【校園，籃球，友情故】兩年前，我係個毒撚。今日，我打緊美國高中籃球聯賽。: ～第三章～ 轉折點

我崇拜完kawhi我就即刻攞起粒波衝左落去籃球場，我定左個目標比自己

 就係我一定要改射姿（我宜家完全係推波，唔係射波）

第二就係我一定要係練籃底（我宜家可以連籃底都炒）

 我就係咁打左4個鐘波，因為我知道我宜家唔努力我班際就一定出醜。

學業？我不嬲都唔理，I don't care～ 





係果陣我完全唔知我一翻屋企就要面對我人生最難嘅抉擇。

「我翻黎啦」
我翻到屋企就擺底籃球準備沖涼 

「明仔啊」
母親大人叫住左我

「沖完涼你出黎我同你商量啲野吖」 
當時我緊張左一下，我未見過我阿媽個樣咁嚴肅，唔通我又做錯啲咩？ 





我懷住忐忑嘅心情去沖涼，平時沖涼都一定會唱歌嘅我今日突然收左皮，因為我都覺得阿媽係有啲唔妥。 
我一沖完涼就去搵阿媽

「有咩要商量啊媽咪」 

「明仔，其實外國會唔會更加適合你啊」「我覺得香港嘅教育方法好似太古板，你果間係傳統名校，我驚你應付唔到，太大壓力」

 錯啦，讀左咁耐書我一啲壓力都冇，因為我根本唔讀嘅。

但係無啦啦話要去外國？我真係完全冇預計到阿媽會有呢個念頭。 

「下我唔掂架wor，我英文又唔係好」
我好真誠咁答 

「你自己考慮下啦，我覺得咁樣係最適合你」
阿媽非常尊重我決定

無可否認除左平時煩啲之外，我阿媽真系好好，係真系好好好好好好。 

我唸左成晚，去外國真係好？

我要重新適應過一個全新嘅生活架wor…

你話我會唔會掛住學校嘅朋友我會答你唔會，因為身邊一個真心對待我嘅friend都冇，每次都係大難臨頭各自飛

我掛住嘅係好愛我嘅屋企人同埋唯一會對我真心嘅教會朋友。 

當時我都係抱住一個唸下就算嘅心態，冇認真對待過呢個問題。 

呢個月我好努力，唔好傻啦，梗係唔係學業，係籃球每日lunch我都自己一個霸半個場練波，飯都唔食每日放學擺底書包就落去練波練到晚飯時間（冇錯我係唔打機嘅） 

我真系唔想再俾啊詹果班人睇我唔起，我要追上佢地，甚至超越佢地！ 

2019年6月1日

班際比賽就係今日。 

我已經唔係對籃球一竅不通嘅果個阿明，我係呢個月學左好多野，打街場我由場均0分打到場均有4～6分左右

籃板同封阻能力更加係大大提升，我覺得自己變強左。 

我覺得身體上我足以應對呢一場比賽，但係心理上我唔得，第一場就要對啊詹嘅死黨波仔，我都仲係覺得自己唔會有表現，我好緊張，平時上堂訓覺嘅我都訓唔著，係到唸自己一陣要點打。 

終於到左lunch，我換隊服嘅時候我個腦一片空白，我唔夠膽想像我一陣係場上嘅表現。 

我一直係到唸

「我會唔會一分都攞唔到架」
「一陣俾人ankle break左咪好樣衰？」
「我唔想連累我果班wor」 

但係我好清楚，就算我幾迷惘都好，我一上到場我就要全力防守，偷到嘅就偷，封到嘅就封。

我要好似Kawhi咁樣守好每一球！ 





「嗶～」
球證吹雞

 雙方球員已經落曬場 

我戰戰兢兢咁慢慢行去我嘅位置 

負責跳球嘅就梗係04最強Oscar啦 

只見球證將個籃球拋高，Oscar一躍而起將個波拍去我嘅方向 

粒波飛緊埋黎，我好驚張。 

點算。