［打鬥/靈幻/鬼怪］《輪迴。道》/《噬魂》我由古惑仔變咗做現代道士: 413《第二季》

葉夜從人群中走出，一步一步的走上大台

「師姐，同大家講兩句」葉童將手上的另一支咪高峰遞給葉夜

「大家好，我係東道派嘅葉夜，多謝師父推選我，等我有幸成為四力嘅一員，亦都多謝三派嘅掌門、多謝大家，我會盡力做好四力嘅責任」葉夜在台上輕輕鞠躬

葉夜身形嬌小，臉龐上帶有幾分秀氣，看上去絕不像能登上四力的人

「葉夜！葉夜！葉夜！！」台下各派都叫喊著葉夜的名字





「好啦，師姐啊～你介唔介意同大家講下，你登上四力之後，你嘅稱號會係咩？」葉童問

「各位掌門已經為我地四個分別定咗，我係怪力——葉夜，其他人就留返比佢地自己講啦～」

「咦，師姐，以我所知四力係可以用返自己本身嘅姓氏，點解你唔用返自己嘅祖姓嘅？」

「因為我無父無母，所以東道派嘅各位就係我嘅屋企人，我以後都會姓葉」

「師姐！！！」





「你好型啊！」

台下東道派的女弟子為葉夜歡呼

「好啦！！咁我就請下一位新四力上嚟，下一位有請西樓派嘅王鎮海！！」

王鎮海從台下步上

「師兄，你上次係咪就係講佢？」張九在台下看著台上的王鎮海





「係啊！就係佢啦，王鎮海」張英不斷點頭，眼睛沒離開過台上

這個王鎮海身材不算魁梧，也不高，但臉上卻盡是霸氣，原因應該是他的右邊臉上有一條深長的疤痕，由上額直到下巴，什至劃過了右眼，他右眼更是呈濁白色的，一看便知是有經歷的人

「你好啊，交比你介紹下自己～」葉童一樣把咪高峰遞向王鎮海

「嗯…大家好，我係西樓嘅王鎮海，我唔係好識講野，多謝大家」王鎮海低沉的嗓音，帶著幾分磁性

「咁不如同大家講下你嘅稱號啦」葉童為王鎮海說出問題

「我以後會叫做；神力——霍鎮海」

霍，就是王鎮海的祖姓

「下一個！係南陽派嘅莫峰！！」







「下？？」

「嘩！！」

「細路係咪行錯路啊？」

台下的莫峰走上台時全場都傳出嘩然的聲音，皆因走上台的是一個十多歲的懵懂少年

「哦～你就係莫峰？」台上的葉童也愣了一下

「係…係啊」莫峰顯得有點緊張





「不如你為大家介紹下自己啊～我諗台下嘅大家都好有興趣認識下你」

「大家好，我…我係南陽派嘅莫峰，師幫我改號：靈力——徐峰，擅長嘅武器係雙彎刀」莫峰靦腆的說

「咁今年幾多歲呢？～」葉童為台下的各位問出想問的問題

「我…今年十四歲」

「嘩…」

「十四？！」

「咪仲細過我個仔？！」

「我知大家對我嘅年紀有好多爭議…但我會用能力話比大家聽，我能夠勝任四力依個位」莫峰向台下的鞠躬





「好啦好啦～我知台下有好多聲音，但等我地請埋最後一位四力成員上嚟先～」

「最後一個～係北門派嘅！！張三！！！」

「張三！張三！張三！！」北門派的弟子為張三吶喊

張三步上台時也向台下的師兄弟揮手

「大家好，我係北門嘅張三，請大家多多指教」

「或者你又同大家講下你有咩強項」

「我嘅強項就係捉鬼」張三平淡的說出





的確，他只是說他認為的事實，但台下的人好像有點意見

「嘩，後生仔咁大口氣」

「我捉咗幾十年鬼，都未夠膽咁講」

「大家稍安毋躁，我並唔係囂張，我只係講出我認爲嘅事實出嚟」張三舉高雙手嘗嘗試安撫台下的反應

「講完又話唔係，唔得喎」

「牙擦擦，依家又怯啦」

「四個都唔知信唔信得過」

「點做四力啊！！」

「既然大家唔止懷疑我嘅能力，我冇得唔出聲，不如咁啦，有邊位真係懷疑我地而又想試下我地能力嘅師兄，不如趁依家即管上台同我地交流下」張三先作主張的作出決定

身為主持人的葉童馬上看向坐得高高的四派掌門

四派掌門交頭接耳談論一番，隨後向葉童點了點頭示意讓事情繼續下去

「佢地坐唔坐得穩就睇佢地自己嘅造化啦～」北門掌門——張帝笑說

「我睇好佢地嘅，長江後浪推前浪，一代新人換舊人」東道掌門——葉紫同樣笑說

「以後就係依幾個後生嘅世界㗎啦」西樓的掌門——王柱說

「我地幾個老野好快就要退落嚟㗎啦」南陽掌門——莫戰慨嘆道

葉童收到各掌門的指示後，對著觀眾說

「好啊～既然大家都好似對新上任嘅四力有少少意見，咁不如我就請幾位上嚟同新四力交流下啦～」