［愛情純愛］由嗰一個Kiss開始，我地唔再係青梅竹馬: 78. 打斷

「我地唔會一世都係青梅竹馬，我知道⋯」梁玥嘉講出佢想講嘅嘢嘅前半段，後半段則喺心中講道：「因為我已經中意咗你⋯冇辦法再將你淨係當做青梅竹馬⋯」

喺呢一刻，梁玥嘉嘅內心有股衝動想直接講出佢嘅心意，但宋千辰同佢對視着令佢冇勇氣講出口

「畢竟遲早大家都會有中意嘅人⋯」梁玥嘉有啲猶疑咁講出呢句說話，宋千辰頓時眉頭一皺，「好難再咁親近⋯」

聽到梁玥嘉咁講，宋千辰嘅內心又怕又緊張，因為唔知梁玥嘉想表達啲咩，雖然想知清楚啲但實際上又唔太想繼續聽落去，因為怕聽到自己唔想聽嘅嘢

「其、其實—」「唔洗再講落去啦。」



正當梁玥嘉想要繼續講，講出暗示自己想法嘅說話同時，宋千辰開口打斷，梁玥嘉一臉愕然

宋千辰嘅內心都唔知點解自己會係咁嘅態度，但當佢一面對同梁玥嘉有關嘅感情問題，佢就控制唔到自己

兩個人對望着，大家都冇再開口講任何嘢

忽然間，梁玥嘉望向書枱，佢總覺得喺書枱上有一樣好細微嘅嘢吸引住佢嘅注意力；宋千辰只係默默地觀察着梁玥嘉嘅舉動

梁玥嘉鬼使神差地伸手將宋千辰放手繩嘅嗰隔櫃桶拉開，顯示喺佢眼前嘅係一條已經有啲殘舊嘅手繩



「你仲有keep住呀？」梁玥嘉從櫃桶中拎出手繩，臉上掛着高興嘅笑容，梁玥嘉望向宋千辰，嘻嘻一笑

明明上一秒仲有啲唔開心、有啲嬲嘅宋千辰，一見到梁玥嘉嘅笑容，佢嘅小情緒都開始消退

「你唔係話好醜⋯一番到去就要掉㗎咩⋯」梁玥嘉拎住小巧嘅手繩，微微扁嘴

「唔知點解，唔記得掉掛～」宋千辰隨便講咗一個借口，「宜家掉囉～」

宋千辰伸手裝作要將手繩拎去掉，梁玥嘉瞬間捉緊手繩，整個人都微微轉開將手繩保護好



「唔得！」梁玥嘉嘅笑容帶了一分甜意，「唔掉得呀？！係代表我地嘅友情㗎！」

「有好多嘢都可以代表㗎，唔一定係呢條手繩。」宋千辰行到去梁玥嘉嘅身旁，伸手從梁玥嘉手中拎咗條手繩

「係啫，但係好有紀念價值。」梁玥嘉天真甜美嘅笑容深深地吸引着宋千辰，宋千辰定睛地望住梁玥嘉

內心有好多想表達嘅事，但唔係三言兩語可以解釋得晒，太多太多嘅內心事想要講

「而且係我送比你～」梁玥嘉似無意講出口，實際上佢係刻意講出口，提醒宋千辰呢條手繩係佢送，所以係有價值嘅嘢

雖然想將「你係唔係特登keep起唔掉？」呢個問題問出口，但梁玥嘉最後都係冇問出口，因為答案都已經好明顯

「嗯。」宋千辰只回答咗一個好簡單嘅答案去回答一切

「幸福好簡單，知道你心入面都有我就得。」梁玥嘉喺心中默念道，「雖然你對我嘅心意未必同我一樣，但至少我知道喺你心入面係有我嘅位置。」



梁玥嘉抬頭望向宋千辰，笑容嘅甜係由心而發嘅甜意，心中有着幸福嘅感覺

⋯

喺夜晚番到去自己屋企嘅梁玥嘉努力地喺枱面嘅櫃桶中搵嘢拎嘢

「嘻嘻⋯」梁玥嘉拎好所有嘢之後就開始埋頭苦幹地整嘢

埋頭苦幹咗一個鐘之後，梁玥嘉滿意地笑起嚟，然後小心翼翼地撕走用作固定嘅膠紙，拎起到手上欣賞完成品

「搞掂～」梁玥嘉笑起嚟，拎起埋放喺手邊嘅另一條同款手繩，臉上有一絲害羞閃過，「佢會唔會中意呢⋯」

梁玥嘉將條手繩放咗喺一旁，將佢地掛咗喺枱度嘅勾上



「快啲搵次拎比佢先～」梁玥嘉講道，然後開始自賣自誇一樣讚自己，「其實我都整得幾靚呀～」

梁玥嘉挺直腰桿伸咗一個大懶腰，四處張望搵自己部手機

「手機喺度⋯」梁玥嘉拎起比佢隨手掉咗喺床上面嘅手機，螢幕頓時亮起嚟，「嘩！成12點幾啦！沖涼先！」

梁玥嘉太專注整手繩，完全都冇注意到時間，一睇時間就已經到咗第二日；梁玥嘉瞬間就起身拉開衣櫃櫃桶，拎好衫褲去沖涼

「嘉嘉仲未覆我嘅⋯」宋千辰拎起放喺Macbook旁邊嘅手機，螢幕一亮，但卻冇收到梁玥嘉嘅message

「瞓咗？」宋千辰再send多咗個message比梁玥嘉

明顯地，當梁玥嘉冇覆佢機嘅時候，佢就開始變得坐立不安，望住手機一直都冇彈出來自梁玥嘉嘅message，心中就覺得唔自在

此時嘅手機震咗一震，宋千辰隨即緊張地拎起手機查看，睇下係唔係梁玥嘉覆佢



「唉⋯」宋千辰望到手機螢幕上彈出嘅通知時，心中不禁有啲失望，「唔通佢真係已經瞓咗⋯？」

宋千辰將耳機除落嚟，盯住手機螢幕發呆同時期待着收到梁玥嘉嘅回覆




IG Link: https://www.instagram.com/nd_cotttocandy/?hl=zh-tw