我娶左個台妹做我老婆啊！: Chapter 5

我同嘉欣一齊搬行李入我間房到，意味住我以後要做廳長啦。不過都岩既，嘉欣話晒一個女仔由台灣返黎，冇理由要小公主訓廳咁慘架。其實我屋企有三間房，一間係爹地媽咪，一間係書房，一間係我間房。但我間房放左好多野，所以要嘉欣小公主屈就一下。

我地一路搬，一邊聽下嘉欣係台灣既事。原來個衰妹係台大（台大即係國立台灣大學，係台灣第一學府。即係同港大同一級數）日文系加副修英文系畢業。其英文IELTS考試係8.5分，日語認證基準係N1，所以能夠說得一口流利既廣東話、日文、國語、台語同英文。係大學裡面，嘉欣係港澳會同熱舞社既副會長，以及係田徑校隊代表，係學校係校花，資優生一名，唔怪得佢文武雙全。大學畢左業之後，係佢爹地媽咪穿針引線下，係華航到做左一年空姐及兼職模特兒。但後來佢因為覺得空姐比較辛苦，選擇落地投考桃園國際機場公司（等於台北既機管局）。因為工作表現良好同持有香港永久居民身分證既關係，所以被上司選拔去香港機場管理局到做一年既交換生。

咁姐係⋯⋯嘉欣會係我既同事⋯⋯嗚啊！淨係日日同佢一齊On Duty，諗起都覺得爽。不過唔知佢會唔會同我拍同一更呢？？？另一樣野既係，咁我可以同嘉欣同居，諗起都開心。

「你諗緊咩啊？」嘉欣問我。

「冇啊！睇下點樣將我啲野搬過去書房咋嘛！」我話。



「屌！使乜姐，我地一齊打孖鋪咪得囉！我要同你訓啊⋯⋯我要同你訓啊⋯⋯」嘉欣邊扯住我隻手無啦啦講左句粗口，顯得出我地兩個真係好熟。

「你唔怕我會搞你架咩？唔使啦！我會扯鼻鼾架！」我扭扭擰擰咁講。

「咩啊？我要同你訓啊⋯⋯吹咩！欣欣一個人訓覺會害怕的。」嘉欣講。

「你鍾意啦⋯⋯不過咁⋯⋯我有樣野唔係好明。」我問。

「做咩啊？」嘉欣問。



「你返左黎香港幾耐啊？」我問。

「我都係尋晚先落機咋，不過返到香港都成點幾兩點鐘，咪係機場酒店到訓一晚！好彩係你今朝帶我去停車場架姐。」嘉欣好開心咁講。

「你咁嗲住我，我點會唔幫你啊！溫小姐！做咩唔叫我車埋你啊？」

「屌，我又唔知你收幾點，世伯伯母知我返香港，咪由機場車我過黎囉！你啊做咩要揸電單車啊，咁點車本小姐啊！況且⋯⋯人地想⋯⋯比個驚喜你啊嘛。」嘉欣同我講。

我地傾傾下計嗰陣，爹地、媽咪就入左黎。



「爹地、媽咪！」我同嘉欣向爹地媽咪打招呼。

「仔啊、你同阿女一唔一齊出去飲茶啊？」媽咪問。

「好啊！」我同嘉欣異口同聲咁講。

「咁一陣我地出發啦！」爹地話。

由於我岩岩收完工既關係，為免接觸到細菌。我就去沖涼消毒下先，過左一陣，我就換左件白色T恤，淺藍Levis 501牛仔褲，加對黑白色既Vans SK8波鞋。呢個時候，嘉欣就敲我房門，話要去換衫。於是我就自動自覺咁行左出去，通常女人換衫係特別慢既，嘉欣呢個衰妹都唔例外。

過左十分鐘，嘉欣就出左黎。佢換左白色針織上衣，下身就加對黑色長裙，加對Fila波鞋，化左少少既淡妝，充滿優雅既氣質。嗚啊！！「賢賢，我著得靚唔靚呀？」嘉欣問我。「好靚呀，你著咩都咁靚。」我回應佢。「口花花！」嘉欣又回應我。






我地四個就鎖好門窗，然後落左停車場，爹地就比車匙我：「阿仔你揸！我有啲攰！」

爹地同媽咪就上左後座，而嘉欣就上左副駕，坐我隔離。好彩佢都知香港同台灣個道路行車方向係相反姐。