誰才是我？誰才是你愛的我？: CH.16 - 迪士尼的約定
整個下午，李洛文都被康哥和萍姐「照肺」。
相信他在公司的日子將進入倒數階段。
四時 ...
「阿風，可唔可以同你傾兩句？」唐夢心走過來問，樣子帶有一點憂傷。
怎麼了？跟去澳洲的事有關嗎？
「咩事？」
「我阿姨，有冇同你講過咩？」
「有，佢話你要去 ...」
「殊 ... 知就得 ...」
「咁 ... 點呢？」
「我今次會走得好急，下個禮拜就飛。」
「點解嘅？」
「我阿爸其實一直係澳洲都係醫病，佢心臟有事，琴晚我返到去，姨丈同我講，阿爸情況變差，叫我飛過去。」
「咁大件事？」
「係，而且我諗我好大機會 ... 唔會再返黎香港 ...」
「下 ...」
聽到這事，不知怎的，我覺得自己很無恥。
看著她想哭而不敢哭的樣子，我感覺，其實愛玩的性格，是裝出來的。
她的心靈，定是很脆弱。
一直以來，是我錯怪了她嗎？
「所以，我想你可以應承我一樣野 ...」
「好，如果我做到，一定做。」
「你可唔可以，將今晚比我，同我過 ...」
「冇問題，你想我陪你飲酒？」這刻，她比較重要，待會撥一通電話給希媛說一下應該沒問題。
「唔係，我想你同我去一個地方 ...」
「邊度？」
「迪士尼 ...」
下班時，我致電希媛。
「希媛 ...」
「嗯？」
「你煮左飯未？」
「未呀。」
「我想講，我岩岩收到個消息，有個朋友屋企發生左啲事，想我今晚陪佢，你唔會嬲我呀可？」
「煮飯仔好死啫，今日唔得咪聽日囉，你陪左朋友先啦，等你返黎。」
「多謝你 ...」
「傻豬黎，小心啲呀！」
「嗯，知道。」
「行得。」我跟唐夢心說。
「嗯 ...」她還是顯得有點糾結。
我們乘地鐵的時間，她一言不發。
她真的很少這樣，她的心理壓力定不少。
去迪士尼，不意外，記得第一次到萍姐的家，她的房間充滿迪士尼的毛公仔，她應該很愛迪士尼，或是迪士尼對她來說有特別意義。
她的本性，應該是個純真女孩。
或許，我真的看得太少。
到了迪士尼大門，她深呼吸一下。
「黎！陪我去玩！」她拉著我的手，直接往飛越太空山。
「過山車 ...」
「你唔係怕呀？」
「唔怕 ...」其實我怕死了：「玩咪玩！」
今天，我會答應你的任何合理條件。
玩了一堆機動遊戲 ...
「夠 ... 夠未 ...」我變得虛弱。
「咁好玩你竟然搞成咁，嘻嘻！」
「笑啦 ... 笑啦 ... 你仲有咩想玩呀？」
「木馬！」
我們走到旋轉木馬。
「咁大個人都玩木馬 ...」
「呢啲叫童真呀，你識咩！」
我沒跟她一起玩，只是旁觀。
的確，騎上木馬後，她真的變了一個小孩。
一個可愛，充滿童真的小孩。
今天的她，很美。
遲來的美 ...
