我娶左個台妹做我老婆啊！: Chapter 35

「衰人？」嘉欣問。

「做咩？」我話。

「你到時去你兄弟既婚禮，打算點著啊？」嘉欣問。

「冇啊，都係著返老西咋！Samuel佢話因為太趕既關係，冇幫我地啲兄弟做衫啊！」我話。

「咁⋯⋯我要點著啊？」嘉欣問我，同時又特登用膊頭撞我。





「呢個呢⋯⋯到時再講啦！」我好曖昧咁講。

我地講完，又係要繼續Duty。至於嘉欣到時用咩身份陪我去呢⋯⋯嘻嘻。

時間過得好快，話咁快就到左我既好兄弟Samuel同Rosita結婚前一晚，今次為左呢位由細陪我由細玩到大、由乖玩到壞既好兄弟既人生大事，我就捨命陪君子。專登叫Jeff幫我調Shift，同時嘉欣係跟我既關係，所以佢啲Shift就因為我而調動。

呢一日，我地返早Shift，收工後換返便服去停車場攞返架FD2，見而家呢個鐘數出返去都唔算多車，不如今日就比嘉欣個傻妹揸下車啦。反正佢都已經攞左香港車牌，我就做佢第一個男乘客。

我就叫嘉欣打開右手，就比左條FD2車匙佢。





「比我做司機？」嘉欣驚奇地問。

「咁架車你都有份架嘛，有一半既業權係屬於你既！」我話。

「真架？Yeah！」嘉欣好開心咁講，然後就抱住我。

「小心啲揸就得啦！慢慢黎！唔好快！睇清楚先轉線！」我話。

講完我叫嘉欣坐司機位，我就坐左乘客位。買左呢架車都差唔多有一個月，平時都係我揸車，都冇機會坐乘客位。但今次因為係嘉欣揸車會係點既呢？好期待啊。希望佢仍然記得香港既道路行車方向啦！





「我地去邊啊？返屋企？？」嘉欣問。

「去深井！知點行？」我話。

「係咪都係行返屋企個條路啊。」嘉欣問。

「係呀準備好未啊？」我問。

「準備好啦。」嘉欣話。

嘉欣講完之後就好純熟地調校好個Seat位、倒後鏡、側鏡。我諗嘉欣咁純熟因為大家都係揸Civic。之後，嘉欣就踩咗極力子，入咗一波著車，點知⋯⋯架車向前Chok左一下。

「哈哈死咗火添。sorry呀！好耐冇揸棍波車。」嘉欣微笑。

「唔緊要啦你試多次啦，記得要慢慢放個極力子。」我話。





嘉欣就照足我嘅吩咐去做，慢慢咁樣放返極力子先鬆手制，今次終於好順利起到步，出到停車場。

我知道嘉欣今次係第一次係香港揸車，同佢之前喺台灣揸車嘅道路方向完全相反，我就叫佢一開始就慢慢揸，以及遵守道路規則，留意路面情況。

出咗停車場之後，為咗等佢熟習下香港嘅行車方向，我就叫佢喺機場島同港珠澳大橋嗰啲車流量比較少嘅路段係咁兜圈，同時想佢去摸熟下FD2既操作。

話時話，嘉欣手車其實冇我想像中咁差，雖然一開始都係慢慢行，但勝在佢揸得好穩定，會遵守交通規則，留意路面情況先會轉線，唔會好似其他女仔咁樣揸車會好騰雞。

過咗一陣，嘉欣開始對我架FD2上手，知道咩時候要用咩波段，車速維持係正常嘅水平，坐嘉欣車基本上會好安全，可以好放心將架車交俾佢揸。只能話女人揸棍波車，特別有氣質。所以大家唔好睇小女仔揸車呀，係可以好勁㗎。我諗除咗媽咪之外，佢係我見過咁多個女仔之中，駕駛技術係最好嘅一個。

「我揸成點啊？」嘉欣問。

「幾好喎、又識留意路面情況，遵守交通規則，又揸得得好穩陣！」我話。





「你哄我架係咪啊？」嘉欣問。

「真心㗎！你係我見過咁多個女仔之中，駕駛技術係最好嘅一個！」我話。

「多謝你呀！」嘉欣甜笑。

「好，我哋熱身完，而家就要行青馬大橋啦！」我話。

「知道啦！」嘉欣話。

嘉欣聽完我講，就揸車行返出去北大嶼山公路同青馬大橋。而呢條路基本上車速可以去到每小時80公里至100公里不等，我就叫嘉欣可以揸快少少。留意番揸快少少嘅意思即係叫佢行返安全車速，唔係叫佢爆Tec。

見差唔多係時候要轉線，我就叫嘉欣打咗燈行最左線，然後就轉入去汀九橋同屯門公路落深井，去到Samuel屋企樓下就停低。

「欣，依家要睇你泊車啦。」我話。





「知道啦，放心交比我啦。」嘉欣話。

然後我就落咗車，睇吓嘉欣泊位泊成點。見到佢竟然可以一take過，仲要泊得好整齊，完全唔會出界，基本上同其他車、車位嘅劃線平行，我就知其實我對佢嘅擔心係多餘既。

「我今次考試合唔合格呢？」嘉欣問。

「唔錯呀，如果100分滿分，我俾你120分。」我話。

「另外嗰20分係咩分啊？」嘉欣問。

「嗰20分係我對你嘅⋯⋯特別獎勵。」我話。

「哈哈哈！我哋係咪去Samuel屋企呀？」嘉欣問。





「係呀！行啦我哋！」我話。

「嗯！」嘉欣回應我。