我娶左個台妹做我老婆啊！: Chapter 13

一返到去，爹地媽咪係聽到睇電視。原來係我最鐘意既衝上雲霄。

「爹地、媽咪，我地返黎啦！」我同嘉欣異口同聲地講。

「阿仔，你同阿女買咁多野啊？」媽咪問。

「冇，Leslie話想帶我行街啊！想我做返個香港小姐。」嘉欣繞住我隻手講。

「哈哈，係啊嘉欣，今日你爹地媽咪同我通電話，叫你係呢到住幾耐都得。架車同間房呢你就同個衰仔兩份Share啦！」爹地話。





「聽到未啊！以後我就要係到痴飲痴食！你唔准趕我走架！」嘉欣又打我。

「放心啦嘉欣，總之我地兩個授權比你監視個衰仔既一舉一動，如果佢對你唔好就出聲啦！」媽咪話。

我地大家都忍唔住笑，雖然我以後咩野都要同嘉欣一齊Share，但唔知點解⋯⋯我有一種莫名其妙既開心。我唔知大家會唔會有機會一齊，但難得有一個靚女青梅竹馬與我同床共枕，又一齊返工放工，係一種幸福。

過左一陣，嘉欣就去左沖涼，而我就同爹地媽咪邊睇電視邊傾計。

「喂你地兩個去左邊到威威啊？」爹地問我。





「去左旺角咋！帶佢去瘋狂購物。然後同佢、仲有機場六小福打邊爐啊。不過爹地媽咪啊？」我話。

「咩啊？」媽咪問。

「做咩你會對嘉欣咁好既？又會比佢係到住？」我問。

「乜你唔鐘意人咩？」媽咪扮嬲咁講。

「唔係啊！屋企多左個女仔幾溫馨啊！我幾鐘意呢種生活啊！」我笑住咁講。





「因為我同媽咪知你同阿Jane分左手之後你一直都好唔開心，仲成日係到借酒消愁。咁岩嘉欣個爹地媽咪同我地講話嘉欣要返香港做野，我同媽咪就不如提議叫佢過黎我地呢到住啦！你知你份人又唔嗲唔吊，有嘉欣睇住你，我地兩個就放心晒啦！總之我地當嘉欣係我地個女啦！如果你係鐘意佢既⋯⋯就對佢好啲啦！你呀⋯⋯細個Kiss過嘉欣架，你唔好以為我哋同嘉欣爹哋媽咪唔知先得㗎！人地等緊你架。你試下唔娶佢做老婆，我一個仙唔留比你。」爹地就家長Mode同我講野。

「Yes Sir！」

爹地媽咪咁同我講，我知其實佢地同Uncle Auntie都想我同嘉欣一齊，我知道其實我地都對大家有好感，只不過⋯⋯我地仍然需要時間去相處，經過時間既相處，我先知道大家係咪適合對方。因為⋯⋯相愛容易、相處難。唔想一時既好感，而令到大家互相傷害。

溫嘉欣，讓我慢慢喜歡你吧！

過左一陣，嘉欣就沖左涼出黎，呢一刻既佢落左妝變左素顏look，但依然都係一個靚女（唔知點解我特別鐘意素顏look，顯得佢更可愛）。而佢就好似當正呢到係佢屋企咁，著到好麻甩，Oh！原來係攞左我啲衫黎著，乜你自己冇衫咩？



「你做咩⋯⋯咁樣望住人地喎，人地會⋯⋯怕醜架！」嘉欣好嗲咁講。

「冇啊⋯⋯」我口窒窒咁講。





「仲話冇，又諗埋啲衰野啦！！你啊！快啲同我即刻去沖涼！」嘉欣突然間家長上身咁講。

唔知點解我就好聽嘉欣既話，就即刻攞訓覺衫去沖涼，而爹地媽咪就係到食花生，不斷咁係到恥笑我。