賤男 – 成魔之路 【甜酸苦】: 分手
22:30
我攞著件西裝褸由昏暗既28樓，自己搭Lift落到大堂
行去停車場攞返我架，海豚灰嘅開篷寶馬Z4 (3,000 cc, 2007)
準備開車之際電話就震 …
係女朋友呀怡打嚟
「你響邊呀？！做咩唔聽電話，又唔覆message？」 呀怡好重語氣地問
「OT完，老細啱啱先放人 ⸰」
「咁又話你聽日出Trip之前可以見？！ 而家仲見唔見呀？」
「我好攰，要返屋企執野喇，飯都未食 ⸰」
「我已經喺你屋企留下喇 ⸰」
「咁你幫我去買個板燒雞包，唔要薯條，轉頭見 ⸰」
我個人好撚需要私人空間，所以十幾年前喺英國畢業返香港
未考到個藥劑師牌，已經自己租樓住
我唔鍾意有人隨便上去我屋企，包括女友
由公司返屋企行東隧過九龍，一般要20分鐘
夜晚冇咩車，加上架Z4唔會好似Emma咁 Lup Lup 糯糯
我10分鐘就返到
「下次你唔好自己上黎啦，費事你又要喺出面等我 ⸰」
「嗱，你個包 ⸰」
「唔該 ⸰」
呀怡眼泛淚光咁坐我飯枱對面
「做乜呀？」 我不耐煩咁問，因為我好撚憎人喊苦喊忽，尤其食飯嘅時候
「你仲愛唔愛我？」呀怡問
「又點啊？！」 我真係好唔耐煩，好討厭呢D無意義嘅問題，所以用左D好仆街嘅語氣
「我地分手啦 ⸰」呀怡起身急急腳咁走去門口
當刻我無理會，望都無望，亦唔想回應
好專心食緊個板雞包，直到呀怡自己走出咗門口
我就開始諗，同佢拍拖呢兩年，我係咪對佢咁差
我又諗，點解佢同我分手我會無好傷心呢 …
無辦法，聽朝早機要執野早D瞓