［愛情純愛］由嗰一個Kiss開始，我地唔再係青梅竹馬: 05. 意料之內

去到lunchtime嘅時候，梁玥嘉同李穎容一齊食飯，宋千辰則同番自己嘅朋友霍思傑、張子萊一齊食lunch

雖然佢兩個己經好熟，但畢竟係喺學校，兩個人都會識到對方以外嘅朋友，有自己嘅朋友圈子，所以喺學校嗰陣，如無必要兩個人都唔會太親近

梁玥嘉同李穎容搵咗一間喺學校附近嘅餐廳，喺嗰度食lunch，兩個人坐低點完餐之後就又開次傾計

「啱啱嗰堂LS真係攞命，操paper操到手痛。」李穎容捉住自己右手手腕，右手手腕轉一轉鬆一鬆

「真係，我個手腕同啲手指勁痛囉！」梁玥嘉嘅右手手掌開合咗幾下，然後雙手手指交叉着拉下筋



「但佢堂堂都咁真係救命！」李穎容搖搖頭

「嗨～」

喺梁玥嘉同李穎容講緊嘢嘅時候，忽然有一個女仔行到去兩人坐嘅位置，企喺枱邊

「嗨～」兩個女仔都同佢打招呼

「楠恩你都嚟呢度食飯呀？」梁玥嘉笑了笑問道，「一個人？」



「嗯！」 楊楠恩露出一個溫文爾雅中帶點甜美嘅微笑，點一點頭，然後望一望四周，「不過冇位，所以想問下可唔可以同你地搭枱坐⋯」

「哦，可以呀，坐啦！」梁玥嘉同李穎容對望咗一眼然後講道

「太好啦！我仲擔心你地唔想。」楊楠恩鬆咗一口氣似的，然後行到去梁玥嘉身邊坐低

「我地叫咗嘢食啦。」李穎容對楊楠恩講道，「你睇下食咩啦～」

楊楠恩係梁玥嘉同李穎容嘅同班同學，溫文爾雅，有氣質，笑又好唔笑都好都係好好睇，所以話上天都會偏心；不過好多時，楊楠恩都係自己一個人食飯，感覺上好似冇咩朋友咁，但其實楊楠恩份人幾好，就係唔知點解佢成日都自己一人食飯，可能佢比較中意自己一人



食完lunch之後，佢地三個女仔一齊行番學校，沿路上都有講有笑

「我平時都係自己一個人食lunch，好悶，今日好開心！」楊楠恩笑住講道，「我下次可唔可以都痴你地一齊食飯？」

「可以呀～都冇咩所謂，一齊食囉～」李穎容講道，佢同梁玥嘉都唔係好介意，朋友一齊食飯好正常

梁玥嘉一邊睇手機一邊行，忽然收到宋千辰send過嚟嘅WhatsApp

千辰：親愛嘅嘉嘉，番到學校之後幫我買支嘢飲！比番錢你

梁玥嘉睇到宋千辰send過嚟嘅message時，無奈咁反咗一個白眼，但係喺番到學校之後，梁玥嘉都係去咗小食部幫佢買嘢飲

「阿姨，要支柑桔檸檬。」梁玥嘉企喺收銀枱前面，小食部阿姨轉身行到去身後嘅雪櫃前拎咗一支嘢淺黃色包裝嘅柑桔檸檬出嚟，放喺梁玥嘉面前

「$7。」阿姨講道，梁玥嘉喺散銀包入面拎咗$7出嚟遞比阿姨



梁玥嘉拎起支柑桔檸檬，然後轉身行去企喺一邊等佢嘅李穎容、楊楠恩面前

「行得啦。」梁玥嘉一邊幾散銀包塞番入裙袋一邊講道，佢嘅手就好似夾公仔機嘅夾咁捉住嘢飲嘅樽頸

「你唔係有帶水咩？我見到你枱邊勾咗水蹲喺度。」楊楠恩望一望梁玥嘉手上嘅嘢飲，然後望向梁玥嘉

「千辰叫我幫佢買⋯」梁玥嘉一臉無奈咁反咗一下白眼，「死懶鬼。」

「你兩個感情真係好。」楊楠恩用手掩住嘴笑，忽然講道，「好少會見到大個咗之後都會咁好感情嘅青梅竹馬。」

「Okay啦，都識咗咁耐啦⋯」梁玥嘉都唔知可以比咩反應，佢擰開支嘢飲，然後飲咗一啖

「咦？支嘢飲唔係買比宋千辰㗎咩？」楊楠恩見到梁玥嘉嘅舉動後一臉愕然



「係呀，收番啲運送費，淨係收佢$7太便宜佢。」梁玥嘉聳聳肩，若無其事咁擰番實個樽蓋

番到課室之後梁玥嘉將支嘢飲放咗喺自己枱頭，然後同李穎容、楊楠恩傾計，過咗一陣之後宋千辰佢地番到嚟，宋千辰直接就行到去梁玥嘉個位度，拎咗支嘢飲，梁玥嘉望住宋千辰

「$7。」梁玥嘉朝宋千辰伸手，灘開手掌

「$7都唔放過，小氣鬼⋯」宋千辰一臉不情願，但都係喺褲袋拎咗錢比梁玥嘉，「啱啱好。」

宋千辰比完錢之後冇即刻走，反而係企喺梁玥嘉個位前面，一邊望住梁玥嘉將嗰$7放入裙袋，一邊擰開樽蓋，然後直接飲

「做咩？」宋千辰見到楊楠恩一臉愕然咁望住佢便問道

「支嘢玥嘉飲過㗎⋯！」楊楠恩講道

「嗯，我知，佢一定會飲。」宋千辰一啲都唔覺得意外，佢知梁玥嘉一定會開嚟飲一啖先，佢預咗，都唔係第一次，「慣咗。」






IG Link: https://www.instagram.com/nd_cotttoncandy/?hl=zh-tw