因為ex，我決定向全世界嘅女人報仇: 熱戀期
同Rachel一齊嘅日子，每一日都好開心，我唔洗驚佢會走左去。對於一個曾經受過情傷嘅人嚟講，有一個人係你身邊唔會走係好重要。我經歷過被人戴綠帽，經歷同Nicole嘅離別，或者Rachel嘅出現時機岩岩好。如果冇經歷過呢啲事，我都未必會鍾意Rachel呢一type。所以我有時都覺得呢啲係命運嘅安排，唔到你唔信。既然上帝關左我道門，Rachel就係佢為我開嘅嗰扇窗。
「文仔！你睇我買左啲咩返嚟～」Rachel岩岩返屋企。
「哇！咁正嘅！！！」佢買左啲我好鍾意食嘅嘢比我。
「嘻嘻，鍾意呢～你餓唔餓呀，唔餓你食左呢個先，我地晏啲再落去食」
「我餓呀～」
「餓呀..咁我地而家落去食啦」佢話。
「唔係呀...我餓啦..」我講完就揸左波佢一下。
「喂也...！衰...唔.....嗯....」佢想話我，但已經比我錫左落佢個嘴，然後抱起佢入房。我近排過嘅日子，除左返工辛苦少少，間唔中ot下....，都算係幸福咁過，因為有Rachel係我身邊。佢嘅出現令我對愛情有返少少希望，至少個人開始有返目標。我會想為左佢而再努力啲儲錢買樓，會想為左我地嘅將來打算。呢種上進心由我比Sophia 帽左之後都冇再出現過，但冇諗過Rachel 可以改變返我。
以前都有講過，佢嘅性格係開心果，成日都好比到能量我。雖然我地都會嘈交，都會意見不合，但佢都好包容我嘅一切。我亦都了解佢嘅缺點，大家係點樣一齊相處入面取左嗰平衡。呢種磨合嘅時間冇維持好耐，因為早係我地同居嘅時候，已經解決過好多日常生活上嘅磨擦。可能係因為先了解，然後再一齊，唔係以前咁衝動就係埋一齊。所以有好多嘢我同佢都已經有經歷過，就避免左好多無謂嘅爭執。
我地嘅愛情算係好平平穩穩，但一啲都唔平淡。始終都仲係熱戀期，我地日日見都唔厭。間唔中，仲好有激情。我冇刻意去諗我地嘅熱戀期會維持幾耐，所有嘢都係順其自然咁就好。
同Rachel一齊，時間過得好快。咁就拍左兩個月，嚟到12月。12月對於好多情侶嚟講，係個好重要嘅月份。因為聖誕節、平安夜呢啲都係大多數情侶好重視嘅節日。聖誕節對我嚟講係每年最期待嘅節日，我由細到大都好鍾意聖誕節。可能因為聖誕節好有氣氛，雖然有時係香港嘅聖誕變到好商業化，但始終都係幾有feel。
「凝凝！聖誕節你想去邊呀？」我係屋企問Rachel。
「去海旁？」佢話。
「好呀～雖然以前成日去，但係都好想同你去一次，始終係我地第一次過聖誕」
「嗯！我以前聖誕都係去海旁嫁～」
「係咪mk時代去海旁free hug嗰啲！哈哈」我笑住講。
「m你個頭呀..！我同啲女仔朋友去嫁...雖然都有hug過..」
「唔得呀！你係我嫁！唔準比人抱..，蝕底哂」
「嘻嘻，而家緊係唔會啦！中學嗰陣就話貪玩姐！而家淨係抱你一個就夠～」佢話。
今次既然係同佢過嘅第一次聖誕，我決定花多啲心機。我諗住book間海景酒店，book間海景餐廳，然後再買禮物比佢。我希望可以同佢過一個難忘嘅聖誕，因為我已經全心全意投入係呢段關係，好想比到幸福佢。
至少我暫時都係咁諗