我中出咗副校: 45. 黑材料

尋日實在有太多事要理喇，又有咩黑材料，仲有Miss Chan 條仔，今日仲有個中同聚會，搞到人心都煩。

因爲攰得滯冇換衫嘅關係，成張牀宜家仲瀰漫住Miss Chan 身上嘅香水味。

可惜呀，有住嗰個癡線男朋友，睇怕我都係唔可以癡得佢咁埋喇。

可能我要好似毒撚黃sir 咁只可遠觀而不能褻玩喇。是但啦，喺副校嘅嚴密監測下我都唔可以做到啲咩。

但所謂嘅黑材料真係奇怪喇，有乜理由佢比咗我之後就冇任何指令㗎？



佢想嫁禍比我？定係測試我嘅忠誠？定係張SD Card 係有毒？

我都係用個太空number 加133打俾佢先。

「喂？」

「你張card 係想點處理。」

「你以爲有order 㗎？冇㗎，一切都係睇你造化㗎咋！做得好咪論功行賞，做得唔好咪......你知㗎喇。」



「咁啫係，我冇得拒絕唔做？咁大風險嘅嘢，我要諗諗先喎。」

「都交得比你，就冇得say no 㗎喇，你唔係咁簡單嘅嘢都唔知下話？」

「仲有，過多一排，學校就應該公佈升職嘅員工㗎喇。雖然你就應該有份嘅，但升幾多個層級就未定嘅，好似你咁嘅級數應該可以升到七萬㗎！」

「你哋點解信我，比咁大單嘢我做？」

「你唔好唔記得我哋手頭上有啲咩喎！仲有，有咩事上嚟咪你自己孭鑊囉，反正出面都仲未認定你係咩派系嘅。」



我都唔信佢會真係用條片同我攬炒嘅，咁樣嘅威脅會唔會廢啲呢？

「你以爲我地唔夠薑用條片嚟同你玩呀？唔緊要，嗰個只係最後嘅方案啫，唔好唔記得我地本身有咩職權。一個簽名，就可以決定你嘅前途。」

講到尾，都係一份合約定生死。

「如果你走咗，我驚你搵唔翻份咁筍嘅工咋！你知㗎喇，越老就越難搵工，呢個係永恆不變嘅定律嚟㗎嘛。仲有，你唔好唔記得升職之後嗰份約。」

佢用長約嚟噠我？

「算啦，總之你做唔到嘢嘅話，就等住冇得撈。」

如果將當日嘅片段公諸於世嘅話，我同副校都要承受災難級嘅後果，但如果我今次比人炒嘅話，災難嗰個只會係我自己。

「你嘅前途不嬲都係掌握緊喺你嘅手上嘅啫。加油喇。」佢收咗線。



死啦，唔做嘅話就比人炒，做衰咗嘅話又分分鐘比校長告誹謗，今次真係難搞喇。

保險起見，我都係出去網吧開咗個SD Card 先算。

我專登去遠啲，去到深水埗嗰間出名平嘅網吧，可能係星期六朝早嘅關係，所以仲有好多訓過夜嘅阿叔喺度。

「book 兩個鐘，要個角落位呀唔該。」

我約略check 過網吧電腦有無任何追蹤定係監測嘅程式之後，就插咗張SD Card 入去。

SD Card裏面係一條片，而耳筒亦都傳嚟男人嘅嗌聲。