我娶左個台妹做我老婆啊！: Chapter 33

跟住落黎呢一排，我同嘉欣都係一齊返工放工，而放假都係一齊做Gym、跑步、打機、遊車河，或者行下街街約會下。基本上早、午、晚三餐都係同我一齊食。而爹地媽咪真係好錫嘉欣，當嘉欣視如己出，係佢地心目中既掌上明珠。搞到我係屋企既地位眨到最低。而我同嘉欣既關係一都係好Sweet，對住我仍然笑臉迎人。只係有時會對我打罵，但大多數都會嗲住我，好似嘉欣咁好既女仔，我會好好珍惜。

值得一讚既係，嘉欣做野真係愈黎愈出色，基本上唔使一個星期已經熟晒啲我地部門既Standard of Procedure。另外，佢基本上已經同我地啲同事、「赤鱲角同學會」既兄弟姊妹關係愈黎愈Close，係同事眼中好受歡迎。當然，啲同事都識Do，知道嘉欣係我既好朋友就自然地錫住嘉欣啦！嘉欣係工作期間除左細心了解到機場既每一個Detail位，做下功課之外，同時，佢都會向我地啲上級、同事作Sharing，將係「桃園公司」既工作經驗帶黎「赤鱲角公司」，睇下有冇啲咩攞黎做參考去改善。

呢一日，我同嘉欣返夜更。當我地揸緊車返工嗰陣，Samuel就Wtsapp我。

「兄弟，今晚返咩更啊？」Samuel話。

「返夜啊，而家就到機場。你今晚飛邊啊？」我話。





「你過黎國泰城搵我先，有野要比你啊！」Samuel話。

「咩黎架？神神秘秘。」我話。

我就揸架車轉去國泰城，好彩嗰邊有得可以停一陣，過左一陣，Samuel就同佢空姐女友Rosita出左黎，見到佢地兩個春光滿面咁樣，我就知佢肯定有開心事要Share。為左方便交談，我就叫嘉欣係架車到等我。自己就落車同Samuel Up一陣。

「喂，你地唔使飛咩？」我問。

「我地岩岩齊齊飛完轉Melborne，而家準備返屋企。又車住嘉欣呢？」Samuel話。





「係啊！有咩要比我啊？」我問。

「嗱，紅色炸彈。」Rosita話。

「屌你早啲講啊嘛！」我話。

點解會係紅色炸彈？原因係早兩個月前Samuel向Rosita求婚成功，成為我地「赤鱲角同學會」之中率先跑出既第一人。而Rosita就係同Jane一齊同期入CX做空姐，感情就好似閨蜜咁Close。當然，Rosita就唔會好似阿Jane咁拜金，性格較為平易近人，對Samuel千依百順，對我地呢班兄弟姊妹都有講有笑。

記得之前我同Jane分手既時候，Samuel同Rosita呢對情侶就主動開解我，而Rosita都識做，盡量唔會係我面前提及Jane，唔會因為Jane既關係而對我疏離。難怪Samuel會鐘意佢啦！係有原因架。





咁即係⋯⋯到Samuel同Rosita擺酒嗰日，我咪會見到Jane個八婆？到時如果比個八婆同佢班姊妹撚狗咁撚，到時真係和味啦！我同Jane簡直冤家路窄！我真係唔知係咪前世欠個八婆債，今世就黎要搵我討債。

「到時記得早啲到啊！」Rosita提醒。

「兄弟預左你啦！！」我話。

「但係⋯⋯你面色咁難睇既？」Samuel問。

「唔使諗啦！一定唔知點面對啊Jane呢？」Rosita問。

「你明架啦！」我話。

「咁你咪帶新女去示威囉！」Rosita話。

「我何來有新女啊？」我黑人問號。





「你有既。」Samuel奸笑。

「坐係你車裡面嗰個咪係囉！！」Rosita奸笑。

「唔好搞嘉欣啦 ！」我話。

「兄弟，到時你咪帶Ally一齊去啦。」Samuel話。

「我地留左位比你同Ally一齊坐架啦！！Ally而家呢係我既好姊妹，當然要請埋佢啦！」Rosita話。

「方法就比左你啦兄弟，到時你識做架啦！」我話。

「得啦！」我話。





呢個時候，我離遠見到Jane架CLA駛緊入黎，為免見到個八婆，於是我即刻向Samuel同Rosita道別，攞住呢對新婚夫婦既喜帖，跑返去我架FD2，除左唔想見到Jane之外，我費事嘉欣等得我耐而發我脾氣。而Samuel同Rosita呢對新婚夫婦見到我咁既樣就係到食花生。

一上到車，見到嘉欣鼓起泡腮，我就知大事不妙。

「講，頭先去左邊咁耐？」嘉欣問。

「冇啊！！攞帖啊！」我話。

「邊個結婚啊，你前女友啊？」嘉欣奸笑。

「唔係，Samuel同Rosita結婚擺酒咋。佢地話叫我帶你一齊去啊！」我話。

「真架？我要去！我要去！」嘉欣歡呼。

「不過⋯⋯你唔怕悶咩！？」我問。





「有你係到，就唔會悶啦！」嘉欣話。

點知最唔想發生既野，真係發生左，Jane架Mini Cooper同我架FD2迎頭相遇。而Jane佢仲見到我，我自然扮睇佢唔到，但由於我地出停車場出觀景路係要望右，所以一定會望到Jane。但唔知點解好日條路冇車，今日就勁多車行呢到，實在係不思費解。

屌佢老尾，咪姐係要我同嘉欣對住Jane？

我同Jane就好似你眼望我眼咁，完全係Dead Air。當然而家既身份咁尷尬，我梗係唔理佢啦。趁呢個時候冇車，我就即刻比油走人。我諗Jane一定知道我係佢面前向佢示威，擺高姿態。當初係佢拋棄我在先，如果咁就原諒左佢，我驚我過唔到我自己既良心。

當然，我轉完彎，見到嘉欣係到奸笑。

「做咩咁好笑啊？」我問。

「冇啊，我見到有人係到避前度姐。」嘉欣笑住咁講。





「你又知？」我問。

「我同你訓埋同一張床，你拮起條尾我都知你係龍與鳳啦！」嘉欣話。

「聰明！但係你唔怕咩？」我話。

「我點解要怕喎？我又唔係你老婆，唔會對你管東管西既！我估我係你咩？」嘉欣話。

「哈哈⋯⋯到時我驚見到佢，唔知講咩好。」我話。

「返工啦，遲到啦！」嘉欣話。

我望一望個錶，屌原來仲有15分鐘咋。於是我就急急腳比油去返四號停車場，然後一齊跑去Terminal個Office打卡入更。