［愛情純愛］由嗰一個Kiss開始，我地唔再係青梅竹馬: 56. 只是一個配角

「我都識溜冰，我教你。」宋千辰直言講道

「吓？」梁玥嘉挑起眉，一臉疑惑咁望向宋千辰，「你識㗎咩？我唔知嘅？」

「有好多嘢你都唔知添，你仲敢話你了解我？」宋千辰對梁玥嘉微笑講道，喺心中又道：「想同我爭嘉嘉？你諗太多啦李子迪！我唔會比機會你接近嘉嘉㗎～」

李子迪同宋千辰再次「默契地」對上視線，宋千辰不屑地望咗李子迪一眼

「梁玥嘉你想幾時？今個聖誕假搵日出嚟啦～」李子迪無視咗宋千辰，直接問梁玥嘉



「唔⋯其實我幾時都得，除咗24號嗰日囉～」梁玥嘉諗咗一諗後笑笑口講道，「24號同佢地出去。」

「咁不如⋯就26號啦～」李子迪瞬間講道

「我可—」「我都去！」

正當梁玥嘉想答應時，宋千辰就開口，一下子將梁玥嘉嘅說話打斷

「反正我都識，多個人教好啲嘅。」宋千辰望向李子迪，臉上掛上一個虛假都不得了嘅笑容



「我同你兩個男人出去？」梁玥嘉望一望李子迪，又望一望宋千辰，「叫埋穎容陪我得唔得呀？」

「可以呀～」李子迪微笑道

一番到課室，梁玥嘉即刻就捉住李穎容邀約佢一齊去溜冰，楊楠恩見梁玥嘉番到嚟，便行到李穎容隔離

「穎容呀！一齊去溜冰啦！」梁玥嘉捉住李穎容嘅手撒嬌般講道，「嚟啦～陪我啦～」

「26號唔得閒，約咗Joshua呀⋯」李穎容搖搖頭講道



「呿⋯」梁玥嘉細聲地呿一聲，然後望向楊楠恩側着頭微笑道，「楠恩呢？有冇興趣一齊去溜冰呀？我唔想自己一個同李子迪、宋千辰出去呀⋯」

楊楠恩本來對溜冰冇咩興趣，但一聽到梁玥嘉提到宋千辰，知道宋千辰都會去嘅時候頓時雙眼放光似的，頓時對溜冰極感興趣

「但我都唔識溜冰⋯」楊楠恩心中覺得好可惜，錯失咗一個機會見宋千辰

「我都唔識呀～佢地話教我！一齊學呀～」梁玥嘉笑笑口講道，然後行到楊楠恩身旁捉住楊楠恩嘅手腕，「一齊學啦～一齊去挽下咋嘛～我都唔識溜！」

「唔⋯咁好啦～」楊楠恩假裝啲唔好意思咁講道，心中卻係另一個模樣：「Yes！到時如果係宋千辰教我就好啦，仲唔借意拉近我地嘅關係！？」

「我地約咗26號呀～時間再約～」梁玥嘉對楊楠恩講道

楊楠恩下意識地「嗯」咗一聲，腦海中早就幻想緊當日溜冰嘅時候會點：宋千辰輕輕地扶住佢嘅雙手拉住佢溜冰，一步一步咁教佢，喺佢跌嘅時候一下子伸手扶住佢，順道將自己拉到佢嘅懷中⋯淨係諗一諗都已經覺得好開心好興奮

Lunchtime嘅時候，佢地一大夥人一邊食飯一邊傾到底24號嗰晚要約幾點



「24號晚點呀？約幾點？」李穎容問道，「我地夜晚約幾點、邊度等？」

「我地喺銅鑼灣等囉～唱11點嘅話，咁我地約10點9喺嗰度門口等囉～」霍思傑講道，「我宜家先發現我地直接一齊過埋聖誕原來。」

24號係平安夜，25號就係聖誕節，剛好唱通宵K就橫跨咗兩個日子，一齊過平安夜之外，聖誕節正日嘅時候都係同緊大家一齊

「好呀～10點9囉～」宋千辰講道，「李穎容嗰日book咗房先。」

「Okay～」李穎容比咗一個Okay手勢

楊楠恩望向佢嘅左手邊，見到梁玥嘉同宋千辰靠得好近，望住同一部手機好似睇緊啲好好笑嘅片，兩個人一齊睇一齊笑，感覺就好似一對小情侶一樣，楊楠恩睇喺眼內都覺得唔舒服又唔自在，默默地移開了視線

⋯



今日係星期六，聖誕假期開始啦，或者因為係放聖誕長假嘅關係，梁玥嘉瞓得特別舒服，去到2點幾嘅時候仍然仲瞓緊，唔願起身

正當梁玥嘉仍然熟睡中嘅時候，隔離屋嘅宋千辰早就出咗門口去咗銅鑼灣，去銅鑼灣為咗咩？為咗去Log-on買聖誕禮物

宋千辰唔似梁玥嘉，上次梁玥嘉去到Log-on嗰陣仲要左揀右揀、精挑細選，宋千辰係已經決定好要買咩，所以一踏入Log-on嘅門口就直接行咗去放公仔嘅地方，一下子就拎起一隻梁玥嘉之前同佢一齊嚟嗰陣攬過嘅長條型柴犬造型攬枕，行到去一個執緊貨嘅職員前

「唔該，我想呢個公仔有冇新㗎？」宋千辰禮貌地問道，職員表示有之後就去咗拎一隻全新、仍然包住膠袋嘅嘅公仔比宋千辰




IG Link: https://www.instagram.com/nd_cotttocandy/?hl=zh-tw