［愛情純愛］由嗰一個Kiss開始，我地唔再係青梅竹馬: 51. 胡思亂想

梁玥嘉仍然頹廢咁灘喺床上面，而宋千辰則手拎住一盒啱啱喺雪櫃拎出嚟嘅嘢飲行番去房

「最近好似成日都同宋千辰喺IG dm咁⋯」梁玥嘉拎住手機，望住手機嘅螢幕喃喃自語講道

最近嘅晚上，幾乎每一晚都係同宋千辰喺IG dm傾計，傾到差唔多12點幾1點之後，喺出現咗已讀不回嘅情況後便會各自去瞓，第二日番學一踏出家門同時就會聽到隔離屋嘅開門聲，又同宋千辰一齊番學，最近一連幾日都一直重複緊呢個情況

今晚，亦同樣⋯

⋯





一轉眼嚟到十二月中，天氣仍然寒冷，每一日喺大家仍然繫着頸巾、著住校褸番學

但嚟到十二月，對於梁玥嘉嚟講係一件幾開心嘅事，因為好快就到聖誕節，可以同大家一齊出去挽

宜家正上緊數學堂，而梁玥嘉則處於一個腦袋放空嘅狀態，完全不在線上，靈魂都去咗魂遊太空

「呀，好悶呀⋯好想瞓⋯」梁玥嘉喺心中默默抱怨，「點解要讀數學，讀嚟有咩用⋯」

梁玥嘉稍微挺直腰板彷彿要鬆鬆筋骨伸懶腰一樣，然後又繼續貼坐櫈背坐，梁玥嘉感覺到雙眼都有啲攰，於是便將放空嘅雙眼收回來，望一望其他人





「如果我數學好勁嘅話，我都可以打起十二分精神上堂⋯」梁玥嘉望住仍然精神上堂嘅其他人，喺心中帶着一點點疲倦地講道

宋千辰坐嘅位置，係佢目光可及嘅位置，梁玥嘉嘅視線不自覺地停留喺宋千辰身上，宋千辰正以一副認真嘅模樣上堂，手上拎住鉛芯筆；望到宋千辰認真嘅模樣，梁玥嘉嘅心中掀起咗一個又一個嘅小浪

這時，宋千辰偶然抬頭並望向梁玥嘉嗰邊，當視線同梁玥嘉對上嘅時候，宋千辰嘅嘴角悄悄地上揚，梁玥嘉見到宋千辰嘅微笑同時，都偷偷地露出一個微笑

宋千辰側住頭托着腮，直勾勾地望住梁玥嘉，眼神中滲出了一絲溫柔

「如果我地唔係青梅竹馬，你話幾好呢⋯」梁玥嘉朝宋千辰微笑同時，喺心中慨嘆道，但臉上嘅微笑依舊，冇令宋千辰察覺到任何不同之處





放學嘅時候，梁玥嘉一把捉住咗李穎容唔比佢走

「做咩呀？」正準備走嘅李穎容一臉疑惑咁望住梁玥嘉

「你今日陪我去一個地方好唔好？」梁玥嘉望一望四周，然後細細聲地對李穎容講道

「吓？咁突然？」李穎容輕皺起眉頭，「都得嘅⋯」

此時宋千辰已經執好嘢，孭住書包行到梁玥嘉嘅旁邊

「行得未呀？慢吞吞。」宋千辰對梁玥嘉講道

「呃，我今日唔同你一齊走，我同穎容有地方去。」梁玥嘉彷彿心虛一樣，都唔正眼望宋千辰

「吓？哦，咁我走啦。」宋千辰心中有啲疑惑，但都冇多講啲咩，只係轉身行出課室，追上霍思傑同張子萊嘅步伐





梁玥嘉同李穎容一齊去咗銅鑼灣Log-on，行到去放公仔嘅層架前

「你想買公仔呀？」李穎容隨手拎起一隻問道，望向梁玥嘉時，梁玥嘉一臉苦惱，「你要嚟嘅話，同宋千辰一齊嚟都可以㗎，佢應該唔會拒絕你㗎。」

「哎呀，就係唔可以比佢知道我買咩呀嘛！」梁玥嘉仍然一臉苦惱，皺着眉頭尋找住仍想買嘅嘢

「咦～有古怪～」李穎容望住梁玥嘉，揚起嘴裏笑道，「原來係買嘢比宋千辰～」

「咁就嚟聖誕啦嘛，我咪話過想買份禮物比佢嘅～咁唔通比佢知我買咩啦喎？咁咪一啲suprise都冇⋯」梁玥嘉一臉認真咁講道，臉上仲泛起淡淡嘅紅霞

「唉～你啲少女心事呀～有人春心盪漾啦～」李穎容毫不留情地笑道，但好快就收起咗笑臉，認真地問道，「咁你自己嚟買都得啦，我又唔係你，你最了解佢。」

「叫你嚟幫下眼嘛～你知我㗎啦，成日都揸唔定主意。」梁玥嘉望住李穎容笑了一笑，「所以先叫你同我一齊嚟咋嘛～」





「哦～」李穎容放低咗手上嘅公仔，整個人轉身望住梁玥嘉，笑笑口咁講道，「咁你諗到買咩比佢未呀？」

「就係未！」梁玥嘉皺起眉頭，扁起嘴、指住喺佢右手邊嘅層架講道，「我上次同佢嚟嘅時候，見到佢係咁望住Iron Man嘅Figure，但我又想買個公仔比佢，見佢張床空空，一隻公仔都冇⋯」

「原來已經同人地嚟過一次啦～」李穎容用手指戳梁玥嘉嘅臉頰，「唉喲喲～咁快就瞓過人地張床添啦？」

「痴線⋯你亂諗啲咩呀？」梁玥嘉輕皺起眉頭，沒好氣地望住李穎容

「你亂諗啲咩就真呀！我咩都冇講，你諗咩呀？紅都面晒咁。」李穎容彷彿成功捉弄梁玥嘉一樣，臉上掛上滿意嘅笑容，「你諗多咗啦！」

「我咩都冇諗囉！」梁玥嘉放低手上拎住嘅公仔，然後行到去放Figure嘅位置，李穎容望住梁玥嘉羞澀嘅表情，不禁笑了笑








IG Link: https://www.instagram.com/nd_cotttocandy/?hl=zh-tw