［打鬥/靈幻/鬼怪］《輪迴。道》/《噬魂》我由古惑仔變咗做現代道士: 406《第二季》

「咁九叔佢地呢」夢晞口裏說不聽，但都聽進心裏

「九叔佢地唔同，佢地係以義務形式去幫公會做野，公會有分兩類任務：一類係好似我咁，算係公會嘅員工，每日都幫公會出勤驅魔；第二類就好似九叔佢地咁，聽到公會嘅重要公告先出手或者係知道有事發生就通報公會，等公會再同我地講」

「咁你啊爸啊媽呢？佢地知唔知依件事？」

「嗯…..我啊爸都係西樓派嘅人，就係因為佢我先會學道術」

「嗄….犀利啊王奇…咁大件事你都可以瞞我咁耐，我真係蠢」夢晞想站起身





「老婆啊…唔好嬲啦，我當初唔講係因為驚你接受唔到…..」王奇馬上把夢晞拉住

「咁你覺得依家比我知，我又會接受到咩？」夢晞擺開王奇的手離開了病房

「唉….呢劑大鑊啦…」餘下垂頭喪氣的王奇

夢晞離開時經過我的身邊，我捉住了她

「你就咁走咗去啊？唔理佢？唔好嬲佢啦」





「你仲好意思幫人求情？我有講過我唔嬲你咩？」夢晞同樣揈開我的手，然後真的離去了

「……」

「嘩，啊航哥，依下有少少柒」啊仁這時還在我旁補多一刀

「收皮啦你」我推開他，走進王奇的病房，八掛的啊仁當然也跟著在後

「你點啊？」我站到王奇床前





「冇咩事嘅，休息一晚，聽日應該可以出院」王奇看一看手臂的傷

「咁夢晞….」我尷尬的問出

「唉，出咗院先算啦，我老婆份人我好清楚嘅，佢一係唔嬲，一嬲就點氹都冇用，要等佢啖氣落咗先」王奇無奈搖頭的說

「咁就真係幫唔到你啦」我也不禁搖頭

「估唔到呂醫生平時份人嘻嘻哈哈咁，原來都會發脾氣」啊仁突然搭一句

「哈…佢啲脾氣，你估都估唔到啊」看著王奇的表情就知道他的無奈

「嗯，果然我選擇單身係啱」啊仁蹺起雙手，自己在點頭

「你慳啲啦，你唔係選擇單身，你係被單身姐」我譏諷他說





王奇在旁聽到我們的對話偷偷的笑了

「你睇下你，係到講啲咁嘅大話，搞到人地都笑啦」啊仁死撐著

「哈，你地平時都係咁相處㗎？」王奇問我們

「係啊，玩下玩下又一日」啊仁回答

「嗯…真係好」王奇默默點頭

「做咩啊？突然咁問」我問他







「冇….我由細到大都冇乜同啲同年齡嘅人相處過，所以未試過好似你地咁同朋友相處」

「下？咁大個人都冇朋友？」啊仁衝口而出

「喂，仁」我喝也喝不住

「sorry 啊，嘻….口快快」啊仁尷尬的道歉

「唔緊要，係啊 ，我由細到大都冇朋友，我老管得我好嚴，細細個就開始訓練我，話我要承繼佢後生嘅意志，斬妖除魔….所以我中學都未讀完就已經全職幫公會做野」

「…..咁即係變相抺殺咗你嘅人生」我說

「我都有咁諗過，但當我見到我老豆咁樣之後，我就覺得我應該要咁做」王奇說這句話時，神情明顯是沉重

「唔怕啦！以後有我地啊嘛！同我地做朋友就好好玩㗎啦」啊仁拍一拍自己胸口





「呃…好啊」王奇愣了一下才緩緩點頭

「係啊，既然你冇乜野，我地返去幫九叔手先，我地聽日先一齊嚟接你出院」

原本我還想再八卦一下王奇父親是什麼情況，但被啊仁一句拉遠了話題，我就不好意思再問下去

「好，你地行先」

就這樣，我們回到殮房，幫九叔收拾冷藏室的殘局，亦跟他交代了王奇的情況

當天晚上

「嘩～係咪咁誇張㗎？」洛兒質疑我說的話





「真係㗎～打到飛天，九叔佢地幾個人都唔夠隻野打啊」

我將今天的事都告訴了洛兒，而我跟九叔學法的事也一早告之，反正也瞞不了，與其要不斷想藉口隱瞞真相，倒不如一早說清楚

之不過，洛兒到現在也不是盡我說的話，總覺得我是把話說得誇張

「都唔知係唔係嘅～成日都講到咁誇張」

「你又唔信我啦」我裝作可憐的語氣

「得啦得啦～信你啦傻佬」

「你係信先好啊，唔好到時又話我成日講大話啊～」

「知啦～不過呢，肥仔啊」

洛兒這一句不過，把我嚇得不輕，多數也是吵架的開場白

「做咩啊？」我問她

「你覺唔覺得自己變咗好多啊？」洛兒語氣變得認真

「下….我…我變咗咩啊？」我口窒窒的問

「跟九叔做野之後，個人變得…成熟咗～有擔帶咗～唔似以前咁嘻皮笑臉」洛兒由沉重的語氣突然轉成輕盈

「原來係咁咋嘛～你想嚇死我咩….」