［愛情純愛］由嗰一個Kiss開始，我地唔再係青梅竹馬: 118. 不爽

「仲有冇邊度唔明？」宋千辰喺解釋完之後再問梁玥嘉，「明晒？」

「嗯。」梁玥嘉點一點頭，隨意地開口道，「你教楠恩啦～」

梁玥嘉隨口一句說話喺宋千辰嘅耳中就最明顯嘅呷醋，宋千辰嘅嘴角偷偷揚起，但又努力地抑壓着自己嘅嘴角

「睇嚟有人呷醋⋯？」宋千辰喺心中默默高興，然後開口問楊楠恩，「你仲有冇嘢唔明？」

「冇啦⋯」楊楠恩微笑著搖搖頭，佢嘅微笑自然得毫無破綻，冇人察覺到佢嘅溫柔微笑中夾雜咗苦澀嘅味道，楊楠恩嘅注意力仍然落喺宋千辰嘅身上，「宋千辰望住梁玥嘉嘅眼神⋯好溫柔⋯」



因為中意一個人，所以會感覺到⋯察覺到佢眼中出現咗「唯一」⋯心裏嘅難受無法形容，或者真係單純嘅妒忌，妒忌嗰個成為佢眼中嘅「唯一」嘅嗰一個人

「到底我有邊度比唔上梁玥嘉⋯？我輸咗啲咩⋯？」楊楠恩心裏不忿地問道，「輸在我唔係佢嘅青梅竹馬？唔係一早就識？到底我輸啲咩⋯？」

縱使心裏有千萬個不忿，但楊楠恩無法左右宋千辰嘅心，宋千辰對梁玥嘉嘅偏愛太明顯

所有女仔都想得到嘅係「偏愛」，唔止係中意，而要係喺所有人面前都表現出嚟嘅偏心：「心永遠偏向你」嘅偏愛

楊楠恩嘅十句都比唔上梁玥嘉一句，就連對梁玥嘉講解題目嘅時候，語氣都會有明顯嘅差異，宋千辰嘅偏愛就係咁明顯



「你明唔明？」宋千辰望住梁玥嘉，但梁玥嘉雙眼放空，宋千辰拎起筆一下子就敲落梁玥嘉嘅頭上，「喂！你有冇聽我講嘢㗎？」

「有呀！」梁玥嘉一下子就回神，輕皺起眉頭，「邊個話我冇聽啫！」

「見你發呆嘛。」宋千辰講道

「我肚餓咋嘛⋯」梁玥嘉無奈地講道，然後望向李穎容，「去唔去買嘢食？」

「好呀好呀！我都肚餓！」李穎容用力地點頭，佢都已經覺得個肚開始空虛，「楠恩，去唔起買嘢食？」



「好呀～」楊楠恩眼見李穎容同梁玥嘉都出去，冇理由自己唔去，所以亦只好答應，「但你地打算食咩呀？」

「食咩呀⋯食米線？」李穎容諗咗一諗之後講道，「有冇咩想食？」

「不如叫嗰間台灣嘢外賣。」張子萊提議道，望向霍思傑又道，「上次新開嗰間呢～」

「哦～好喎！」霍思傑隨即和議

「你地食咩呀？我地去買。」梁玥嘉問道

「你地三個女仔去買呀？」宋千辰問道

「係呀～」李穎容代梁玥嘉回答，「都要有人喺度睇住啲嘢㗎嘛～」

最後經過一番討論之後，最後係三個女仔再加埋宋千辰、張子萊出去買飯，霍思傑留低睇住啲嘢



梁玥嘉、李穎容同楊楠恩入咗鋪頭點餐，張子萊同宋千辰企喺門口等佢地出嚟

等咗一陣之後，三個女仔直接拎住外賣出嚟

張子萊行去李穎容面前，指一指佢手上拎住嘅外賣然後攤開手心，示意李穎容將手上嘅外賣比佢拎；李穎容冇半點猶疑，直接就將外賣從自己嘅手中拎落嚟，套到張子萊嘅手上

「比我。」宋千辰朝梁玥嘉伸手，「我拎。」

梁玥嘉乖乖地將外賣轉移到宋千辰嘅手上，雙手隨即空空的

「你嗰個都比我。」宋千辰朝楊楠恩伸出另一隻手

「唔該。」楊楠恩微微一笑，便將外賣遞比宋千辰拎



宋千辰同張子萊拎晒所有外賣，三個女仔一身輕咁行喺前面，楊楠恩喺兩人嘅身旁，默默地聽住梁玥嘉同李穎容講嘢，見佢地邊講邊笑，自己則靜靜地企喺佢兩個身旁，好似格格不入一樣

腦海裏全都係剛才嘅畫面，宋千辰對自己嘅體貼都只不過係順便，佢嘅體貼係比梁玥嘉

「楠恩，你做咩咁靜嘅？」梁玥嘉察覺到楊楠恩嘅安靜

「哈哈⋯因為有啲肚餓⋯」楊楠恩擠出笑容笑咗兩聲，心裏道：「唔通話你知因為我妒忌你呀！」

「咁我地要快啲番去食嘢啦！」梁玥嘉笑了笑，然後回頭望向宋千辰，「行快啲啦！肚餓啦！」

「玥嘉會唔會都中意宋千辰⋯？」呢個問題忽然喺楊楠恩嘅心中一閃而過，「要唔要試探下、打聽下⋯？」

番到去分好嘢食之後，因為做數而做到餓嘅大家都迫不及待食嘢

「呀⋯」梁玥嘉一打開碗蓋，就見到有啲紅蘿蔔絲同青瓜絲喺一旁，自然地就將佢地夾去宋千辰嘅碗中，「嘖嘖嘖⋯」



宋千辰見梁玥嘉夾咗嘢落佢碗，然後宋千辰亦自動夾咗一件炸雞落去梁玥嘉嘅碗中

「玥嘉你啱啱唔直接叫佢走蘿蔔同青瓜絲嘅？」一直默默觀察梁玥嘉嘅楊楠恩問道

「第一次食，都唔知佢會有絲喺飯面～」梁玥嘉咬一啖炸雞，然後又食咗一啖飯，「唔緊要啦～佢都食嘅～」

梁玥嘉指一指宋千辰，宋千辰抬頭望向梁玥嘉無奈地笑一笑，然後耷低頭繼續食飯

「做咩要特登炫耀比我睇咁啫⋯」楊楠恩喺心裏不悅地講道，說者無心聽者有意，「想串我咪直接講囉⋯兜咁大個圈做咩⋯ 」




IG Link: https://www.instagram.com/nd_cotttoncandy/?hl=zh-tw