［打鬥/靈幻/鬼怪］《輪迴。道》/《噬魂》我由古惑仔變咗做現代道士: 448《第二季》

「哈哈哈！不堪一擊」卓斌十分自豪的笑著

「喂！兄弟！散啦！！」西狗見勢色不對，就想喊停手下撤退

但他並不知，他的手下都接近全數倒下

「唉！成班廢柴！」西狗就決定自己先跑了

卓斌的手下欲追，卻被卓斌攔住了





「唔洗追，由佢走，等依隻狗返去通知主人都好嘅」

「係！」

西狗逃跑後，回到自己的車上

「你老味啊…..今日咩料啊，個老野咁犀利嘅….」西狗手忙腳亂的驅動汽車引擎

轟！！！汽車高速的駛去





「喂！siri ！打比臣爺！！」

「好，依家打比臣爺」

嘟….嘟嘟….

「咩事啊狗」臣爺接電話

「臣爺！！水叔真係未死啊！佢依家幫緊啊烈嘅「天圖」做野！佢啱啱嚟掃我個場啊！」西狗是致電臣爺告狀的





「冚家剷！得啦！收到！我知點做啦，你自己小心」

嘟……

臣爺很快便掛斷了電話，西狗也緊接著撥通第二個電話

「喂！盡哥！大鑊啦！」第二個是通知莫盡

「咩事？」

「今日我嗰五個手下同人打交完全唔夠打，咁我情急之下就叫咗佢地除咗頂帽」

「唉….咁依家打死人？咁佢地依家戴返頂帽未？」莫盡心想，打死人應該已是最壞的情況

「呃…..似係佢地比人打死多啲，我唔知之後點啊，我啲𡃁全部瞓低曬，我仲唔即刻走咩！」





「你咁講，即係佢地除咗帽都唔夠打？！對方咩人！」莫盡聽到這裏也知道事情不簡單

「條友老野嚟咋，都唔知做咩突然咁猛料，五個打一個都輸比佢」

「咪住！你話佢地打輸之後你就走咗，咁佢地有冇戴返頂帽？！」莫盡這才想起問題

「帽？….唔知喎，我一見佢地輸就走咗啦」西狗還理直氣壯的說

「……，比個地址我，我要過去睇睇」

雖然莫盡平時做盡壞事，但他也不會想事情去到一發不可收拾的程度

「咁….咁我洗唔洗都返去？」西狗怯懦的問





「最好啦！嗰啲係你啲𡃁嚟！」莫盡也沒西狗那麼好氣

「唉….好啦，咁我返轉頭啦…地址轉頭比你」

半小時前，象山，九叔的家裏

「喂！老野！西樓嘅華明話係旺角見到嗰個卓斌！」英叔剛剛收到朋友的電話，通知他卓斌的消息

「有冇確實地址？」九叔問

「有，隨時行得！」英叔回答

「啊靈呢？」九叔不見啊靈在屋內

「妹頭接咗單，出咗去做野，我WhatsApp 咗佢㗎啦，佢搞掂完佢嗰邊道會過嚟」





「咁行！」九叔隨手拿起自己的工具袋便出發

英叔在出發途中拿出電話

「洗唔洗通知埋𡃁仔佢地？」

「嗯…通知埋，比佢地實戰多啲都好」九叔點頭示意

「好，咁我打比佢地」

而旺角現場，卓斌早就把西狗的酒吧掃得破爛不堪，客人全都嚇得雞孩狗走的

「同我再打爛啲！我要佢間酒吧醫返都曬藥費！」卓斌拿出香煙坐在一張高椅上吩咐手下





「係！」被他用陰氣控制的手下全都聽命於他

「嘩嘩嘩，咩事咁熱鬧啊」是英叔他們趕到現場

「邊撚個啊！」卓斌還不知是英叔他們，一句就開罵，但他回頭一看便知道不妙了

「係我地啊～」英叔看著驚慌的卓斌笑說道

「呃….」卓斌看著英叔他們的到來嚇呆了

「做咩啊？唔歡迎我地啊？」英叔擺出得戚的樣子

「郁佢地！！」卓斌指示手下出手

「係！！」手下們收到指示立刻蜂擁而上

「開飯！」英叔拿出一疊黃符，九叔就一如既往的沉默應戰

卓斌就想趁機逃去，但他卻被人攔住了去路

「你….你邊個啊」卓斌本就正處怯懦之時，見有人出手攔住自己就更加怕，而且不知對方是何方神聖