《我用廣東話征服世界》第一季 已完結: 第四十六篇 化敵為友?

鳩去到明宴會就周圍行嚟行去，點先知首領係邊呢。
鳩未見過嗰個首領。只知道佢係個四十幾嘅男人。
「喂！你係到做乜啊？」又係嗰個四眼仔。
鳩無奈咁講：「點啊你，又想搵人打我啊？」
四眼仔：「一人打一次當打和，得唔得先？」
鳩皺起眉頭：「乜依個四眼仔都講道理嘅咩⋯⋯」
四眼仔：「見到你就岩啦，我有嘢要問你！」
鳩：「講。」
四眼仔：「聽講你係最後見過林海欣嘅人，你知唔知佢係邊？」
鳩暗地一笑，原來佢有求於人，所以態度180度轉變。


鳩笑著：「我的確有啲線索嘅，宜家就去同首領講，你知唔知首領係邊啊？」
四眼仔焦急講：「千祈唔好同我老豆講！！！」
鳩試探下佢：「點解啊？」
四眼仔：「如果你淨係同我講，我就以後唔煩住禮行。好唔好？」
鳩反咗下白眼，果然係人渣。
鳩：「你唔想俾首領知林海欣係邊？點解？」
四眼仔口震震咁講：「關你鬼事咩⋯⋯總之你話我知佢係邊啦⋯⋯」
鳩：「你鍾意佢？」
四眼仔托一托眼鏡：「係⋯係又點啊⋯⋯」
鳩笑到停唔到，好似成功報咗仇咁。因為佢心愛嘅人女朋友俾我溝咗。


四眼仔：「笑咩啊你⋯」
鳩：「無嘢⋯」

四眼仔又話：「嗱！最多我俾錢你，你要幾多？」
鳩心諗佢係咪低能架⋯⋯
鳩：「你知佢係邊有咩用？首領都係會追殺佢架喎⋯⋯」
四眼仔：「咁我會勸佢返嚟明宴會架嘛⋯」
鳩：「咁佢唔返嚟呢？」
四眼仔：「咁⋯⋯⋯咁⋯⋯」佢諗咗陣一句說話都講唔出。鳩突然靈機一觸：「你⋯⋯知唔知首領派左邊個殺林海欣？」
四眼仔：「唔知⋯⋯佢地唔肯同我講。」


鳩：「咁⋯⋯如果你查到邊個係殺手⋯我就肯幫你。」
四眼仔高興起來：「真係架！？」
鳩：「嗯。」
四眼仔冷靜下來懷疑地說：「不過你點解幫我先⋯⋯」
鳩：「有條件嘅，條件就係你唔好再煩住禮行～」
四眼仔：「得得得！一定唔再煩住佢！」
鳩：「咁你宜家去查啦⋯⋯我去搵禮行先。」
四眼仔：「嗯！」
依個時侯四眼仔雖然唔知鳩嘅計劃，不過宜家只能夠信佢。

四眼仔偷偷去到首領間房，佢企係房門猶豫左陣。
為咗海欣一定要咁做啦！
「叩叩叩！」
「爸B～你係咪到啊？」
無人回應。


「爸B好似唔係到喎⋯⋯」
四眼仔慢慢拉開房門，房間裏漆黑一片，完全無人嘅氣色。

四眼仔偷偷入咗去，然後鎖上房門，
攞出一早準備好嘅手電筒。
「有無人啊⋯⋯」四眼仔驚青咁問多次。
如果俾爸B發現嘅話，救海欣嘅事就可能會暴露。
佢知道首領會將任務嘅資料收埋櫃桶裏面。
所以就拎支鐵勾用力撬開佢，
「3，2，1！」

突然背脊感覺一陣寒風。
「你係到做咩啊？」
四眼仔嚇到眼鏡都跌埋。首領突然係佢背後，應該係用英文言靈。
「想搵我啲資料啊？」首領一臉嚴肅咁講。


「係⋯係又點啊？」四眼仔成把聲震晒。
首領：「你依家偷我嘢好熟手啦！衰仔⋯講！你入嚟想偷咩？」

四眼仔托一托眼鏡：「你到底搵咗邊個殺林海欣！」
首領冷笑一聲：「嘻！原來你仲未死心啊！」
四眼仔拎住支鐵勾指住首領：「快啲講！」
首領：「你都係算啦，就算你知你都救佢唔到。」
四眼仔知道爸B受軟唔受硬，突然跪係地喊出嚟。
四眼仔：「嗚～嗚～～爸B我求下你，最少都比我知係邊個殺死佢啦⋯⋯嗚嗚嗚⋯」
首領見狀立即心軟起來：「唉～我派左茂波啊⋯⋯你唔好再喊啦⋯⋯」
四眼仔好似得米咁，嘴角上揚。「原來係佢個老嘢⋯⋯」
首領：「咁你宜家肯出返去啦～」
四眼仔好奇追問：「但係佢唔係保管財政嘅咩？」
首領解釋：「佢管財政只係掩飾佢殺手嘅身份，佢係一個出色嘅殺手⋯殺人如麻。」
四眼仔嚇左一跳。咁海欣咪死梗⋯⋯


四眼仔抹乾眼淚就急急離開。