［愛情純愛］由嗰一個Kiss開始，我地唔再係青梅竹馬: 85. 挑撥離間

楊楠恩心中妒忌之火熊熊地燃燒着，佢嘅妒忌令佢咬牙切齒

「我有咩輸比佢⋯！我有咩比唔上佢⋯！」楊楠恩嘅內心正放聲問道，「憑咩係佢呀！」

但楊楠恩努力地壓抑着自己，因為宜家嘅佢終於可以同宋千辰獨處，佢要好好珍惜呢段得來不易嘅時間

「哦～玥嘉整㗎？」楊楠恩微笑問道，「難怪你一直戴住啦～」

「我只係唔記得咗除⋯」宋千辰察覺到自己嘅心事被睇穿，只好無奈一笑



呢個時候，李子迪行入課室，楊楠恩回頭望向喺課室門口嗰邊嘅李子迪，李子迪行到自己嘅座位，然後喺枱旁蹲低，伸手入櫃桶拎嘢，拎完嘢就走咗

「李子迪同玥嘉好似都幾friend，佢兩個好似成日都一齊咁。」楊楠恩假裝不以為意地講道，宋千辰嘅動作頓時一頓

「係咩？」宋千辰連頭都冇抬起，只係輕輕一笑

「嗯！佢兩個都friend咗好多年啦～」楊楠恩笑笑口講道，左手掀開B簿嘅目錄，右手拎住原子筆寫分，「李子迪成日都整蠱玥嘉，可能佢中意玥嘉都唔定！」

「都知個李子迪有唔妥⋯」宋千辰喺心中默默地講道，但口講出嚟嘅又係另一回事，「唔知，嘉嘉好少同我講呢啲，係講都係同李穎容講。」



「之前有次聽玥嘉講，佢都話過李子迪唔差。」楊楠恩將原子筆嘅筆頭抵喺下巴，擺出一副諗緊梁玥嘉同佢講過嘅嘢，「可能玥嘉都中意李子迪呢～日久生情嘛～」

「佢話過李子迪唔差？日久生情？如果佢對李子迪會日久生情嘅話，咁不如對我啦！」宋千辰喺心中不滿地抱怨道

「李子迪又高大又靚仔，同玥嘉都幾襯呀～」楊楠恩開心地繼續講，望一望宋千辰之後又擺出一副唔好意思嘅表情，「Sorry呀⋯我咁講你會唔會介意⋯？」

「唔會。」宋千辰又口不對心咁回答楊楠恩，關於梁玥嘉嘅事佢又點會唔介意，「咁佢遲早都會有中意嘅人㗎啦。」

宋千辰看似大方嘅背後，卻藏着一份擔憂同不忿，佢中意梁玥嘉係毋容置疑嘅事，但宜家佢最擔心嘅問題係出現「襄王有夢，神女冇心」嘅狀況



「我覺得佢同李子迪都幾襯，人地話歡喜冤家通常到最後都會一齊，佢兩個都幾襯呀～」楊楠恩毫不在意宋千辰嘅想法講道

宋千辰靜咗落嚟，楊楠恩默默地留意住宋千辰嘅表情變化，喺心中一笑

「況且，玥嘉都有講過話李子迪唔錯，我覺得佢對李子迪應該都唔係普通朋友咁簡單。」楊楠恩擺出一副替梁玥嘉高興嘅模樣，「我有時都幾羨慕玥嘉⋯」

宋千辰稍微抬眼望楊楠恩，楊楠恩微微一笑

「玥嘉人又好，朋友又多，就算係同男仔都挽得埋。」楊楠恩苦笑道，「嘻⋯我本來就冇咩朋友，所以見到玥嘉，就覺得有啲羨慕⋯」

楊楠恩嘅說話並非全是謊言，亦夾雜咗佢嘅真心話

「你都唔差。」宋千辰抬眼望向楊楠恩，「每個人都唔一樣，唔洗羨慕人，你係你，嘉嘉係嘉嘉。」

本來宋千辰無意、隨口講嘅說話令楊楠恩嘅心跳得更快，今次係第一次，聽到宋千辰對佢嘅鼓勵，楊楠恩嘅臉頰泛起淡淡嘅紅霞



「多謝你⋯」楊楠恩微微耷低頭，聲線中帶點羞澀

宋千辰望一望楊楠恩，然後耷低頭繼續做嘢，楊楠恩嘅心無法冷靜落嚟只因宋千辰一句說話

楊楠恩悄悄地抬眼，目光停留喺宋千辰嘅身上，望住宋千辰專心致志工作嘅模樣，心臟用力地緊縮咗一下；宋千辰專心地工作，心中只想快啲完成手頭上嘅工作然後去圖書館搵梁玥嘉一齊番屋企

心臟跳動嘅聲音喺腦中迴盪着，楊楠恩感覺到心臟嘅跳動令全身都微微震動作，心跳有幾強烈⋯？

「睇嚟佢都唔係討厭我，只係好似穎容講嘅咁樣未熟⋯」楊楠恩頓時喺心中鬆咗一口氣

「佢咁多嘢講嘅⋯」宋千辰喺心中默默地講道，都唔算係抱怨，只係想表達下自己嘅無奈，「一直blablabla⋯」

放喺褲袋嘅手機一震，宋千辰拎出手機一睇，嘴角不禁揚起，放低手上嘅工作



「做晒past paper啦？」宋千辰回覆梁玥嘉道，「我差少少先完。」

好快就已經見到梁玥嘉輸入中，喺對話框嘅最底彈咗一個新message：「Okay～陣間走得你同我講」

「Okay」宋千辰回覆完之後就將手機塞番入褲袋

楊楠恩剛好抬頭，見到宋千辰將手機交番入褲袋嘅動作，直覺話比佢知啱啱send嘢比佢令佢可以即刻睇手機嘅人應該十有八九係梁玥嘉




IG Link: https://www.instagram.com/nd_cotttocandy/?hl=zh-tw