［愛情純愛］由嗰一個Kiss開始，我地唔再係青梅竹馬: 41. 聖誕行程

正當梁玥嘉想開口答嘅時候，張子萊忽然喺一旁代答一樣回答；梁玥嘉同宋千辰異常同步地朝張子萊望去，眼神裏夾雜咗「你係咪想死」嘅感覺，喺另一邊嘅李穎容聽到張子萊咁講之後喺心中放聲大笑

「佢地嚇我呀⋯」張子萊擺出一副可憐兮兮嘅模樣望向霍思傑，霍思傑伸手拍一拍佢嘅博頭安慰佢

「嘉嘉中意⋯嘅類型⋯」宋千辰喺心中講道，但又唔敢直接追問，唯有繼續擺出唔在意嘅樣默默等待

「玥嘉你中意咩類型啫？」李穎容追問道，李穎容覺得自己簡直就係明知故問一樣，明知道梁玥嘉中意宋千辰都仲要問佢中意咩類型

「我中意比較開朗嘅男仔，一時有啲cool，一時又好開朗嗰種，最好就係喺我唔開心嗰陣可以氹番我開心啦～當然大前提係佢要對我好啦！」梁玥嘉一口氣咁講道，「大概係咁啦～」



「咁咪即係講緊宋千辰囉！」張子萊唔知死咁講道，宋千辰瞪向張子萊

「有邊一樣嘢係同佢有關係？」梁玥嘉反咗一下白眼講道，「佢冇一樣符合囉⋯」

「我對你好差咩？」宋千辰望住梁玥嘉嘅無奈樣，半開玩笑半認真咁問道

梁玥嘉聽到宋千辰嘅提問之後冇即刻作出回答，而係先窒咗一窒，然後擺出無奈嘅表情

「你估下⋯」梁玥嘉講完之後頓時移開了視線，唔願再多望宋千辰一眼



「我對你唔好咩宜家⋯咁邊個對你好⋯」宋千辰喺心中吐苦水般講道，明明梁玥嘉冇講明佢對佢好唔好，但喺宋千辰嘅心裏卻覺得好似受咗天大嘅委屈一樣，「都唔知你唔開心嘅時候係邊個氹番你笑⋯定係你感覺唔到呀⋯」

「今個聖誕不如一齊出去挽呀～」梁玥嘉一隻手捉住楊楠恩嘅手腕，另 一隻手喺楊楠恩面前橫跨過去捉住李穎容嘅前臂

「唔⋯」楊楠恩有啲猶疑，借機將話題先從自己身上移開，「但穎容唔洗陪男朋友咩？」

「Joshua約咗你聖誕啦咩？」梁玥嘉扁着嘴問李穎容

「未呀，佢點會咁早約我呀⋯」李穎容搖搖頭，望向梁玥嘉笑道，「既然你約我先，咁我就同你出去啦～」



「楠恩你唔得閒？」梁玥嘉望向楊楠恩，楊楠恩苦笑咗一下，梁玥嘉都明白佢嘅意思，「咁好啦～我地下次再一齊出去挽啦～」

李穎容喺神不知鬼不覺嘅情況下喺楊楠恩嘅背後伸手，輕輕拍咗梁玥嘉一下，梁玥嘉感覺到有人拍佢，瞬間就抬起頭望，見到李穎容望住佢並朝佢打咗個眼色，梁玥嘉見到李穎容打嘅眼色之後，下意識就搖搖頭

「你挽我呀⋯」梁玥嘉用口型對李穎容「講」道，「唔好啦⋯！」

「去啦！聖誕節喎！係培養感情嘅好時機！」李穎容用口型回覆道，一直鼓勵梁玥嘉，「去啦！當平時約佢咁開口！去！」

李穎容喺講完之後即刻就移開視線，梁玥嘉一臉無助咁望住已經撇開了臉、繼續食嘢嘅李穎容，然後又望一望宋千辰

「真係直接開口問佢呀⋯」梁玥嘉喺心中問道，佢都有啲猶疑係咪真係要問出口，「要喺呢度問呀？」

梁玥嘉一直耷低頭食嘢，然後又偷偷地望一望李穎容，李穎容見梁玥嘉望住自己，便再一次朝梁玥嘉打眼色

「去啦，仲諗咩？」李穎容反咗一下白眼，「唉，幫你一把啦⋯」



李穎容無奈地搖搖頭，然後幫梁玥嘉開個頭

「如果話出去挽嘅話，唔係多啲人熱鬧啲咩？」李穎容幫梁玥嘉打開話題，幫佢一把，佢望向張子萊同霍思傑，「不如一齊出去挽啦！」

「嗯、嗯！多啲人熱鬧啲嘛～」梁玥嘉即刻就和應李穎容講嘅嘢，然後將頭微微側着望向宋千辰，「一齊出去挽？」

梁玥嘉輕拍宋千辰嘅手，宋千辰望向梁玥嘉，望住佢清澈得見到自己倒影嘅雙眸，不禁又有啲心動嘅感覺；梁玥嘉見宋千辰只係定睛凝視住佢唔出聲，梁玥嘉不禁覺得手心出汗，便露出微笑遮掩自己心中嘅不自由

「哦，好呀。」宋千辰對梁玥嘉微微一笑講道

「耶～」梁玥嘉嘅笑容頓時變得好似花一樣燦爛，臉頰上泛起淡淡嘅紅霞，宋千辰見到梁玥嘉笑得燦爛，自然地露出比微笑燦爛嘅笑容，梁玥嘉望向楊楠恩一臉惋惜咁講道，「楠恩你真係唔同我地一齊出去呀？你不如再睇下點啦～」

「其、其實都可以，我都同你地出去一齊挽啦聖誕～」楊楠恩笑住咁講道，「我都想同你地一齊出去挽～」



「真係呀？太好啦！」梁玥嘉笑住咁講道，「咁我地咪齊人囉～」

「咁今個聖誕去邊度挽好呀？」楊楠恩望住梁玥嘉，擺出一臉感興趣嘅樣子問道，「你地有冇想去嘅地方呀？」

「男仔有冇想去嘅地方？」李穎容問道，當然佢都知道佢地三個都唔會有咩特別想去嘅地方，但循例都問一問先，「如果唔想去主題樂園嘅話，去唱通宵K都可以。」

「通宵喎，我地男仔梗係得㗎，你地女仔得唔得㗎？」霍思傑疑惑地問道，「你條仔會比你同我地出去唱通宵K？」




IG Link: https://www.instagram.com/nd_cotttocandy/?hl=zh-tw