因為ex，我決定向全世界嘅女人報仇: 求婚

就咁樣，我同Rachel平平淡淡咁行落去，當初出軌嘅事好似連我自己都慢慢唔記得。我係我地今年年尾嘅紀念日同佢求婚，我叫左我啲fd嚟幫我搞，佢地幫我set好哂場。我記得佢講過求婚唔想係大庭廣眾下，但係都想有人見證。最後我係酒店房入面自彈自唱比佢聽，然後我啲fd衝哂入嚟，拎左花、香檳同戒指入嚟比我。我拎起盒戒指，將扎花送左比佢。
「凝凝，多謝你一路以嚟都係我身邊。或者我唔係一個完美嘅人，但係我都想用盡我呢一世嘅力氣去愛你，去照顧你，去保護你。我唔叻，不過我都想比幸福你，想你比我機會我愛你一世」
「凝凝，嫁比我」我單膝跪左係度，打開左盒戒指，望住佢對眼。原來求婚係咁緊張.....，雖然我知道佢會應承我，但萬一佢唔應承...。今日嘅每一個細節位都好驚出錯，仲要交左比班仆街仔幫我搞。
「....！！！！」佢用隻手遮住個口，我未見過佢咁驚訝。
「嫁比佢！嫁比佢！」我班fd係隔離食花生搞氣氛。
「呀文...！」佢啲眼淚不停係眼眶入面流出嚟，成個人震晒，但我望到佢對眼係好開心。呢個樣真係好深刻，佢用力咁點左下頭。我慢慢將戒指套入佢隻手，岩岩好。
「woooooo～」我d fd起哂哄，然後開香檳。
「凝凝，我愛你」我望住佢，然後錫左落去。
「哇～～～好啦，我地差唔多走啦，唔好阻住人sweet sweet 啦」賢狗笑笑口咁講。
「走嚕走嚕～掰掰呀嫂～」成班兄弟就走左。



「呀文...多謝你」Rachel抱住我講。
「傻瓜！做咩無啦啦多謝我喎」
「多謝你愛我...！我...我真係唔知講咩好...，我幻想過好多次你求婚會點，但真係冇諗過我會咁激動...。好似....嗚.......」
「傻妹...！唔好喊啦，乖。我係度，我一直都係度」我摸佢頭。
「嗚...呀文....我想講..你岩岩同我求婚嗰一刻..好似.....、好似我一路以嚟嘅努力冇白費咁....。同你一齊真係好開心，真係好幸福！..」
「凝凝，我都要多謝你咁多年嚟一路都係我身邊，發生咩事都有你安慰我。你為呢段愛情付出咁多，我點會唔知。係時候比個家你啦，傻瓜。以後要叫我老公啦～」我微笑。
「嘻嘻...！老公...！」佢細細聲講。
「原來比人叫老公係咁幸福..！我愛你呀，老婆」我同佢講。當初mk年代，十幾歲就係度老公老婆咁叫。但原來真真正正到你結婚，先發現呢個稱謂承載住一幕幕兩個人一齊嘅經歷。一次次嘈交、意見不合、冷戰，先煉成今日嘅結婚戒指。
「我都愛你」佢笑住挨住係我度。



我地嘅婚禮用左好多時間去籌備。Rachel好enjoy籌備婚禮，佢成日同婚禮策劃婚人傾細節，睇得出佢好重視呢個婚禮。
「傻妹，唞下啦，聽日再睇啦」我拎左杯水比佢。
「我想睇埋先...呀文，你覺得呢個好唔好呀」佢問我意見。
「都ok呀，你鍾意邊個都得」我真係拎唔到主意，兩個都差唔多。
「好啦..，你訓先啦，唔洗等我嫁」
「我上床hea陣先～」我話。
我返左上床，用碌碌下手機諗起要派紅色炸彈。我打開wtsapp去大學同學個group。

「你地近排忙唔忙，食個飯？」我問。過左陣Chloe 就覆。


「好呀！！好耐冇見你地」
「可以呀～」Eric話。其他人都開始和應。
「我男朋友都得呀」Chloe話。我地唔知由幾時開始，飯局會帶埋自己另一半嚟。所以Rachel都識哂佢地咁濟，唯獨係仲有一個未見.....！！咦，呀婷！？
「我可以呀，近排返左香港」呀婷話。
「好呀！咁我睇下食咩先～」Chloe話。
我自從呀婷去左英國之後都幾年冇見過佢，除左係佢ig睇下佢啲相之外，都冇再見過。今次竟然會嚟，都好嘅，希望過左咁多年可以化解返當初嘅尷尬..。只不過，唔知Rachel會點諗，不過我地而家婚都訂埋，佢唔會呷醋掛。

呀婷，呢幾年，你過得幾好嗎？

季度裡事過境遷
蝴蝶終於蛻變
再沒留戀 誰的臉
往日兩位少年

就算讓世事再翻演


會否 不改變
仍是會 離別 糾纏
拔去穿心一箭感恩不怨