我中出咗副校: 43. 好難埋身

「滋滋滋——」電話喺褲袋裏面震過震蛋。

我見到係私人號碼，但都無聊地想聽吓有咩人會夜麻麻打嚟。

如果係嗰啲sell 大灣區樓盤嘅話，我一定要玩到佢哋仆街死，咁先頂癮㗎嘛。

「你做咩同我女朋友一齊。」一把冷酷嘅聲音傳出耳筒。

癡撚線，唔係就係佢嗰個恐怖男朋友呀話？佢點解會有我電話㗎？



「你女朋友係Miss Chan? 我係佢同事，咁啱見到佢飲醉咗先送佢返屋企。」我嘗試冷靜咁回答。

「男女授受不親，你點可以單獨同佢一齊搭的士㗎！！！！！」佢咆哮着。

「你冷靜啲，我係因爲見到佢差啲比人執屍先同佢搭的士咋，去到佢屋企樓下，我已經叫看更送佢翻屋企。」我唔想俾佢斬做十碌八碌呀！！

「你等陣，睇吓你有冇講大話先。」話筒對面傳嚟一片沉寂。

「見到喇！佢真係比看更送咗返屋企呀！好嘢！」佢究竟個腦係咪有啲咩問題。



「喂！就算你冇講大話，咁都唔代表你可以單獨同佢坐的士㗎喎！點解唔打比我呀！」佢好似精神分裂咁忽然又激動起嚟。

「好對唔住，因爲你女朋友堅持唔比你個電話比我，所以我先冇通知你，喺電光火石間，選擇咗俾佢搭的士，去避嗰班執屍嘅西裝友。真係唔好意思喇。」對住啲癡線佬，我仍然保持理性，官腔咁講嘢。

「嗚嗚......平時有咩事，阿詩第一個就會搵我㗎喇！點解會咁㗎！嗚嗚嗚.......」呢條友真係顛顛地。

「唔緊要啦，最緊要係你女朋友安全啫，車錢唔使同我計喇，我宜家唔係好得閒聽電話，唔講喇，拜拜！」同癲佬講咁耐嘢真係命都短幾年。

「拜拜劉sir!」佢繼續用哭腔回答。死喇，點解佢會知埋我個名㗎？



唔係喎，佢知道我個電話咪啫係知道我係邊個囉！點解佢會有埋女朋友同事嘅電話㗎？我連Miss Chan 電話都冇喎！

唉，或者呢樣嘢只係更加確立咗Miss Chan 唔埋得身呢個事實。

佢嗰個有錢男朋友，簡直係恐怖到極。

情人節嘅時候，喺副校嘅嚴密監視下，只有Miss Chan 一個夠膽死收佢男朋友嗰九十九朵玫瑰花，加長到無倫嘅情書。

作爲一個老師，Miss Chan 都毫不忌諱地將佢哋啲情侶相放上社交媒體。去半島食tea, 巴黎旅行，定係show 佢啲名牌手鏈，呢啲都已經見慣不怪。

就咁睇落，佢只係一個又錫女朋友，又有錢嘅男朋友啫係咪？

只不過，佢每一日要同佢男朋友交代自己去咗邊度食飯，連放學都一定要搭學校嗰架短途巴士，之後就上佢㗎車，就好似啲小學生咁唔可以周圍走。

聽班八卦Miss 喺茶水間到講，佢男朋友仲會check 佢電話添。



又或者係我個人太隨和，冇管住條女嘅觀念，先搞到連戴綠帽都唔知啫。

認真講嘅話，單係佢識打電話比我，同埋可以見到佢女朋友係咪真係翻咗屋企呢兩樣嘢已經足夠令人覺得恐怖。

仲未計佢嘅心理狀態好似有啲問題喎，係咪先。

至於校長派，乜乜派呢啲，都係辦公室政治啫。