《波唔是咁踢的》: 3

我落埋場，場波就開始啦。兩邊各11人，由小五對小六，其實都幾唔公平㗎，不過都明教練想做咩㗎啦。

教練明顯係想睇吓我哋兩邊實力差幾遠，然後再調整下出賽隊伍，勁嘅就擺上去，其他就放入後備席，年年都係咁所以見怪不怪。

話咁快粒波已經傳咗係我腳下，我即刻插咗兩下花，扭過左過嚟搶波嘅敵方中場。

然後向前傳比打左翼嘅輝少。

輝少諗都唔使諗，直接爆氣沖左落底線，然後傳咗個彈地波俾我。





睇準時機，輕輕一射就入網。

輝少係我足球隊入面嘅忠實拍檔,佢身高接近180cm，算係我哋對波入面最高嗰個，佢對腳勁長，跑一步等於其他人跑兩步，所以成日都跑到落底線再餵波比我，令我年中都入唔少波。
 
至於點解佢叫輝少呢⋯⋯？

原因好簡單，因為佢實在太有錢，成日踢完波都請我食嘢，有個咁嘅朋友真係冇得彈，咁我無以為報，唯有叫佢做輝少囉。

「傳得靚啊，輝少。」





「客氣野就唔使講啦，不嬲都勁開嘅。」
「一陣唔好衰呀，把口咁串！」

「得啦！有我在，你放心。」

「嗶！」

輪到對面發起攻勢，幾次傳波之後，粒波送到入我方禁區，喺對面起腳嗰下，明仔一個攔截，成功將敵方前鋒嘅波搶返過嚟。

然後就一下大腳解圍，咁啱就比我追到喎。





咁我當然唔執輸啦，突然雲佩斯上身，波都冇控就直接踢埋去對面個龍門度。

咁當然，諗都唔使諗，我射咗個飛機，粒波飛到九里咁遠。

「哎呀！射衰咗添。」

「大佬，你係咪玩嘢啊！」

「我傳到咁靚，你都可以射飛機！」

「隔離冇晒人，俾咗個機會你單刀，好心你就控好個波再射啦！喺度懶型！」

「 sorry囉，大佬！下次唔會。」





「好彩今次係熱身賽咋，如果唔係睇吓我打唔打死你。」

「大佬使唔使咁惡呀」我心裏面諗。

跟著我就執番粒波，繼續比賽。

對方龍門開咗個高波，一下就傳送到我方禁區。

左翼係禁區控好波之後，傳咗球curvy波，完美咁避開咗明仔，傳到中鋒腳下。

然後中鋒再利用佢善場嘅身體對抗，阻止咗我方另一個中堅搶番個波。

睇準時機就大力咁傳俾冇人看守嘅右翼，佢調好角度，輕輕一踢，粒波就直接射咗入死角。

「嗶！嗶！1比1。」教練吹咗兩下哨子，然後大聲咁嗌。





「嗶！」比賽繼續。

其後我方組織咗多次攻勢，可惜都係未能夠攻入敵方禁區。

終於，等到一次機會。

「輝少！傳個波上黎比我。」

輝少一個直線，傳左球波俾我。我插咗兩下花，再將波向後傳。

後上嘅強仔好靈巧咁接住個波，先係向禁區跑咗兩步，等到距離合適再瞄準龍門死角。

然後就眼都唔眨，一嘢ban埋去。





最後龍門撲唔到啦，粒波射咗入網，比數變成2比1。

「嗶！」陳sir吹哨示意完場。