今日我開始左對公司啲同事進行復仇大計: 第一百節
所以話學識英文真係好緊要，當我完全無準備之下就飛左去美國搵Miki。點知原來加洲係咁大，我又唔識英文，人地話路在口邊，但我根本連開口問人都唔敢。喺無乜錢喺身之下，又唔知點去Miki屋企之下。我唯有打返香港嘗試搵莊神幫手，點知條死老嘢一直都唔肯聽電話。無計可施之下，我就唯有喺機場附近休息一晚，到第二朝再嘗試去搵下死老嘢。正當我打算喺機場附近搵間Motel住一晚之際，我一行離機場無幾遠，就有架貨van突然喺我隔離停低，車門打開之後一個黑人大漢將我強行拉上車，我大叫救命，不過諗諗下唔係喎，呢度係美國黎。我未轉得切channel講help之時，已經被人拎黑布蒙住個頭同封左我把口。我心入面即時大驚，乜原來平時睇電影話美國好危險係真架？我feel到個黑人大漢將我捉得好實，我即時心裡大驚，佢唔係要將我蒙頭入閘就地正法呀下？點知過左一段時間佢都只係捉實我而無做過其他嘢。我開始懷疑佢係受僱要捉我，而當然我最懷疑係Valarie下手架啦。話晒我都打爛左佢個打手判頭飯碗，而且我亦唔知佢背後仲有啲咩勢力，而家去到美國佢真係溶左我都得啦。我雖然係好驚死，不過我最唔忿氣係山長水遠黎到美國，未見到Miki就已經要客死異鄉。我都好驚訝我自己喺生死未卜嘅情況下，依然係諗住Miki，我明明就唔係啲咁深情嘅人。由於被人蒙住左個頭，我都唔知自己喺架車上度過左幾耐。不過果個黑人大漢真係好盡責，佢成程車都捉實我，而且作為一個綁架者黎講，佢都唔算太粗魯，佢強而有力嘅臂彎仲畀到啲安全感我。估唔到我只係畀人捉左一陣就已經有斯德哥爾摩症。
過左唔知幾耐，架車終於停低左。我被兩個人押解左去一個地方，由於仲被人蒙住頭，我剩係知道呢個地方係要搭lift上去。途中我嘗試留心聽下周圍嘅聲音去判斷自己被人帶左上幾多樓，可惜我根本咩都聽唔到。架lift終於停低，我其實已經驚到喊左出黎同賴左少少尿，不過我心諗橫豎都係要一死。我決定陣間只要佢地一揭開塊布同解開我個口之後，我一定要用最惡毒嘅說話黎咒對方。我諗住如果陣間見到係Valarie之後，我一定會咒佢年年離婚之後再結婚，仲要咒佢擺親酒都蝕，仲要一蝕蝕幾圍呀。當我被人押左去一個單位裡面，我聽到周圍都幾靜，而且我聞到一陣熟悉嘅味道。我feel到周圍都散發住一陣毒男先會發出嘅惡臭味，由於我之前長時間喺阿油屋企度同班IT人工作，所以我好認得呢浸味。我心諗唔係呀下，唔通到佢地當左係毒男，真係賣左我畀啲變態有錢佬做計數機。終於我塊黑布被揭開了，我發現我身處嘅地方應該係個類似office嘅地方，我周圍真係好多西人版阿油，不過佢地都埋頭於電腦度工作緊，根本無人望過我，我諗呢度如果唔係大學電腦室，就應該係一間it公司，不過觀乎周圍環境，我認為係後者嘅機會大啲。原本捉住我果個黑人大漢，見到我滿面淚痕而且仲要條褲濕晒，佢即刻大笑左出黎，而且佢仲話我係PUSSY。啲黑人鬧人真係得意，都唔明點解佢無端端會話我係波斯貓，我原本想用一個N字頭嘅英文去鬧返佢，不過我怕第日佢會告返我係種族歧視。