［打鬥/靈幻/鬼怪］《輪迴。道》/《噬魂》我由古惑仔變咗做現代道士: 553《第二季》

大約三十分鐘過後，一炷香的時間便過去了

陳天航他們完成了今天的訓練，回到了屋中

「英叔，搞咩啊？？黑成咁嘅」他們一回到屋中，發現內裏烏燈黑火，所有燈都被關掉了

「咪郁！雙手擺係頭」漆黑中英叔的聲音響起

「咩事啊」眾人迷惘





「你地幫我捉住啊航！」英叔於漆黑裏說

「下？做咩啊？」

「捉住佢！」英叔喝令

「係…..」啊烈他們無奈之下照辦，他們摸黑的尋找陳天航的方向

「做….做咩啊….」陳天航不反抗下被「捉住」了





「燈！凳！」英叔不知從何處找出了一支電筒

強光照射在陳天航的身上

「英叔….你話試啊航就係咁試啊？……」

王奇目瞪口呆的看著英叔

「係啊！你唔覺得咁樣好有氣氛㗎咩？」英叔笑得像小孩拿到新玩具在手一樣





「嗯…係幾有嘅…」王奇也只默默附和

「係呢～等我審下佢先」英叔拿著電筒走近陳天航

「你地押佢過去餐枱！」英叔指示啊烈他們

「英叔你想點啊…..」陳天航心累的看著英叔

「你快啲講！你係咪真嘅𡃁仔！」英叔提著電筒問

「我係啊….」陳天航回答

「好！咁我嚟問你！我叫咩名！」英叔第一條先問簡單的問題

「……英叔」陳天航對英叔反個白眼





「全名啊！」英叔大聲吆喝

「張英！」陳天航也著加大聲浪

「好！啱啦！咁老野叫咩名？！比你揀：張老九、張啊九、張九仔定張九」

「張九！！」

「你玩還玩！唔好攞我個名嚟玩！」這時，九叔的聲音從他的房間傳來

「好！下一條！你之前喂老野返咩工嘅！」

「殮房！」





「你住邊嘅！」

「關門口村！」

「中學讀邊間！」

「象山呂明才！」

「洛兒三圍係幾多！」

「…….」陳天航定格看著英叔

「嗯…….」眾人也用奇異的眼光看着他

「玩下姐～」英叔搲頭笑說





「我連佢係邊個都唔記得！！點會知佢三圍啊！！你係咪玩野！！」陳天航對著英叔怒吼

「嘻嘻～唔好嬲啦𡃁仔～英叔同你玩下咋」英叔嘻皮笑臉的對著陳天航

「……」陳天航無語

「點啊，比我問完一大輪野，記憶有冇恢復啲啊」英叔刻意用電筒照著陳天航的臉

「冇啊….點會有用啊」陳天航無奈至極

英叔時刻留意當電筒的光照到陳天航身上時，他毫無反應，英叔甚至將電筒拉近拉遠，看看是否真的沒效果

結果是，真的沒有





「好啦！今日問完啦！啊奇開燈！」英叔已得到想要的答案，鬧劇落幕

「好……」王奇無奈照做

嗒！嗒！屋內變回燈火通明，眾人都因處身黑暗太長時間而瞇起了眼

「今日差唔多啦，𡃁仔，你地休息下」英叔跟他們說

「奇，出嚟講兩句」然後英叔再走到王奇身旁說

「嗯？哦好啊」王奇跟著英叔走到外面

「我啱啱驗過啦，依個𡃁仔唔係流野」英叔說

「哎啊….英叔唔好玩啦，你咁樣問佢啲白痴問題，傻嘅都識答啦」王奇忍不住反了英叔白眼

「唔好傻啦，你以為我真係痴㗎咩，你睇下」英叔將手上的電筒遞給了王奇

「下？？」王奇接過電筒，反覆看也沒有看出什麼特別

「你睇下個尾啦」英叔戚起眉毛，手指指著電筒的尾部

王奇手一反，就發現原來電筒被英叔做了手腳

「等我啱啱仲以為你真係喺到玩野添….嚇死我」王奇鬆一口氣

其實英叔並非如大家想像中的如此胡鬧，他表面拿著電筒嘻皮笑臉，但實際另一隻手正從後褲袋拿出了一個細小的八卦貼到電筒的手柄尾端