【愛情】【冒險】【穿越】【友誼】【喪屍】《三天之後，遊戲開始》: 序【二】

「估唔到，你係啲咁嘅人。我睇錯你啦。」

我好努力想去解釋，但係把口冇辦法講出任何一個字。

「你自己好好反省，我唔會出現係你眼前，直至你完完全全明白自己發生咗咩事，出咗咩問題。」

點解？點解連你，都要離開我。

喺遠處，我見到一張陌生嘅面孔。





佢默默企喺一邊，半遮半掩住自己。

連帽衫嘅大尺寸，都遮掩唔到佢頂帽下嘅奸笑。

「你係邊個！快啲出嚟，面對我！唔好喺一二邊搞埋曬啲下流手段！」

佢知道我發現佢了。

玩命狂奔！





「你個人渣！咪撚走啊！」我歇斯底里。

我用盡全力，向佢逃跑嘅方向追趕。

距離越來越近，絕對唔可以比佢得逞！

50米。
40米。
30米。
20米。




10米。

GOTCHA！

「你係邊個！好搞唔搞做乜搞我！接受我嘅制裁啦！」

我一拳西埋去。

「撒旦重擊！」

佢一隻手擋住咗我嘅攻擊。

並且向我進行下一波嘅攻勢。

「頂你個肺！打我？」





佢還拖，一下一下重擊打向我嘅心口。

一下，向左走。

壓力隨之而生。

第二下，向右走。

啱啱好閃避過去，我立即還擊，向佢嘅腹部位置一拳揮去。

被格檔。

第三下，向左走向右走。





「嗡—嗡—」

風一般嘅速度，基本上一個普通嘅書生唔會跟得上佢嘅拳速，仲有力度就好似要謀殺一樣。

精煉嘅技術，令我有一絲嘅不安。

每一下嘅攻擊，都拳拳到肉，下下入骨。

拳頭衝擊過來嘅一瞬之間，我聽到嘅，唔係凝靜咗嘅世界之聲。

而係拳頭同空氣產生摩擦嘅嚯嚯聲。

我地展開嘅唔係械鬥，而係考驗自身體術嘅肉搏。

左勾拳。





昇龍拳。

我嘗試用番街霸教我嘅招數嚟應戰。

去啦！

我使出左勾拳，向佢嘅面門發起攻擊。

「啊！」叫出聲嘅唔係我，而係呢個眼前嘅人。

我嘅拳頭，正面撞上咗佢手臂肌肉。

佢發出慘叫聲，好似佢嘅肌肉比我活生生咁打散咗。





只係剩低，我一雙手打出嘅一個凹位。

「你個⋯你個衰人。做咩要打我，做咩要打咁大力⋯」

嗯？

唔係你喺一邊鬼鬼鼠鼠咁樣陰陰嘴笑，我使追上嚟？

你唔係外來者，我都唔會想理你。

係喎，好似有啲嘢怪怪地。

把聲好熟。

「你係邊個。」

我打完一套攻勢後已經好明顯佔咗上風。

恃住個勢，我一下衝上前，揭開佢面上嘅秘密。

佢非常驚恐，好似唔想我知道裝扮後嘅佢。

冇理到我嘅提問，佢就繼續用力掙脫，向更加遠嘅方向逃跑。

「仲唔比我捉返你？」我稍稍加速，就好順利咁捉到佢。

我打開佢嘅連衣帽。

「係你？」眼前出現咗一個熟悉嘅樣。