［愛情純愛］由嗰一個Kiss開始，我地唔再係青梅竹馬: 12. 醞釀中的感覺

宋千辰一下子將手繞過梁玥嘉嘅背後，然後搭住梁玥嘉嘅博頭，呢個舉動自然得很，就好似平日一樣因為彼此熟悉好親近而有嘅舉動一樣

「你會唔會唔開心㗎？」宋千辰嘅上身微微向前，望向梁玥嘉，「唔好唔開心啦！」

「我冇唔開心囉好冇？」梁玥嘉反一個白眼，「你唔好後悔先係，如果你中意我，記得同我講。」

「同你講做咩？等你派好人卡比我？」宋千辰無奈地講道，但佢自己講完之後喺心裏覺得自己好似喺某程度上承認中意梁玥嘉咁

「我唔會咁衰派比你，我會派好多張比你！」梁玥嘉開玩笑咁講道，自己都忍唔住笑咗出嚟，「放心啦，我有中意嘅人一定會第一個話比你知～」





宋千辰聽到呢度時怔了一怔，但好快就又笑了笑

「好呀。」宋千辰若有所思地微笑着，面對梁玥嘉啱啱講嘅說話，宋千辰嘅心裏有種難以言喻嘅感覺，今次係第二次有呢種感覺

宋千辰偷偷地望向梁玥嘉，梁玥嘉冇察覺到宋千辰正默默地留意着佢

「呀！」梁玥嘉忽然記起咩一樣叫咗一聲，嚇得宋千辰即刻移開視線，當咩事都冇發生過一樣

梁玥嘉嘅手伸入裙袋，拎咗一筒糖出嚟遞到宋千辰嘅面前，問道：「食唔食呀？」





宋千辰望一望梁玥嘉，然後又望向佢手上拎住嘅糖，眼前嘅少女同當年第一次見面嘅時候一樣⋯

「同千辰打個招呼啦～」梁媽媽對年幼嘅梁玥嘉講道，梁玥嘉抬起頭望向媽媽，然後又望向年幼嘅宋千辰

「嗨！」梁玥嘉揮揮小手，然後露出一個天真嘅笑容，「請你食呀！」

梁玥嘉舉起另一隻手到半空懸着，然後打開手心，手上放咗一粒糖；宋千辰伸手拎咗粒糖，望向梁玥嘉，見到佢正開心地笑着

宜家嘅梁玥嘉同當年嘅梁玥嘉冇咩太大嘅分別，依舊係中意笑，開朗活潑嘅佢，一轉眼就嚟到相識嘅第十七個年頭





「呿⋯仲以為你做咩⋯」宋千辰嘅嘴角悄悄地上揚，然後接過筒糖，撕開咗包裝拎咗一粒

「笑咩呀？」梁玥嘉見到宋千辰淺淺嘅笑容便問道

「冇嘢。」宋千辰收起笑容，望一望梁玥嘉然後搖搖頭

喺宋千辰嘅眼中，梁玥嘉一直以嚟都係一樣，本來佢以為佢同梁玥嘉一以後都會係咁樣，會係最了解對方嘅人，可以一直喺對方嘅身邊，但睇嚟，感情已經慢慢地產生咗變化⋯

⋯

宋千辰拎住原子筆把玩着，本來望住黑板但開始覺得有啲眼瞓嘅佢，視線不自覺地離開咗黑板，移到坐喺近門口嗰邊，同佢幾乎打一個對角嘅梁玥嘉

「嘉嘉仲咁有精神聽書呀⋯」宋千辰見到梁玥嘉仍然一副精力充沛嘅樣子，專注咁望住黑板聽書，喺心中默默地講道，「明明我琴晚都好早瞓，點解會咁攰⋯係咪因為呢科太悶⋯」

當宋千辰再次望向梁玥嘉嘅時候，忽然諗起同戀愛有關嘅事





「嘉嘉會中意咩類型嘅男仔呢？好似從來都冇聽佢提過⋯」宋千辰有啲好奇梁玥嘉會中意咩類型嘅男仔，雖然已經識咗好多年，但從來都冇聽梁玥嘉提起過佢中意嘅類型，「我做咩突然好奇佢中意咩類型⋯？」

宋千辰自己都覺得莫名其妙，突然間會對梁玥嘉中意咩男仔感興趣，但內心嘅好奇始終抑壓唔住，最後宋千辰都係鬥唔過自己嘅好奇心繼續諗

「嘉嘉明顯係樂天派，咁佢應該會中意啲陽光型啦～ 」宋千辰喺心中猜想着，「定係佢會中意啲成熟啲、cool啲嘅？」

宋千辰偷偷地望咗梁玥嘉一眼，梁玥嘉側住頭、托住腮咁望黑板，然後又耷低頭望一望書，用手摸一摸書頁之後再次抬頭望黑板

「佢會唔會其實已經有中意嘅人⋯？」宋千辰諗道，本來正常嘅心跳就喺呢個瞬間好似窒咗一下咁，「如果有一日佢拍拖，佢同我就唔會再好似宜家咁⋯就算有一日佢分咗手，我地之間都會有無法復原嘅距離感⋯」

宋千辰掃視着班上每一個男仔，猜想緊成為梁玥嘉中意嘅人嘅可能性

「唔會係佢⋯唔會係呢個⋯佢都唔似⋯」宋千辰喺心中默默地否定咗機率細嘅人，「呢個有啲可能⋯佢就算啦，一睇就知唔係嘉嘉會中意嘅type⋯呢個更加唔會，完全唔會係嘉嘉杯茶！」





宋千辰區分咗有機會嘅人，但班上接近9成嘅男仔都比宋千辰排除在外，一係就係同梁玥嘉唔熟，一係就係佢覺得唔會係梁玥嘉中意嘅類型，總之可以排除嘅都已經排除晒

「我咁緊張做咩⋯？」宋千辰忽然好似醒過嚟咁問自己，「唔通到時佢真係有中意嘅人啦，我唔比佢中意，去拆散佢咩⋯」




IG Link: https://www.instagram.com/nd_cotttoncandy/?hl=zh-tw