［愛情純愛］由嗰一個Kiss開始，我地唔再係青梅竹馬: 141. 不自在

「嗰間有咩挽？」梁玥嘉對party room似乎都幾感興趣

「呃，睇睇下等我⋯」張子萊拎出手機check，「有⋯麻雀、可以唱K、PS4、Switch，包飲品，仲有啲board game之類。」

「都幾好喎～」李穎容第一時間就和議張子萊嘅提議，然後沿住卡位嘅梳化移到去張子萊身旁，「我要睇我要睇！」

張子萊直接將手機遞咗比李穎容，李穎容坐喺張子萊身旁睇party room嘅環境相，兩人湊在一起睇相，都冇留意到坐喺佢地對面嘅宋千辰同霍思傑望住佢地

「你兩個最近關係咁好嘅？」霍思傑忍唔住先開口問道，嘴角藏唔住笑意，「成日都一齊咁你兩個。」



「係囉，最近你兩個真係好奇怪～」平日少講八掛嘢嘅宋千辰都忍唔住佢嘅好奇心問道

「有咩奇怪⋯」張子萊抬頭望一望霍思傑，然後又無奈地望向宋千辰

「你地宜家已經好奇怪！」霍思傑望住兩人不禁笑道

「其實張櫈好闊嘅，你兩個唔洗坐得咁逼嘅～」宋千辰同霍思傑對望咗一眼之後都不禁笑出嚟

張子萊同李穎容對望咗一眼，兩人都同時耷低頭望，望下兩人之間嘅空隙有幾多；兩個人尷尷尬尬咁各自坐開咗小小



「呀！」「呀嘶⋯」

李穎容抬起頭嘅時候，後腦勺一下子撞落張子萊嘅額角

「你撞到我呀⋯」張子萊望住李穎容，「想謀殺呀？」

「你、咁、脆、弱、㗎、咩？」李穎容直盯着張子萊，手用力地掐張子萊嘅手臂

「嘶⋯」張子萊用力地吸一口氣，下意識就捉住李穎容嘅手，「痛、痛、痛、痛⋯！」



就喺張子萊嘅手輕輕地捉住李穎容嘅手時，李穎容頓時鬆開手，一下子坐番去楊楠恩隔離，臉頰泛起淡淡嘅紅霞

「哦～佢兩個有啲嘢喎睇嚟～」梁玥嘉心裏偷笑道

「咁我地係唔係去party room呀？」楊楠恩問道

「你地覺得呢？你地Okay？」李穎容問道

大家都冇咩異議，一分鐘都唔洗就一致贊成

「你地想幾時？佢後日、星期六都未有人book。」張子萊望一望網頁嘅預約月曆，後日同星期六仲係代表「未有預約」嘅綠色格

「後日囉～」霍思傑講道，「挽嘅嘢梗係愈早愈好～」

「咁挽到幾點？」張子萊又問道，即場book，「點半到？」



「挽到夜晚10半？」李穎容提議道

李穎容望一望其他人，其他人都冇反對，張子萊就直接完成預約

食完飯之後，李穎容即興地跟梁玥嘉番屋企，而剛好，梁玥嘉亦有好奇想知嘅嘢要問李穎容

「李穎容！你最好從實招來呀！」李穎容先啱啱坐低喺梁玥嘉嘅床上，梁玥嘉便捉住李穎容，要將心中好奇嘅事一次過問晒出嚟，「你最近同張子萊做咩咁close呀？你地發生咗咩事呀？愈嚟愈奇怪呀你兩個！講！你係唔係中意咗張子萊？」

「邊個中意咗佢啫⋯！」李穎容推開梁玥嘉嘅手，「你唔好亂講啦！」

「我亂講？你兩個最近痴得咁埋，我又冇盲，我睇到㗎！」梁玥嘉一臉懷疑咁望住李穎容，指尖抵住下巴，「奇奇怪怪咁呀你地，講！你兩個最近做咩？」

「冇做咩⋯」李穎容忽然有啲心虛咁移開視線



「你好坦白講啦～」梁玥嘉挑起眉講道，手放到李穎容嘅腰上輕輕掐咗兩下，「吱你㗎！」

「哈哈哈哈！」李穎容頓時縮咗兩下，「哈哈！我、我講啦哈哈！」

梁玥嘉聽到李穎容話講便即刻停手，等李穎容坐番好然後講比佢知成件事嘅來龍去脈

「其實只係最近成日都傾計咋嘛喺IG⋯」李穎容嘅雙手無處安放，只好拎住手機把玩着

一提起張子萊，李穎容就覺得渾身唔自在，坐都坐得特別唔舒服，扭扭擰擰咁

「嗯～就係咁？一定仲有嘅～」梁玥嘉追問道，手已經放定喺李穎容嘅腰上

「呢幾晚有一邊視訊一邊溫書囉⋯」李穎容扭扭擰擰咁講道，望咗梁玥嘉一眼之後又尷尬地撇開臉，「之前呀，佢咪幫過我嘅，之後就開始成日私下傾計，跟住又講咗好多嘢咁囉⋯」

「哎呀呀～」梁玥嘉聽到都覺得興奮，「咁你係唔係中意佢？」



「我都話我唔想拍拖住⋯」李穎容撇開臉，雙手捧住臉頰，佢口講唔想拍拖，但當手卻感覺到臉頰熱熱的

「你唔拍拖但都可以中意佢㗎嘛～」梁玥嘉攬住柴犬攬枕，「你對佢有冇好感啫？有冇少少中意？」

「嗰一次企喺佢身後⋯嗰一次比佢拉住走⋯」李穎容微微耷低頭，手下意識地捉住右手嘅手腕，嗰種餘溫仍然殘留喺手腕上




IG Link: https://www.instagram.com/nd_cotttoncandy/?hl=zh-tw