【愛情】【冒險】【穿越】【友誼】【喪屍】《三天之後，遊戲開始》: CH.16(2)【瘋狂】

「我都想信係第一種，但係聽完個電話，就算另一頭嘅人不幸遭到毒手，都唔會有咁嘅反應，正常人都會係乖乖地大喊，搞到水浸，可能嚴重啲最多咪自殘？除非條友有反社會人格，或者突然之間有咗創傷壓力症候群，更加冇可能嘅係突然有咩思覺失調，搞到個人癡癡地。

就算真係有呢啲可能性，咁你話我知，點解突然之間會咁打得先？

冇理由呢啲病會加強戰鬥力架，講笑咩大佬。點講都係第二點先行得通。」十三也跟着理性分析。

「你地講得啱。咁咪即係話依家打電話好危險？

同埋呢四個人，我驚佢地會癲起上嚟六親不認，你地會點處理。





唔好同我講隊冧佢地，如果我仲係我，我一日都唔會殺自己人。」我還是不同意殺戮，還要是自己人。

「再觀察下先，可能之後會有新情況。」阿餅也表現出敵不動我不動的姿態。

「冇問題啊我，不過要辛苦啲睇實佢地啦，如果唔係可能會好大件事都唔定。」十三沒有意見。

「頭先，最後個人咪話你同十三係the last hope嘅？

既然未知嘅勢力控制佢地去傳訊息俾你地，即係話其實你都可以主動去搵佢地，而且係透過大家唔可以再用嘅途徑去進行探索。





換句說話講，你地可以用電話去作試探先。聽語氣同埋個勢，依家對方對你地兩個持友好態度，但對大家嚟講，只不過係俾人利用嘅工具。

總之，我會叫大家唔好用電話聯絡任何人住，如果唔係一定會用出火。」阿餅的智商在線。

講完，我地就安排原有駐守嘅同學繼續留守，並且加派幾人。

風平浪靜，係暴風雨來臨嘅前夕。

—————
此時，遠處有一個人喺度偷拍三人。佢打住自己嘅如意算盤，得意到出汁。「哈哈，今次仲唔俾我玩謝你地？」





—————
「Hey，估下我係邊個？」我在女神背後故弄玄虛。

「唔好玩啦，阿M。咦？點解你又成身汗味架？好臭啊！」女神嫌棄我了，只因為不知何時跑出來的汗臭味。

「咦。係喎，等我頭先仲得登靜雞雞爬上嚟添，俾我啲汗味出賣咗。咁我等陣再嚟搵你，順便帶埋嘢食俾你啦。」我的計劃失敗了！

「好啊，等你啊，快啲啦！」女神笑了。

簡單的清潔過後，我便帶着清新的檸檬味回歸了。

「哇，你個頭，好型喎，點梳架？」

「頭先隨意執咗兩下咋，唔好理我個頭啦，快啲啦，我攞咗嘢食。」





「我落嚟啦咁。」

「係你最鍾意嘅魚蛋，同埋蛋黃醬薯片啊！

仲有最最最好食嘅朱古力啊！

不過，你唔準食朱古力，我唔想見到肥豬仔喺我面前。

食太多小心個肚腩突曬出嚟跑唔郁啊！」我取笑她。

「衰嘢啊，攞得嚟又叫我唔好食，朱古力咁好食點可以唔食架！

食一件少一件啊，肥少少唔怕啦！





你咪又係一樣，成日都食朱古力，因住變大肥佬，你俾感染者捉住咗我唔會救你架，我拖你唔郁啊！肥佬！」

她反說我是「肥佬」，但她又何嘗不是「肥妹」呢？