你知啦，美國人咩都可以拎黎打官司架嘛，雖然我係被人綁架果個，但第日佢調轉頭告我攞返一百幾十萬咪死。佢笑完之後，指一指一間房，示意叫我行入去。佢竟然已經鬆開左手，我就緊係唔會咁笨真係聽佢講行入去啦。我轉身就去住門口方向跑走左，點知我咪走到出去之時。我聽到一把既熟悉又陌生嘅聲音喺呢個時候響起：「你唔係專登坐飛機黎搵我架咩低能仔，做咩未見到我就走左去呀？我知啦，你係想去搵返條褲先黎見我？不過換褲都無完架啦，頭先成個過程我都拍低晒架啦。」
原本我以為我同Miki久別重逢一刻，我地之間會係浪漫擁吻，點知我竟然會係賴住尿咁見佢。喺入左佢間office後，佢笑左好耐都未肯收聲，而我只係無奈地企喺度，因為我條褲仲濕緊佢唔畀我坐低。我雖然好想鬧佢一餐，不過見到佢嘅笑容，我又唔捨得鬧佢。到佢終於笑完之後，我問佢：「點解你要咁做先？你唔可以好似普通人咁去接機架咩？係要搵個黑人黎，我問你呀，你同果個黑人係咩關係先？你知啦，太闊太鬆我唔要架。」佢扁一扁咀問：「你講咩太闊太鬆呀，仲有邊個要你要先？我同你只係舊同事關係架咋喎。」「我意思係我驚你黎到美國之後，你嘅道德尺度變到太闊太鬆姐。喂仲有我都山長水遠黎搵你啦，我黎得緊係要同你表白架啦，如果唔係你估我真係好得閒坐咁耐飛機黎搵你咩，雖然我而家都真係好得閒。」Miki露出久違了嘅狡黠笑容：「莊生突然同我講話你想黎見工，我先見你架咋。至於接機方法係果位叫阿秀嘅妹妹要求嘅，佢同我講話你之前累到佢咁慘，佢要我將你頭先賴尿嘅片段放上網，佢條氣先順返先肯原諒你。不過都啱嘅，聽聞你之前累到人畀人笑係公廁，而且都係時候到你成為網上名人架啦，失禁仔呢個外號都應該幾襯你。」聽到阿秀肯原諒我，我心口抒左一口氣，相比之下真係畀人笑下都抵。我問Miki：「真係唔好講其他嘢住，你老老實實答我，妳做咩之前唔覆我email先？」佢沒好氣地回答：「先生呀，你都見到我開左間公司架啦，咁我真係忙我呀嘛。你而家都見到我啦？你有咩要同我講咁緊要呀？係咪覺得自己畀阿油踢出左間公司好委屈要哭訴呀？不過同我哭訴都無用架喎，因為係我同莊神教阿油咁做架喎。」去到呢一刻都無乜嘢會令我覺得驚訝，而且我都相信莊神同Miki唔會害我。我唔理自己條褲仲濕緊，坐低左同Miki講：「其實我又唔覺得太委屈嘅，不過聽你咁講完我只係覺得件事更加合理姐，因為阿油唔似會咁有主見敢踢走我。有你同莊神教路就合理好多。我唔理呀，你搞到我變左雙失仔，黎緊仲要畀人笑失禁，你要負責任黎養我呀。」
Miki呢個時候終於露出甜笑，好溫柔地講左句：「你無用架你，剩係識得耍無賴，你唔問下呢間係咩公司？」「問黎做咩？我過黎係嘆世界等你養我，你出去搵錢咪得，我疊埋心水食軟飯架啦。」Miki行過黎打左我一下之後，就開始解釋：「莊神當日喺你未開始寫app之前，已經同我講覺得呢個先係小器簿嘅唯一出路。所以佢安排左我返美國度幫佢管理呢間佢之前開落嘅IT公司，為嘅就係幫你鋪路。不過估唔到你條傻佬自己喺香港又有個咁嘅idea，自己去搞個咩開心骨場出黎。我見你咁有興致咪費事阻你囉。」