「哈哈，好玩！」
「好玩咪好囉！」
「一陣再玩，就夠鐘。」
「咩夠鐘？」
「你等一陣。」
她拉著我，走到睡公主城堡。
「好快開始 ...」
「咩呀？」
「轟！！！」
是煙花。
雖跟年初二的規模比下去，但第一次在迪士尼看煙花，感覺非常好。
我偷看了一下唐夢心，她正全神貫注的欣賞。
然後，輕輕依偎在我的肩膀。
「阿風 ...」
「嗯？」
「你可唔可以攬下我 ...」
我環抱著她的纖腰，靜靜的把這一刻感覺溫存。
「可唔可以多一個要求？」
「可以。」
她吻向我的唇。
我沒迴避。
因為，這將會是最後一次。
這個吻，維持到煙花結束後一秒，她放開嘴唇。
「阿風 ...」
「嗯？」
「對唔住 ...」她開始流淚。
「傻妹，唔好喊 ...」我輕摸她的秀髮。
「對唔住 ... 真係好對唔住 ...」
「做咩呀？」
「去到而家我先知，其實你好好 ...」
「下？」
「係，我鍾意左你 ... 仲鍾意得你太遲 ...」
「...」
「你以前係好宅，講野又漏口，我的確睇你唔起，但其實我知你心地好好。
我諗你應該好憎我，我都好憎我自己，點解當初唔放多啲時間留意你嘅好。
嗰晚我飲醉，我知係你同阿姨送我返黎，仲同我襟被，我真係知，我仲好想多謝你，但我又死要面，所以一直冇講。」
「...」
「到你突然唔見左，我開始擔心你發生咩事。到你返黎，我真係好開心。
去玩嗰日，我講嗰句我鍾意你，係真心 ...
我見到你開始變，開始受其他女仔歡迎，我好妒忌 ...
我係度諗，如果我一開始對你好啲，你會唔會只係留意我一個，會唔會鍾意我 ...
有邊個女仔，唔想有一個好男仔錫 ...」
「...」
「仲有，李洛文件事，其實你錯有錯著，幫我出左頭 ...
李洛文曾經非禮過我，我一直都好憎佢 ...
佢話就話鍾意我，但其實只係想同我搞野，返工只係識抽我水，所以我見佢打你，我真係好想報警，一來，我心痛你，二來，我想佢永不翻身。
呢件事，無論你有心定無意，你點都係幫左我 ...
你一路以黎，就算幾憎我都好，都為我做咁多野，你係一個好人 ...
就算你而家突然有錢左又好，變到好似好玩得都好，但我知你個心都冇變，都係以前咁好 ...
阿風 ... 對唔住 ...」
原來有這樣的黑幕 ...
「傻妹 ...」
「我好鍾意迪士尼，所以我好想係我走之前，同我自己鍾意嘅人黎一次 ...」
「你想嘅，我同你去埋美國，日本嗰幾個都得 ...」
「阿風，聽我講，今次過去，我真係未必會再返黎，未必再見到你 ...」
「咁我飛黎搵你囉！」
「唔好，經過左咁多野，我已經好攰，過到澳洲，我好想重新開始，你就當我想比個冷靜期自己。」
「嗯 ...」
「應承我 ... 我走左之後，要好好咁過每一日，要搵一個比我更好嘅女仔，過幸福嘅生活。
我知自己事，就算我幾鍾意你都好，我唔會比到幸福你，我亦冇呢個資格。」
「...」
「應承我好冇？」
「嗯 ... 不如你走嗰日，我黎送你機？」
「唔好 ...」
「點解呀？」
「我唔想喊，你黎左，我一定會喊，一定會唔捨得走 ...」
「...」
「風，我永遠都會記得，我人生中，曾經出現過一個咁好嘅男仔 ... 你係我心入面，永遠都會有一個位置 ... 多謝你 ...」
「心 ...」
「公主與白雪都，不需要羨慕，因可跟你在長夜裡擁抱，見阿拉丁，本想說聲坐飛氈卻又不可媲美你待我好 ...」
中環 ...
「唔洗送我啦 ...」她幽幽的說。
「...」
「可唔可以，攬多我最後一次？」
我死死地把她抱著，眼框已濕透。
「傻佬，唔好喊，喊左就唔靚仔 ...」
「唔好笑 ... 我笑唔出 ...」
「但你將來，一定要笑住過，如果唔係你對我唔住嫁！」
「...」
「今晚，好多謝你 ... 呢個我同你嘅美好回憶 ... 我會好好記住 ...」
「我都係 ...」
「咁 ... 我返去啦 ...」
「我地，會唔會再見？」
「有緣，自然會見到，假如我地緣份未了嘅話 ...」
她打開的士門，關上，車子除除離開，遠去，消失 ...
唐夢心，再見 ...