［愛情純愛］由嗰一個Kiss開始，我地唔再係青梅竹馬: 87. 自由身

正當梁玥嘉想再開口問宋千辰覺得楊楠恩點樣之類嘅問題時，宋千辰先開口：「你又會突然間同佢咁熟嘅？」

「唔⋯」梁玥嘉自己都唔知點解會同楊楠恩突然熟咗咁多，「唔知喎，有次食lunch嘅時候，突然見到楊楠恩，佢同我地講話佢自己一個，後來佢話佢冇咩朋友，佢又成日同我同穎容一齊，咁咪熟咗囉～」

宋千辰點一點頭，冇再出聲，但似乎係沉思緊啲咩一樣

⋯

「好眼瞓⋯」梁玥嘉托住頭，幾乎都冇聽書，一直都喺度打喊露，「今日放學番到屋企之後，我一定要好好瞓個晏覺⋯」



梁玥嘉一直望住掛喺牆上嘅時鐘，等待落堂嘅鐘聲響起

「叮噹叮噹⋯叮噹叮噹～」

落堂鐘聲一響，老師就落堂，對所有學生嚟講，會準時落堂嘅老師都會係好老師

一同老師敬完禮落堂之後，梁玥嘉瞬間就企起身，拉住穎容話要去食lunch

「等我一陣啦！比我開埋locker先啦！」李穎容沒好氣地拎住書企起身走向locker



梁玥嘉跟喺李穎容身後，李穎容開locker嘅時候梁玥嘉企喺一旁等佢，宋千辰眼見梁玥嘉咁攰便行到梁玥嘉面前

「做咩咁眼瞓？」宋千辰望住梁玥嘉一臉想要企喺度瞓嘅模樣，「琴晚又煲劇？一定唔會係因為溫書啦你。」

「咩呀⋯！就嚟考試啦！我都有溫書！」梁玥嘉本來仲一臉認真咁講，但轉眼就心虛地細聲講道，「琴晚只係煲劇煲耐咗⋯睇下又一集睇下又一集，然後就睇到4點啦⋯」

「你真係死蠢嚟⋯」宋千辰無奈地講道

此時楊楠恩行過嚟，宋千辰以為佢要開locker便讓開咗，點知楊楠恩企咗喺梁玥嘉身旁，梁玥嘉伸手挽住咗楊楠恩嘅手臂，楊楠恩見到梁玥嘉又因為煲劇而夜瞓都只好無奈一笑



「我地等埋穎容就去食飯啦！」梁玥嘉忽然好似充滿鬥志咁講道

楊楠恩望向宋千辰，宋千辰應覺到楊楠恩嘅視線便望咗佢一眼，楊楠恩迅速地移開視線

「你地想食咩呀？」楊楠恩問道，望一望宋千辰之後又望向梁玥嘉

「千辰佢地今日唔同我地一齊食飯。」梁玥嘉講道，「得我地三個女仔食。」

「哦⋯」楊楠恩點一點頭，掩蓋着心中嘅失望

梁玥嘉望向李穎容，見到李穎容同緊張子萊講嘢，肚餓而且眼瞓嘅佢極度需要食飯嚟補充能量

「穎容！食飯啦！」梁玥嘉朝李穎容叫道，李穎容回頭望向梁玥嘉，笑咗一笑

「知啦！行得啦！」李穎容走到梁玥嘉面前，同佢地兩個一齊行出課室



正所謂「三個女人一個墟」，三個女仔一去到餐廳坐低就講唔停

「話說你最近，好似成日都同張子萊一齊咁嘅⋯」梁玥嘉望向坐佢對面嘅李穎容

「冇呀，冇成日同佢一齊。」李穎容諗咗一諗之後講道

「係呢，你同Joshua點呀？」仲未知道李穎容已經分咗手嘅梁玥嘉問道

「唔⋯」李穎容微微耷低頭，欲言又止，雙手拎住放喺面前嘅水杯，然後苦笑道，「我同Joshua分咗手啦⋯我回復自由身啦⋯！」

「幾時嘅事呀⋯？」梁玥嘉一臉擔心地問道

「你有冇事呀⋯？」楊楠恩都擺出擔心嘅模樣



「我冇事，其實都已經分咗個兩個星期㗎啦⋯」李穎容望住佢兩個，努力地微笑起嚟

表面上堅強嘅李穎容喺面前感情事嘅時候都會有脆弱嘅一面，佢嘅微笑完全係強擠出嚟，兩年感情，唔係話放低就放低⋯

「我okay呀，真係，只係需要啲時間⋯」李穎容盡力掩蓋自己嘅難受

「你有事真係要同我講呀！」梁玥嘉再三提醒李穎容，喺佢嘅身邊有自己

「知啦知啦！」李穎容笑笑口講道

「有冇人知你分咗手？」梁玥嘉好奇地問道

「得張子萊知。」李穎容直接回答，毫無猶疑嘅餘地

「得張子萊知⋯等陣先！」梁玥嘉聽到李穎容咁講已經覺得怪怪地，佢終於諗到邊度怪，「點解張子萊會係第一個知你分手嘅人呀？」



「呃⋯」李穎容望住眼前直盯着佢嘅梁玥嘉同一臉好奇嘅楊楠恩，「成件事有啲複雜⋯有啲難解釋。」

李穎容無奈一笑，佢都唔知要由邊度開始解釋先好，要由佢一個人搭電車開始講定要由佢撞到張子萊開始講起？只好無奈一笑代替佢想講嘅嘢

梁玥嘉又唔想令氣氛咁尷尬，便講下其他嘢分散一下；望住梁玥嘉同李穎容有講有笑，對自己都好友善好親切，楊楠恩嘅心裏有一絲內疚閃過




IG Link: https://www.instagram.com/nd_cotttocandy/?hl=zh-tw