華女校嘅訓導主任!」
 
「係…係!」
 
「妳聽到d咩?」
 
「我聽到…大家會去送一個叔叔最後一程」
 
Miss孔望一望Miss Lau
 


「雪凝跟我黎丫」
 
「係…」
 
我跟住Miss Lau行埋一邊
 
「雪凝…唔…點同妳講呢…我知妳成日同程逸風鬧交，佢又成日整估妳…不過我希望…」
 
「Miss Lau…我應該知咩事…果兩個聖嘉勒女書院嘅大姐姐…係逸怡姐姐嘅同學，我認得套校服，阿風屋企…應該係有…白事?」
 
「嗯……我希望妳可以保守呢個秘密，最近逸風已經冇返學，妳可以幫到我守呢個秘密嘛?」
 
「可以!!」
 
「乖啦，頭先果個係英華女校嘅老師，至於點解佢係到呢，妳就唔好問咁多啦」


 
「知道」
 
阿風….爸爸過左身，我需要點做呢…可能我可以做嘅，就只係陪係佢身邊。到左星期一，佢終於都返學，係左邊心口上，有條小小嘅黑紗。