因為ex，我決定向全世界嘅女人報仇: 深夜來電

我幫Nicole吹吹下頭髮佢就挨左落嚟，慢慢就訓著左。摸一摸佢個頭，好多位已經乾哂了。我再摸一摸自己個頭，都已經乾左...原來吹左咁耐啦。「Nicole～傻妹起身啦～要刷牙呀....」我試下叫佢。
「.....」零回應...。
「衰妹！！....高、曉、琳！！....曉琳....」我郩一郩佢，都係冇咩反應。算啦...都係等佢醒左再算...唔刷一晚牙唔會死嘅...我慢慢放返佢上枕頭，然後幫佢冚被。

我刷左牙，洗左個面，然後熄左房燈，開左床隔離嘅枱燈。望一望手機，而家已經兩點幾三點，但唔知點解我冇咩睡意。我開左Safari，search下有咩行程。嚟之前我已經plan左少少，但都係想再望一望。今日係星期日凌晨，星期日、一、二、三、四號晚返香港...我地有四日full day加半日。雖然成日去台灣，但都想睇下有咩地方會係想同Nicole去，或者發掘下有咩新地方好去。不過有時就算係一樣嘅景點，同自己最鍾意嘅人再去一次又有咩所謂。我係google search「台北景點」：
【台北旅遊2020】IG人氣《 50 個台北景點& 美食》( 4月最新..)
【台北景點推薦】台北一日遊好玩行程＆最夯台北旅遊捷運 .......
我是但禁左入一個...嗯.......101..去唔去101好呢，如果夜晚同佢去，應該都幾浪漫，不過唔知佢有冇去過。睇下先....【俯瞰台北城市美景】台北 101 Skyline 460 天際線雲端漫步...好似唔太吸引...聽日再問下佢先，反正我地就住101隔離。饒河夜市...一定要去啦～去九份放天燈...呢個我都好想同佢一齊去...就當係祈福..祈求我地兩個可以有個好嘅結局...唉，去旅行唔諗呢啲衰嘢...
「嗯...我唔要呀...」Nicole轉一轉身，好似發開口夢。
「傻妹...」我錫一錫佢額頭，佢一定係發惡夢了...


「嗚...抱....」佢話，唔知係發開口夢定係半睡半醒。
「係係～」我抱住佢，摸佢頭氹佢訓。慢慢，佢又繼續訓了。

好，我用另一隻手睇手機。嗯....去唔去埋台中好呢...如果今日加聽日有兩日Full day都可以再去台中嘅，反正我都未買回程機票..係台中返香港都OK。
「呵～～～～」我打左個喊路，哇..都就嚟四點了...都要訓了。我習慣熄數據同WIFI訓教，當我準備熄嘅時候...有人FaceTime我......Rachel？？唔知點解我有啲心虛，我望一望隔離嘅Nicole....我輕輕推開Nicole...好彩佢冇醒。部手機一直震一直震，佢至少打左過嚟兩次，我拎住部手機入廁所...呢個時候佢又再打過嚟。

「喂..？」我話，然後我用手指遮住個鏡頭。
「呀文～～！！！搵左你好耐啦～～～～」佢背景好似係唔知bar定club，好嘈，佢叫到好大聲。我懷疑佢開始醉....我即刻較細聲部手機，然後勁心虛咁望一望出面。
「做咩啦..？我係台灣呀...」我嘗試以最細聲講但又要比佢聽到。
「下？？台灣！！！！我又要同你去台灣！！！！！！」佢話。


「仔仔呀～！？台仔？？」Rachel用自拍鏡影住佢同佢隔離個fd。
「仔你個死人頭～～～人地大把女～幾時到你～～～」Rachel同佢講fd講。
「....」我聽到唔知可以講咩好。
「呀文～～～點解～～你冇樣嘅～～？我要睇你個樣～～」Rachel話。
「...你醉啦...快啲返屋企先啦...」我話。
「唔～～唔理呀...我要睇你個樣～～唔睇我唔走～」Rachel好似撒嬌咁。
「好好好...」我將我隻手指移開，影住我自己。
「哈哈～～呀文～！你係廁所做咩呀～～～？柯屎呀？」Rachel笑住話。
「Nicole係出面訓緊...我廢時嘈到佢..」我話。
「Nicole！！！Hi～～～我係Rachel呀～～～～」佢好似好興奮咁。


「...喂！都話佢訓緊....」我再望一望出面，佢仲訓緊。
「你呀！！！有女就唔要Fd啦！！！......」佢大叫。
「唔係啦...你冷靜啲先....唉」我有少少衝動想cut佢線，一嚟佢醉左我講咩都冇用，二嚟我真係開始驚Nicole聽到會有啲咩誤會。
「喂～～周紫凝，發夠姣未.....我地轉場啦～～」佢個Fd話，然後入左鏡。Btw原來佢姓周...
「咦～～～你就係呀文？？？」佢個Fd問我。
「...係...你好...」我都唔知點覆佢好，求奇hea鳩下。
「就係你同佢飲酒飲通宵？～」佢個Fd再問。
「..嗯...」我話。
「哦～～～佢第一次同仔仔飲通宵就係你～～～你都算叻啦～同我地獸醫護士女神飲通宵～～」佢個Fd話。
「唉呀....死開啦......」Rachel影返住自己，佢塊面真係好紅..好似就嚟唔掂。
「你唔好再飲啦....快啲返去啦...」我話。
「你返香港....肯同我飲..我就返去」佢話。
「係...可以..」我為左佢快啲返去，同埋我可以快啲收線...越傾得越耐我越不安....
「好～～～～掰掰啦文仔～」佢wing下wing下咁cut左我線。
「呼....」我慢慢行返出去，望一望Nicole..好彩都仲係訓緊。



Rachel應該冇嘢嘅...佢都唔似醉得哂...但希望Nicole冇聽到岩岩佢地講嘅嘢。雖然我冇做錯啲咩對唔住Nicole嘅嘢，但我硬係好心虛，驚佢覺得我同Rachel有嘢，或者係驚佢覺得Rachel對我有嘢....唉..返到香港都唔知同唔同佢飲好..我又唔想Nicole唔鍾意。算啦，再算，訓教。我抱住Nicole，合埋眼咩都唔諗了～