我娶左個台妹做我老婆啊！: Chapter 23

首先，如果要係機場既Airside On Duty，一定要去Permit Office到辦理Permit，我同Jeff就帶嘉欣去Permit Office，等佢可以有得去禁區工作。

「我係咪要去搞證啊？」嘉欣問。

「係啊，你要入Airside到做野架。所以第一樣野就要去搞證件先。」Jeff話。

「陣間呢，你就要攞身份證比佢地Check，然後佢地會幫你影張相，大約十分鐘就得架啦！」我話。

「OK！」嘉欣微笑。





到左Permit Office，我同Jeff就向嗰到啲職員寒暄下，叫佢地幫嘉欣影張靚相，之後嘉欣就入左去。臨入去仲向左我單眼同伸脷，嗚啊！

趁嘉欣入左去既同時，我就同Jeff傾下閒計、講下粗口Relax下。至於工作上既野，就留返Office再講啦。

「屌你原來一早識嗰個女仔架啦？？」Jeff問我。

「係啊，Ally佢以前同我一齊讀書架！」我話。

「乜你以前係台灣讀過書既咩？」Jeff問我。





「唔係，Ally係香港出世，同我係幼稚園同學黎，但佢後來跟佢父母返左台灣，佢爹地媽咪係華航既經理黎架。佢爹地都係香港人黎，只不過婦唱夫隨，就一齊返去。」我就向Jeff解釋下。

「唔怪得知佢有香港身份證，同埋識講廣東話啦！我以為佢由細到大係香港添。我睇Ally有啲霖你喎，有冇機先？」Jeff就話。

「我地朋友黎架嘛，有咩事一定要幫既！」我就話。

「你鐘意人就好去馬啦，不過追還追，唔好影響到工作就得，公私分明，OK！」Jeff同我話。

「OK！」





過左一陣，嘉欣就出左黎。見到佢已經掛住個機場Permit，我就知佢可以即刻跟我地入Airside。我睇佢Permit張相，簡直可以用「女神」黎形容，不過⋯⋯我都係鐘意真人多啲。

行行下，嘉欣就問我：「你張證點解會多個D字既？」

「呢個D字即係可以係Apron到揸車。但係⋯⋯」我話。

「我知，要考啊嘛！」我未講完，嘉欣已經Stop左我。

「係啊，Ally你有冇車牌啊？」Jeff問。

「有啊，不過我香港個Driving License要過幾日先攞得。」嘉欣話。

「原來係咁，行啦我地。」我話。

陪嘉欣攞完證，我同Jeff就帶佢去我地Dept個Office，整指紋打卡，同啲同事打招呼先。當然不論係男同事或女同事，見到一個咁靚既「女神」降臨我地既Dept，都不禁係到嘩然，係到不斷向嘉欣抄牌。嘉欣都好好人，逐一了解返同事們既訴求。好快，佢就同我地部門既同事打成一片，特別係啲女同事。





係咁既，我嗰Team計埋嘉欣就有十二個人：孖女Sandy同Mandy，Michael，Sisi，Kenes，David，Ivan，Christy，David，我同嘉欣。而職級計：我，David，Sisi就係主任級，其他人就係Officer。嘉欣個職級就係同我一級，但由於佢係交流生，所以就冇實權，唔可以指揮任何人。

我地傾左一陣，然後係我地Dept同食飯吹水Wtsapp群組，加左嘉欣入去。同一時間，由於Jeff要同其他Dept既經理開會，就叫我帶嘉欣係Terminal同Apron行下。佢臨行前仲不斷係到對我奸笑。而其他同事亦都要出去Terminal On Duty，我就叫嘉欣全程跟住我，等佢可以熟習一下個環境。