因為ex，我決定向全世界嘅女人報仇: 艾菲爾鐵塔下

第二日Winkie叫我食早餐，我先將我打比呀文嘅事話比佢聽。
「Nicole姐......你要振作呀」Winkie話。
「嗯....」
「可能個女人係佢家姐呢～」
「唔會啦....我冇嘢喎..我地去食嘢啦」我話。
「咁好啦...」佢講完我就換左衫同佢一齊落去。我地落到lobby見到Kenson佢地都係度，就一齊去食嘢。
「Nicole你好似好攰咁喎～琴晚出去玩呀？」Jackel講笑咁講。
「玩你個頭！我地琴晚傾計傾夜左炸」Winkie幫我答。
「你地好似好fd咁喎近排」王子話。
「緊係啦！Nicole姐不知幾好～」Winkie望一望我話。我望住佢勉強笑一笑，多謝你呀Winkie。


「我冇事呀，係有啲眼訓姐」我笑一笑同佢地講，係佢地面前，我唔會比佢地見到我軟弱嘅一面。
「冇事就好～我地都就嚟要去下一個國家」Kenson話。

我地食完早餐就去左幾個景點行下，雖然我冇咩心情，但係法國嘅街頭隨便閒逛都係一件幾令人放鬆嘅事。當然，要好保護自己財物....。附近有啲人係度busking，有人唱歌有人拉小提琴。我地行到去艾菲爾鐵塔下面，一行五個遊客。我曾經好鍾意艾菲爾鐵塔，細細個覺得巴黎同鐵塔都好浪漫，覺得法國比人渲染左一種浪漫色彩。我記得中四嘅時候係我初戀，嗰時我同我初戀男朋友講過第時大個一定要去巴黎睇艾菲爾鐵塔。嗰陣我地勾手指尾，話會一直陪住對方，佢亦都話一定會帶我去艾菲爾鐵塔。冇諗過當初嘅誓言冇實現到，我老公結婚嘅誓詞冇實現到，連我同呀文嘅誓言都冇實現到..........。我更加冇諗過，我第一次企係艾菲爾鐵塔下面，竟然覺得浪漫嘅愛情故事係幾咁天真。
「Nicole姐！過嚟一齊影相呀～難得嚟到」Winkie叫我過去。
「...嗯，好呀」我行過去。
「Jackel你幫我地揸機呀！」Winkie話。
「好呀，用你手機？」
「嗯」
「好...三、二、一，笑～」Jackel話。但而家嘅我真係笑唔出，我勉強擠左個笑容出嚟...死啦一定影得好醜。


「比我睇下...」我話，然後拎左部手機.....我個樣真係好醜...！
「影多張呀，呢張我未ready！」我話。唔得，一場嚟到我最鍾意嘅鐵塔，我唔可以比呀文影響我心情，就好似笑得唔開心就係認輸咁，但我唔服輸。我再行埋去鐵塔下面，我用最靚嘅笑容、最好嘅狀態望住鏡頭。

我呢種倔強，唔容許自己會輸

「好啦～三、二、一」。就咁，我就係我呢個狀態下，係細細個最渴望去嘅地方影左張相。係佢地面前我唔想表現到好唔開心，但我一返到酒店成個人又繼續崩潰。每一晚當自己係房我都好似好孤獨，我好想即刻搭飛機返香港，直接拎住鎖匙上呀文屋企問清楚....，但我唔可以。Winkie間唔中都會嚟我房陪我，再加上我要返工，所以點都要tune返自己狀態，唔可以再係咁..

時間好快又過左幾個月，我地途中去左好幾個國家。呢幾個月入面我都冇再搵過呀文，雖然我心入面仲係好掛住佢，但我知而家嘅我仲係已婚，就算搵到佢都冇用。我將我嘅心思放係工作入面，就算間公司係嗰個男人嘅，我都唔想做得咁難睇。

今日係我地係歐洲嘅最後一日。


「Nicole姐..你返香港會唔會搵嗰個男仔呀？」Winkie同我拖住行李係機場行緊，另外三個男人行係前面。
「我會去搵佢..我唔甘心，我一定要問清楚..。但我唔想用人地老婆嘅身份面對佢..」
「好啦，點都好我都撐你嫁Nicole姐！你辭左職之後都要搵我食飯呀！」Winkie話。
「哈哈，緊係啦～到時你都要搵到個好男人嚟見我嫁」我話。
「好！」
飛機慢慢飛離係瑞典嘅Bromma Stockholm Airport，呀文..我返緊嚟啦，無論係點都好，我都會搵你講清楚。呀文，我呢幾個月都好掛住你..

想念是會呼吸的痛
它活在我身上所有角落
哼你愛的歌會痛 看你的信會痛
連沉默也痛