［打鬥/靈幻/鬼怪］《輪迴。道》/《噬魂》我由古惑仔變咗做現代道士: 415《第二季》
而場上看著葉夜目不轉睛的並不止霍鎮海一人，還有場上的張三
他們二人都同時被葉夜的光芒吸引住
「好啦好啦～大家都睇到啦！！我師姐好輕鬆就搞掂咗兩個大隻佬啦！！之後呢….」
「咪住，係咪唔記得咗我」張英舉起前臂
「原來你仲想挑戰㗎？！我以為睇完我師姐啱啱嘅表現，你會放棄添～」葉童笑說
「唔試過唔知啊嘛～交流下姐」
「師姐你無問題？」葉童問葉夜
「無問題，隨時奉陪～」葉夜欣然點頭
「咁就太好啦～」張英微微笑道
說後，張英把衣袖拉高，擺出一個吊馬步，右手握拳放在腰側間，左手擺成掌的放在面前
「嗯？！依個同啱啱嗰兩個好唔同」霍鎮海看向張英
「唔同？我唔識分啊」莫峰入世未深，不像霍鎮海般懂得看穿人
「你仲細，慢慢嚟」霍鎮海拍一拍莫峰的肩膀
「準備好未？」張英問葉夜
「嚟啦」葉夜回答，然後她徑直的走到張英面前，擺出跟他一樣的動作，左手碰著左手，一動不動的，你眼看我眼
「點解佢地會咁擺架，一直都唔郁？」莫峰懵懂的問霍鎮海
「高手過招就會咁做，佢地將手貼住放，咁就可以感受到大家身體嘅節奏，其中一邊稍有分心就會分勝負」霍鎮海為莫峰解釋
「原來仲有咁樣㗎」霍鎮海就像為莫峰打開新世界大門一樣
扑卜….扑卜
張英和葉夜還在盯著對方，彷彿連對方的心跳都聽到一樣
此時，一滴汗從張英的額前流到他的眼睛，他眼睛眨一眨，分心了！！
葉夜看準機會出手！
葉夜先沉肘，後標手，手擺成刁手前刺，張英也意識到自己露出了破綻，馬上後退一步並側身躲開，但衣服也是被葉夜劃破
張英避退後，也回以一腳高踢，葉夜舉起手去擋，張英趁機提掌揮向葉夜的腹部
葉夜聰明，她起膝格住了張英的掌，然後反送張英一掌，正中胸膛
嘭！！！十分響亮的擊打聲，張英中掌後整個人凌空飛出十數米外，差點站不住腳，用一手扶著地面
「睇嚟交流完啦～」葉夜收掌，站立
「哈…係啊，的確夠曬資格」張英嘴角流出淡淡血絲
「多謝指教，你同佢地好唔同」葉夜禮貌的拱手鞠躬
「係唔同啲㗎…咳咳..你睇下你膊頭」張英雖被打傷，但他說著說著還是得意的笑了
葉夜這時一看，才發現自己的肩膀上被貼上了一貼極細的爆破符，不認真看都不會發現，而符咒已被畫花，所以並不會爆炸
「噢….」葉夜看呆了
「我輸咗～」張英說畢便自己跳下了台，回到北門派的弟子之中
張英走到張九身旁
「啊…..好撚痛啊….係台上面又唔可以叫出嚟咁冇面喎」張英不斷揉搓自己的胸口
「抵死，自己衝上台」張九不多看張英一眼，只專注台上
霍鎮海偷偷為葉夜撕走了爆破符
「當冇事發生，特登整張咁細嘅就係想比落台階你」他在葉夜的身後輕聲的說
「嗯…」葉夜知道剛剛那一場短暫的戰鬥是有點技不如人了
「好啦～師姐已經成功擊退三派嘅挑戰者啦～咁我地就請下一位四力接受挑戰啦」
下一個要接受挑戰的是霍鎮海
「你師父為你取號神力，咁你覺得自己係咪真係咁叻呢？～」葉童居然這樣直接的問
「我從來自己唔覺得自己叻，只係比一般人專注」霍鎮海答了又好像沒回答
「呃…」這樣令口才不俗的葉童也搭不上嘴
「咳咳」四大掌門的方向傳來兩聲乾咳聲
眾弟子都紛紛把頭轉過去，出聲的正是霍鎮海的師父，西樓派掌門——王柱
「只要！有任何人認為自己能夠擊敗霍鎮海嘅都可以上台，幾多人同時上都得」
王柱此話一出，台上已經湧上一大幫人，為數起碼過百
葉夜等人只好直接退到台下，不然一定會波及無辜
「佢師父咁樣跣佢？」張英在台下笑說看戲
「成百人，點打」張九也認為霍鎮海無力招架
「百幾人，一人一啖口水都浸死你啦」
「一人一拳都散曬啦！！」
「圍攻佢！！」
但霍鎮海一點緊張的情緒都沒有，他還氣定神閒的站在原地
「咁淡定？！郁佢！」
霍鎮海低身躲過一個迎面撲來的人
正當我們以為大混戰要正式開始的時候….
霍鎮海吸入一口大氣，運氣提掌
砰！！他一掌擊在地上
一股淡白色的氣橫掃整個台面….一秒間，台面上的人全數倒下，只是一掌…
「呃……」台下的張英看到呆了
「有…少少誇張」張九也震驚口窒了
「真係…少少咩？」張英問
台下當然也是一片嘩然
「嘩…」
「真係好勁….」
高處的四派掌門也在討論
「柱兄….你依個徒弟，不可多得啊」張帝不敢相信
「你點教出嚟….」莫戰同樣驚嘆不已
「你地過獎啦，其實我都冇教過佢啲咩，係佢天生聰敏，悟性極高」王柱用手順著自己的鬍子說
「佢同葉夜都相當匹配～」葉紫點頭說道
「紫兒，你有興趣撮合佢地？」王柱笑道
「唔需要我地推波助瀾～佢地要一齊，自然會一齊」葉紫搖頭
說回台面上，被打倒的人都試趣的自行下台，相信他們心裏都寫已著一個服字
「各位，唔好意思！」霍鎮海向眾人致歉
「霍鎮海！霍鎮海！！」
台下的人由質疑，到現在轉變成支持，霍鎮海只用了一秒的時間