［打鬥/靈幻/鬼怪］《輪迴。道》/《噬魂》我由古惑仔變咗做現代道士: 425《第二季》

「驅魔總會？咁同我地依家有咩分別？」葉夜不太明白

「唔同，依家我地四派係各施各法，冇咩特別事都唔會有消息互通，互相配合」

「而我講嘅驅魔總會，係將四派團結起嚟，有組織咁樣運行」霍鎮海解釋

「點運行？」葉夜再問

「其實就好似我地四派自己做野咁，見到有惡鬼出沒就去處理，不過係香港咁多區，但冇可能一派就處理曬，所以我地應該有組織咁去做」





「例如：我同你係上環見到有一隻黑熾靈，但佢走甩咗，不知去向嘅，咁我地就可以報上去總會，總會再將消息散播出去，咁四派係上環附近嘅人就可以即刻幫手留意下，咁樣遠遠比各派獨自鬥爭成效大好多」

「咁樣聽落去，的確係幾好」葉夜聽得點頭說是

「而且，咁樣就可以避免好多孤軍作戰嘅機會，減少傷亡人數」

「嗯….咁樣都係一件好事」葉夜黯然的點頭

「對唔住，我唔應該比傷亡發生」霍鎮海突然向葉夜道歉，因為他知道葉夜剛剛的傷神是因為東道派的師妹在出任務時死了





「傻啦，無神神講乜鬼對唔住，又唔關你事」葉夜雖然口裏像是沒關係，但心裏卻是難受

「信我，好快，好快我就可以清空惡鬼，冇人會再受傷」霍鎮海說著說著把手搭在葉夜的手上

「信你，我地所有人都信你㗎啦，神力」葉夜冷笑一下然後把手縮開，再站起

葉夜拍一拍褲後就開始下樓梯

「去邊啊」霍鎮海自己也被剛剛搭葉夜的手這動作弄笑了





「肚餓啊，搵啲野食醫下個肚」葉夜沒回頭，自顧自的繼續下樓梯

「咁就啱啦，我都有啲餓，一齊啦」霍鎮海跟上葉夜

「估唔到你都幾老土㗎喎」葉夜嘲笑他

「咩老土啊，我真係肚餓啊」霍鎮海解釋

「你話係就係啦」葉夜笑說

………

幾個月又過去

山上的一片荒地





「嗄….啊！！你唔好嘈啊！！」閻三雙手捂著耳朵在地上打滾

「你唔想變得更強咩」這幾個月內，閻三腦內一直出現一把聲音，把他折磨得心力交瘁

「你收聲啊！！！！」閻三崩潰的瞪大雙眼

「你只係解開我，同我融為一體就可以變得更犀利㗎啦」

「收聲！！！！」閻三站起，對著天大叫

「啊！！！！！」

……..





一小時後，閻三步履蹣跚，面色蒼白的回到北門道觀

「三師兄，你做咩啊？受咗傷？」一個師弟剛好看到閻三回來

「冇事，你做自己野」閻三沒心情應酬他，便簡單回應他，想快快回房休息

「唔係喎師兄，你個樣好唔妥喎」但師弟還是跟著他

「放心，冇事」閻三再次強調沒事

「但…」師弟還是窮追不捨

「我咪話咗冇事囉！！」閻三心情煩躁，一下火起，大聲的呼罵師弟

「呃….」師弟甚少見到閻三這樣發火，被嚇了一跳





「唉…對唔住，我真係冇事，我想返去休息，乖，你去做自己野」閻三說完後便頭也不回的走了


「嘩，霍老大真係好犀利」

「係啊，個次有人見到佢捉鬼，幾秒咋嘛 ！就搞掂咗」

「唔怪得個個都叫霍老大做四力之首啦」

「唔係啊，三師兄都好犀利啊！我就支持三師兄啦」

「係囉！三師兄隻手咩鬼都吸到」

「咩啊！唔好唔記得上次四力登位個日，如果唔係霍老大出手，三師兄都搞唔掂隻花妖啦！」





「咦…..又好似係喎」

這些說話都是自從閻三登上四力後經常聽到的說話，這些話對於閻三來說都是擊潰他內在的自信

而自從那次在魂鬥房碰到了那塊妖鏡後，妖鏡的妖氣跟閻三體內的花妖產生了奇妙的連結

這令閻三受到不少折磨，尤其在精神上，不斷的有一把聲音在他的腦海裏迴盪着，分每秒都在誘惑他解開妖鏡的封印，而花妖就勾起他吸取妖鏡內的妖

閻三只能用意志力不斷壓抑着這個慾望

而且事情還禍不單行

上次徐峰得到霍鎮海的點頭讓他帶隊出征後，好快便出發

那一次行動，他獲得了空前成功，在隊員完全沒受傷的情況下把薄扶林村出沒的殭屍全數解決

原來是當地的一個學術之士為其中一戶居民作法，把死去的丈夫放在家中，並把那丈夫的靈魂強行留在屍體中，令屍體不腐

最後卻不幸屍變，咬傷了幾個村民，才導致有殭屍出沒這事

這次行動成功了後，徐峰好快又申請了下一次行動，霍鎮海見徐峰處理得不錯，所以也開了綠燈，讓他再試試

但就是這一試就出事了