［愛情純愛］由嗰一個Kiss開始，我地唔再係青梅竹馬: 03. 心跳

「唧⋯」梁玥嘉唧咗一聲，然後瞪住宋千辰，壓低聲線，「你搞到我個字寫fail咗⋯」

「Sorry～」宋千辰笑道，「咁係咪啫？」

「唔通呢？」梁玥嘉反咗一下白眼，一臉無奈咁講道，「唔係會變啲咩？」

「你嘅初吻比咗我，你應該要興幸係比咗我，唔係比咗其他顏值低嘅人。」宋千辰頹廢咁斜坐喺梳化上面

「你係讚緊自己顏值高？」梁玥嘉笑咗一笑， 「真係多謝晒喎⋯」





「我好失禮你咩宜家？」宋千辰不忿咁問道，「我不知幾好睇，你成日見住我唔覺㗎咩？」

「真係唔覺⋯」梁玥嘉無奈一笑，「成日都對住你，所以冇咩感覺。」

宋千辰其實顏值唔差，只係因為梁玥嘉已經見咗佢好多年，所以唔會特別覺得宋千辰好靚仔之類嘅嘢，但梁玥嘉心中並唔否認宋千辰嘅顏值有番一定程度

梁玥嘉做完功課之後就將啲功課放番入功課File入面，然後企起身，拎起筆袋同功課File

「我番過去放低啲嘢先。」梁玥嘉講完就直接行到去玄關位除低睡拖，換番人字拖，拉開門行出去，仲不忙用門擋頂住門





梁玥嘉行去隔離B室，開門，好快咁行入屋，將啲嘢掉低喺餐枱上，然後連忙行番出去，著番拖鞋，行出去鎖番門，行番去隔離A室

⋯

喺夜晚食完飯之後，梁玥嘉打算再留一陣先走

「嘉嘉，食生果啦！」宋千辰嘅媽媽拎咗一碟切好咗嘅雪梨出嚟放喺茶几上，「食埋生果先番過去啦～」

「好呀～」梁玥嘉拎起牙簽，拮咗一件嚟食





「拮一件比我。」宋千辰坐喺梳化，連起身都懶得起，直接叫梁玥嘉拮比佢

「唔要喎，你自己起身拮啦！懶到死。」梁玥嘉坐喺梳化上面講道，「你咁懶會搵唔到女朋友，將來做你女朋友嗰個就慘。」

「吓？你唔洗擔心我會搵唔到女朋友，反正我會搵到～」宋千辰坐起身，一手搶過梁玥嘉拮住嘅半件雪梨，直接放入口食

「喂呀！你係咪懶到咁呀！」梁玥嘉喺宋千辰嘅手臂上打咗一下，「我唔係擔心你，係擔心你將來嘅女朋友咋！」

「將來先算啦～」宋千辰伸手喺碟上拎咗一件雪梨，「你唔好傷心呀到時～見到我呢個咁高質嘅青梅竹馬搵到女朋友～」

「我唔會傷心囉～」梁玥嘉一臉無奈咁反咗一下白眼，「得你會識到咩？我都會識到男朋友啦！」

食完生果之後，梁玥嘉再坐咗一陣，然後就番去隔離，兩人嘅家都只不過係一牆之隔

翌日朝早，梁玥嘉打開家門嘅同時，宋千辰都喺家中行出嚟，因為兩個人出門口嘅時間都差唔多，所以好多時都會一齊番學；兩人又住喺同一個地方，所以好多時都會一齊放學番屋企，兩個人都已經習以為常，都唔覺得係啲咩出奇嘅事





兩個人行到去升降機口，然後一齊等升降機上嚟，但兩人一直都冇講嘢，只係各自各睇手機，大家都已經熟到唔講嘢都唔會覺得尷尬

宋千辰眼尾一瞄，瞄到梁玥嘉個書包冇閂拉鍊

「嘉嘉，你個書包拉鍊未拉好。」宋千辰提點道，梁玥嘉聽到之後直接就伸手往書包摸一摸，將拉鍊拉番好

兩個人隨即靜咗落嚟，升降機一到，兩個人都行入去，梁玥嘉企喺角落位，宋千辰企喺佢隔離，明明今日同平時一樣，但心裏總覺得有啲唔自在

梁玥嘉將手機塞咗入裙袋，自然地望咗宋千辰一眼，唔知點解一見到宋千辰，佢就會不自覺咁諗起嗰日同宋千辰Kiss咗嘅事，一諗起呢件事，心臟就開始亂跳起嚟，但梁玥嘉冇覺得啲咩

「可能係因為第一次Kiss就比咗佢，所以先會咁啫⋯」梁玥嘉心諗道

升降機一直落，因為係番工番學時間，所以每隔幾層就會停一停，升降機入面嘅人都愈嚟愈多，宋千辰往梁玥嘉嗰邊企近咗啲，少許少許咁企近





當升降機一到咗地面嗰層，人們亦散去，梁玥嘉同宋千辰亦行出升降機

「呀⋯好眼瞓仲係⋯」宋千辰隨口咁開口講道

「琴晚好夜瞓咩？」梁玥嘉亦同平日一樣回應道

「嗯，琴晚我成⋯」宋千辰講到一半之後冇再講落去，只係望住前面，因為佢見到就係佢地嘅正前方，有一個好眼熟嘅女仔，而呢個女仔就係邱凱棠

「做咩講到一半唔講？」仲未知咩事嘅梁玥嘉問道，宋千辰微微抬一抬下巴示意，梁玥嘉便循住宋千辰示意嘅方向望去




IG Link: https://www.instagram.com/nd_cotttoncandy/?hl=zh-tw