因為ex，我決定向全世界嘅女人報仇: 打電話

係人地眼中我一直都係個好堅強好獨立嘅女人，因為我由細到大都係自己一個解決問題。曾經有個朋友同我講我呢種倔強嘅性格好難搵到男朋友，好多男人都鍾意啲弱勢啲嘅女仔，佢地就會自自然然好想保護呢種女仔。但呢幾個月係外國真係好難捱，我好想搵一個人可以依賴。我好迷惘好唔知應該點做，而家嘅我變到自己都唔認得自己。識左呀文之後我感受到我從來未感受過嘅安全感，好想比佢保護住。係佢身邊就好似一個小女人咁，咩都唔洗諗，只要做自己想做嘅嘢就得。我想做嘅嘢佢都會陪住我，係佢身邊我可以好任性咁做返自己。本身出去玩都係因為想逃避，我知咁做係出軌，但佢對我嘅傷害，令我就算出軌都唔覺得內疚。我對男人一直都有防備，我清楚遊戲規則，唔會隨便投放太多嘅感情落去。經歷過一段唔完美嘅婚姻，我已經好識保護自己，唔想再受傷害。

呀文雖然佢同其他男仔都一樣咁識得溝女。但我地就算唔係識左唔係好耐，佢都好了解我、好細心咁留意到我嘅需要。一開頭我好主動，本身我純粹諗住玩玩下，但佢比我嘅感覺好認真，唔似我見過嘅play boy咁。我都冇諗過自己會對呀文動真情，但係佢就係有一種獨一無二嘅魅力，令我慢慢沉船。同佢一齊我嘅抑鬱症唔會發作，同佢一齊訓我先唔洗食安眠藥，佢就好似我嘅止痛藥一樣..一次又一次撫平我嘅創傷。
「Nicole～Nicole？」Winkie坐左係我間房問我。我地呢兩個月嚟fd左好多，間唔中都會兩個女仔出去玩。
「係～」
「冇呀見你呆左咁..我岩岩問你覺得我應唔應該同男朋友分手...」佢話。
「佢咁對你喎，我覺得你真係要狠心啲..」
「嗯..但我真係好唔捨得」
「為左呢啲仆街唔值得呀！你仲後生，又咁靚女，大把機會。信我，真係唔好再留戀啦」我頭頭是道咁幫佢分析佢嘅戀情，但自己嘅問題就冇解決過。
「咁好啦...我諗我知要點做。多謝你呀Nicole姐，我差唔多返上去啦～」佢話。


「Winkie」
「嗯？」
「你想唔想聽我嘅嘢？」
「想呀！但我有時唔敢問你...哈哈..」佢話。
「我可以同你講，但你一定要保守秘密」
「嗯，好」

「其實個背景同你有啲似，都係出身唔好。但唔知好彩定唔好彩，我遇到佢.........」我將我同我老公嘅經歷同左佢講，包括埋佢有第二個女人同家暴。
「哇.......我....我要啲時間消化...」佢聽到好驚訝。
「你當聽故仔咁得啦..我都冇同人講過」


「我冇諗過你地原來係咁....」
「其實我都有唔好，我...鍾意左另一個男人」我話，之後我再將我同呀文嘅嘢簡單咁講左比佢聽。
「哇...好似電視劇咁..但你有冇諗過離婚？」Winkie問我。
「緊係有，但係我驚我負擔唔到我媽媽嘅醫藥費。不過唔緊要啦，有你肯聽我講我已經好開心。呢件事我屈左係心好耐，一直都好想搵人呻..」我話。
「真係冇其他方法咩..？我好睇唔過眼！原來老細係啲咁嘅男人！」
「我都唔知..但你覺得我應唔應該搵返個男仔」我問。
「緊係搵啦！佢可能一直都等緊你搵佢，我覺得如果佢真係鍾意你嘅，一定會等你！」
「都係嘅..但我之前冇左部手機冇左佢contact..」我話。呀文，你係咪真係會等我。
「總會有方法嘅！你有冇backup？」
「冇..」我話。我發現而家嘅我真係唔同左，冇左以前嗰種獨立，開始多左依賴人。如果係以前嘅我，一早就好主動咁去報警，再諗好多唔同嘅方法去解決問題..。高曉琳，你幾時變到咁軟弱。



Winkie 走左之後我再嘗試搵下有咩方法，我突然間諗起我可以download 返隻交友app搵呀賢！！然後再問呀賢咪得！我即刻單返，然後搵返呀賢出嚟，再send message 比佢。
「呀賢？...我係Nicole呀」我話。
「做咩呀？」佢隔左一陣就覆我。
「我換左手機呀...想要返呀文電話」
「好呀，佢電話係98765543」
「好～唔該哂你！」
「小事啦，你同呀文點呀？」佢問。
「..都係咁呀，冇咩特別。我遲啲再同你傾啦～」
「好啦～」

我即刻save左呀文電話，然後想wtsapp佢。我禁左入個chat room，不斷諗緊應該要打啲咩。我望住個wtsapp發呆左好耐，最後，我終於禁落wtsapp call度.....
「嘟......嘟.........」我個心跳得好快，我到依家都唔知道究竟打比佢之後要講啲咩。
「嘟..........。喂？」...係佢！係呀文...