我聽到之後即刻拍枱話：「喂你當我真係咁努力上進咩，我都不知幾樂意坐享其成。一早知你同莊神已經幫我搞緊，我就唔會洗努力啦。」Miki拍一拍我個頭話：「咁你如果唔係經過之前咁多事，你都唔知做生意係幾咁苦架嘛。你以後安心幫我打工就得架啦，相比於做生意，你都係適合喺office做下文員。你睇下出面咁多個西人版阿油，以後大把人畀你玩啦。」「我唔制，我唔要做文員仔，我要做Steve Jobs。」「咁你乖乖地學好啲英文先再講啦。」其實Miki真係好了解我，我根本就唔係咩做大事嘅材料。佢當日幫我辭工果陣應承過話會幫我手去搞好小器簿。估唔到佢一直都無違諾，佢真係有幫我搞好呢件事，仲要幫我將小器簿推廣到國際，我真係好幸福。
喺美國過左一排之後，我都慢慢集慣左呢度嘅生活，雖然都係唔係好識英文，但為左可以整蠱公司入面果班成日對我白眼嘅西人阿油，我好努力地去學好英文。其中一個叫Martin嘅毒男，成日都笑我唔識英文。之後我用photoshop print整一大疊電影捉彊屍用嘅道具符出黎，貼到佢成架車同公司成張枱都係，再喺佢隔離求其細細聲唸唸有詞咁講中文，等佢以為我真係識咩中國道法可以咒佢之後，佢就唔敢再笑我。喺呢個地方我重拾返我人生嘅最大興趣，就係喺office度做搞屎棍向同事報仇。而我同Miki，就好自然地一齊左。我曾經問過Miki，佢究竟放低左Evans未，但佢次次都無正面答我。直到喺幾個月後我同佢返香港搞埋啲簽證手續之後，我地喺街偶爾撞到Evans同一個女仔一齊之後，Miki都全無異樣，我先肯定佢應該係放低左Evans。
至於其他人嘅下落，據我所知，Valarie自從畀傳媒踢爆左係打手之後，就好似無得再經營佢呢門生意。至於阿油同Taylor嘅開心骨場據聞都搞得算唔錯，而且佢地好似仲搵左文員輝去代替我個位。而Jasmine喺知道左我同Miki一齊之後，佢都疊埋心水搵左個新男朋友，我聽到都相當替佢開心。Daisy喺知道左Valarie係打手之後，佢曾經有whatsapp我向我道歉，不過當我嘗試想同佢冰釋前嫌時，佢亦都再無回我，相信我同佢都真係緣盡，大家都無乜機會會再見。Judy，果件唔知叫咩名嘅女人，Sam姐同阿Kate嘅下落我就真係唔知，佢地有啲好似仲喺公司度打工，有啲就已經不知所蹤。阿秀喺我代替佢成為網上名人之後就原諒左我，而遊手好閒嘅莊神亦都成日同佢老婆仲有Robin去美國度打搞我同Miki，佢仲成日捉我去觀察啲西人嘅行為同打算喺美國度收徒。我曾經問過莊神，佢究竟係覺得我同佢性格上有啲相似先對我咁好，定係因為真係覺得我係人才。當然佢都係唔會正經答我，而又叫我自己觀察下。而另一個纏擾左我好耐嘅問題，就係究竟莊神同我個妹係咪真係有路，我到而家都一樣係唔知答案。不過我而家長時間唔喺香港，我知道莊神會代我睇住我個妹，呢樣嘢都令我比較放心。因為有莊神同Miki，我先可以實現我嘅理想之餘，仲可以繼續安心做最適合嘅事，當office入面嘅搞屎棍，我真係好幸運。雖然我唔知我嘅幸運可以維持幾耐，不過喺呢一刻，我好肯定我一定係全世界最幸福嘅男人。
（全書完）