我中出咗副校: 111. 歸於平淡

過完個聖誕假之後，我好自然噉同呀靜一齊咗。

幾吖歲人，就唔搞後生仔嗰籠嘢喇。舒服，咪一齊囉，又唔使煩錢，結婚嗰啲又唔使諗。

夜晚嘅銅記街頭，我哋兩個拖住手，行住充滿聖誕裝飾嘅街頭。

雖然聖誕氣氛就點都唔及97前㗎喇，不過街頭仍然充滿住唔少應節嘅後生仔女，當中亦都有我哋呢啲年齡層嘅。

過咗個初中考試，中六又mock 完，班學生又唔錯，暫時都已經冇咩嘢可以擔心，可以話係無重一身輕。



「喂，你想食乜呀？」嚟到拍拖嘅終極難題，去邊食飯。

「你知我唔會有意見㗎。你揀啦，我請。」最緊要都係我請嘅啫，多數啲女朋友都係噉㗎喇。

「前面嗰間茶記我記得幾好食㗎喎，而家又唔使排，就入去食啦。」結果，我而家個樣仲呆過樹熊。聖誕節嚟食茶記，佢使唔使咁爲我荷包着想呀，我又唔係冇錢。

「今日24號喎，你唔食豪啲？唔使同我慳喎！」我反問佢。

「是但啦，聖誕又有咩咁特別喎！睇吓身邊係邊個嘅啫。好食咪得，使乜去啲貴嘢啫。」聽到呢句，我不禁慶幸自己拖住嘅係佢。



我哋走入嗰間都有唔少人嘅茶記，嗌咗個乾炒牛河，同埋咖喱飯兩個人分。

有鑊氣，香味濃郁嘅牛河隨住熱氣上升，爲冬天帶嚟一點暖意，加埋惹味火辣嘅咖喱，簡直係享受。

「達」我哋兩個對筷子都同時落喺同一塊牛肉上面，兩人只好相視而笑。

「你食啦！」佢夾住舊牛肉，直接噉喂埋落口度。

喂完，佢就飲住杯凍檸茶，連我都飲緊熱奶茶，都唔知點解佢唔凍嘅。



「喂！你又話嚟M嘅？做咩仲飲凍嘢呀？虧就唔好學人扮壯啦，一係交換杯嘢飲嘞。」我摸住佢隻手，凍嘅。

「你就虧呀，我鍾意飲凍嘢呀，吹咩？ 而家幾吖歲人，都唔M痛啦，使乜驚。」佢講完仲要鬥氣噉飲多幾啖。

見到噉嘅情形，我都唔知可以點樣反應好。

我都唔知有幾耐未試過咁開心喇。

直至食完飯之後，一個掃興嘅Whatsapp傳嚟。