【愛情】【冒險】【穿越】【友誼】【喪屍】《三天之後，遊戲開始》: CH.8【想回到過去】

5分鐘後⋯

【醫院現場】

「病人情況唔好，需要立即進行手術。」一個姓張嘅醫生好急咁講，後面兩個字，好矇，完全睇唔清楚。

不過原來睇住自己肉身嘅感覺係咁。

真係好特別。





「嗚⋯嗚⋯乖仔啊！唔好走啊！」該死的，係老媽子啊！

唔好喊啦。

一切都係意外。

眨吓眼就冇事架啦。

「嘟嘟嘟嘟嘟嘟嘟嘟———嘟————」
儀器發出咗無盡嘅聲響。





「嚟唔切啦！即刻再次進行急救！」張醫生非常之急。

「呢位女士，麻煩你出一出去先啦。醫生做嘢。」呢位姓陳嘅姑娘同媽子講。

「吓，我想陪阿仔過埋呢啲時光啊！醫生俾我留低啦，好嗎？」
點解媽子會咁講嘢？佢即係覺得我一定會失救？
定係太過緊張得滯搞到已經語無倫次？

都唔重要，反正睇住媽子咁嘅樣都唔不忍直視。





俾佢出去抖抖都係好啲。

「太太，唔好意思啊！真係唔可以啊！醫生要萬分注意你仔仔嘅情況啊！」

「知道你好緊張，但係你出去嘅話就一定可以幫到醫生減低佢壓力。快啲啦，你仔仔就快頂唔到啦。」

「好啊好啊！加油啊阿仔，唔好放棄。」

聽到最後一句，我都已經頂唔順。

自己縮埋一角，都係唔夠。

我大步流星，跑出咗醫院範圍。





咪住先，呢間咩醫院。

門口大大個招牌寫住。【凌晨醫院】

吓？乜鬼嘢？

凌晨醫院？聽都冇聽過。

呢間嘢真係喺香港？

怪怪地咁。

算數，都係趁依家仲有唔知幾多時間，周圍行下算數。

走出醫院範圍，係熟悉而陌生嘅地方。





香港—觀塘。
身後嘅醫院名稱已經靜悄悄咁改變緊。
【聯合醫院】

我卻又懵然不知。

「吓。點解會去咗呢度。」我自言自語，內心充滿咗一萬個問號。

「唔好浪費時間。」腦海突然傳嚟一把聲音。

係要提醒我嘅聲音。

嗯，明白啦。





多得呢一把聲，我先搞清楚自己當下最緊急嘅事。

係要搵返「昔日」。

這校園，這班房，

這走廊，這禮堂。

這街角，這小巷。

這小屋，這房間。

都成為咗我依家最想搵返嘅「昔日」。

我唔想一切回憶，都幻化為泡影。





坐上駛向學校嘅巴士，心裏面慨嘆住，

世間萬物皆有主宰。

世界唔會為你停止，亦都唔會為你重啟。

哈哈。

但係我唔信邪架啵！

思考總係最浪費時間嘅一件事，

諗諗下，就已經到咗25分鐘車程外嘅小學。

回憶總是美好的。

但人唔可能永遠停留喺回憶之中。

返到去熟悉嘅環境，呢度係我充滿住歡樂回憶嘅地方。

我穿過厚厚嘅牆，進入校園嘅範圍。

燈冇開，門又閂晒，咁即係話冇人啦。

好似唔再重要，反正而家又冇人見到我。

行到嚟呢度，昔日嘅回憶已經慢慢返緊嚟。

我望住眼前嘅6A班房，真係好鬼懷念。

一桌一椅，依然熟悉。

行到自己張枱，枱面上用鉛筆寫上嘅「天才tensai」。

不禁諗起自己當時有幾咁天真。