《我用廣東話征服世界》第一季 已完結: 第六十一篇 養妻活兒

「叮噹！」鳩去到童童屋企門口按鐘，內心緊張到不得了。
鳩企咗一段時間都無人開門，就再㩒多次鐘。
今次終於有人嚟開門，係童童。
鳩見到童童即刻攬住佢唔放：「對唔住啊，可唔可以同我一齊返啊！」
童童一打門就無端端俾人攬到實嚇親，然後陷入沉思。
鳩認真咁講：「我真係好愛你架，俾多次機會我啦。」
童童閉合雙眼思考緊啲嘢，不過唔知諗緊乜嘢。
鳩接著講：「我地一齊生個小朋友出嚟啦⋯⋯」
童童愕然一下然後說：「原來你知啦⋯⋯⋯⋯」
鳩：「嗯！我會照顧好你地架⋯」


童童會心一笑，但冷冷地問：「點照顧啊⋯？」
鳩其實仲懵盛盛，咩都未諗過：「我以後會努力搵錢養你地架⋯」
童童聽到佢咁講又陷入沉思當中，然後說：「你要走啦。」
鳩唔知點解，但死都唔想走：「我唔會走架⋯⋯求下你俾我照顧你一世啦。」
童童拍一拍鳩，說：「唔關事⋯⋯你快啲走啦⋯⋯」
鳩死纏爛打攬住不放童童：「點解喎！」
童童嘆一口氣說：「因為我啊媽就返嚟啦。」
鳩愕然：「咁點解我要走啊⋯？」
童童見到鳩一臉傻氣，忍唔笑咗一下：「真係唔走？」
鳩堅持到底：「死都唔走！！！」


突然背後傳來一陣強烈嘅殺氣：「死⋯打⋯靶⋯仔⋯！！！就係你搞大我囡女個肚啊嘛⋯⋯！？」
鳩感覺毛骨悚然當場嚇到背脊都濕埋：「冷⋯冷⋯冷靜啲先⋯伯母⋯⋯」
「冷你老母！！！」
「砰！」童媽一拳就哼落鳩個頭，鳩㩒住個頭感覺有少少暈。
「同我入去講清楚！」童童啊媽拉住鳩個頭怒氣匆匆咁行入屋。
鳩感覺童童啊媽其實唔係有心用好大力拉佢，可能有少少手下留情。
童童啊媽一嘢丟咗鳩落沙發，然後就行咗入房攞啲嘢。
而童童就坐係鳩隔離等候老母大人發落。鳩同童童坐咗係沙發上面，微風吹拂風鈴傳出微弱嘅聲音「⋯⋯⋯鈴⋯⋯⋯」
俾人一種放鬆清靜嘅感覺，但鳩緊張得全身繃緊硬直，害怕得放鬆不下來。
童童見到鳩咁緊張嘅樣，便摸一摸肚皮笑了。


過咗陣童童啊媽都仲未出嚟，鳩個心越嚟越不安。
鳩慌失失咁問：「童童⋯⋯點解媽咪咁耐都未出嚟嘅⋯⋯」
童童故意捉弄一下鳩：「可能搵緊刀掛⋯⋯」其實童童都唔知點解啊媽咁耐都唔出嚟。
鳩嚇壞了：「刀⋯！？做咩搵刀啊⋯⋯？」
童童心裏偷笑依個傻瓜：「你話呢⋯？」
鳩驚到雙腳不停抖震，依個時候童媽攞住袋嘢行出嚟。

鳩見佢手上嘅唔係刀，個心安定咗好多。
但係童媽對眼有啲紅腫，似乎啱啱係房喊完無耐⋯
童童：「媽咪⋯⋯你做咩啊⋯⋯⋯⋯」
童媽瞪住鳩說：「啊女，唔好嘈。死打靶仔⋯我問你，你係咪對我個女認真嘅！？」
鳩點點頭：「我認真架，我已經當咗童童係我老婆架啦。」
童童聽到怕羞得臉紅紅，心裏頭小鹿亂撞。
童媽閉起雙眼深吸了一口氣：「既然你地都米已成炊，我都唔得講啲咩⋯」
「死打靶仔⋯以後一定要好好對我個女，知唔知啊⋯⋯」


童媽唔知道鳩有其他女人，所以咁順攤只係想童童幸福快樂。
鳩：「伯母，我一定會好好愛錫童童架！」
童媽眼淚又開始想湧出來：「嗱⋯⋯依啲係我當年嘅嫁妝⋯⋯你地結婚嘅時候用啦⋯⋯」
童童見到媽咪想喊就難過起來：「媽⋯⋯」
鳩突然進入聖人模式：「唔洗啦，我會靠自己嘅努力娶童童架啦！」
童媽抹一抹眼淚：「算你有啲骨氣⋯不過童童肚入面嘅孩子唔等得耐⋯你地都係收咗佢早日拉埋天窗啦⋯⋯」

鳩猶豫左陣，自已的確無乜錢買嫁妝⋯⋯明宴會做嘢嘅收入都唔係好多⋯⋯普通成員做一次任務得兩萬蚊，只有殺光頭嗰次鳩係有錢可賺。

「話晒自己都係第一個用到進化咗之後嘅廣東話言靈師⋯居然窮到連嫁妝都無錢買。」鳩深深感受到自己嘅無力。
童媽勸喻鳩：「收咗佢啦⋯⋯」
童童又無乜所謂就接起嫁妝，鳩點一點頭：「多謝你⋯⋯」
童童啊媽放心起來，說：「咁啊女你以後就住係打靶仔屋企啦⋯得閒返嚟屋企食飯啦⋯⋯」
童童愕然：「點解啊媽咪⋯？」
童媽嘆氣說：「你地都就快係兩公婆⋯緊係趁BB未出世之前享受下二人世界啦⋯⋯」


童童臉紅耳赤細聲說：「嗯⋯」
鳩都有少少感動：「嗯！我一定會錫晒童童。」
童童情深意重地對鳩說：「咁你以後唔準再呃我架啦⋯⋯」
鳩摸一摸童童個頭說：「知道老婆大人！」
童童笑得很甜，始終童童係只愛鳩一個人。

只不過鳩宜家又有另一件事煩惱緊，就係錢嘅問題。
睇嚟宜家只可以多啲返明宴會做任務啦⋯⋯