今日我開始左對公司啲同事進行復仇大計: 第八十九節
「你痴線架咩，整度game叫開心骨場，邊有人夠膽玩呀。」Taylor一聽到個名之後，就即時認為唔可行。阿油即時反駁佢話：「咁都有分正骨都邪骨姐，係因為你個人淫邪先諗埋啲衰嘢，我打算整隻game係畀人經營正經骨場架。」Taylor望住我，我即時解釋到：「我都有講過啦，整得手提電話game，就係貪佢易普及呀嘛，咩階層嘅人都可以玩呀嘛。你就咁聽落個名好似好咸濕咁，但你諗下，其實香港好多人會上大陸按摩架，連以前公司阿Judy佢地一班OL都會上去架，呢啲嘢佢地熟悉，好有親切感呀。」阿油即時以說教語氣同Taylor講：「仲有呀，我整得呢隻game就預左唔只喺香港搞，你諗下喎，中國各省各地都有咁多骨場，就證明佢地鍾意啦。有啲做唔成老細，要做技師呀locker仔果啲，佢地就自然會想一嘗就老細啦。都係果句啦，中國有咁多農民，但整隻農場game都可以咁受歡迎。我整隻骨場game一定無死架啦。」Taylor聽完之後恍然大悟，又好似覺得我地有啲道理，佢諗左一陣之後問：「我自己本身就唔係好熟遊戲，假設你地個題材真係work，但我想問隻game會靠啲咩賺錢？剩係靠幾蚊賣左game，加上又會畀人破解，我唔認為可以發達。」我見佢開始落搭，即時好熱情地上前搭住佢膊頭講：「單賣隻game就一定發唔到達架啦，所以我地隻game直頭會係免費畀人download黎玩。至於收入方面，我地會喺game入面收錢架啦，即係會出啲特別技師要佢地出錢買，又或者係想升級個按摩池都要收你幾十蚊咁。啲人玩開就會肯畀錢架啦，到時我地想唔發達都幾難啦。所以話而家你投資啲做左大股東，到左隻game真係成功營運到，隨時真係上市都得呀。」Taylor依然都係半信半疑咁問：「但你話整隻game係經營骨場，會唔會偏門左啲呀。」阿油再次拍枱大駡：「你食軟飯維生唔係偏門呀，你點解唔正正經經打份工？枉我仲以為你有啲悟性，就係要題材偏門先有市場呀嘛。學我偶像Steve Jobs話齋，呢個叫做think different呀，你明唔明呀。」
我意想不到阿油竟然會講出一番咁有說服力嘅說話，Steve Jobs都搬埋出黎，真係唔夠佢玩。Taylor萬料不到阿油一個區區毒男可以令佢全無反駁之力，佢不甘畀阿油話悟性低，即時話：「我悟性低？你地都剩係諗到可以靠喺game入面賣嘢賺錢，但我已經諗到另一個生財方法。我同你地講，我都識唔少喺香港同中國經營按摩場所嘅老細架。只要佢地肯喺我地隻game度賣下廣告，又或者搞下啲crossover，到時又係另一條財路啦。我雖然只係一個食軟飯維生嘅浪子，但我每次都識得將時間投資喺有最大回報嘅女人身上，就證明我Taylor都係有投資眼光。我之所以問咁多個問題唔係話要質疑James，我係要先證明你地都清楚自己做緊咩，我先會投資。」我唔介意畀Taylor有得下台，跌左落地都拿返渣沙，我只係在意佢會唔會落搭畀錢。因此我即時附和Taylor話：「我就係知道Taylor你都係一個精明嘅男人，睇你之前將美美婆婆同Valarie玩弄於股掌之中，就知道你係高手啦。你當我真係立亂畀人夾錢落黎咩，我係覺得你同我都係精明嘅男人，先搵你架咋。」Taylor點頭微笑，睇黎我嘅馬屁拍得相當準確，阿油都明白錢對我地係幾重要，因此佢就算再唔鍾意Taylor都好，為左將來，佢都選擇左附和我，牽強地點頭扮認同。我見Taylor個款都估佢應該會落搭，我即時斟左杯酒畀佢，之後同佢講話：「我同你並肩作戰左咁多次，都好明白對方為人架啦，而家我地三個飲左呢杯酒之後，就係同路人，大家有錢出錢，有力出力。唔洗好耐，就會有好多報紙雜誌爭住訪問我地嘅創業成功經過架啦。」
第二朝我一起身，回想起尋晚可以成功說服度Taylor，都份外有滿足感。我喺度諗搵到投資者同寫程式嘅人之後，我仲需要啲咩人幫我手呢？呢個時候我阿妹衝左入我間房問我：「喂阿哥，乜你原來辭左職無做咩？你係發左達定係痴左線呀，如果係後者你自己去青山住一排啦，我自己都養唔掂，我幫唔到你架。」「如果我係發左達呢？你唔怕你頭先講完啲咁大逆不道嘅說話，我發左達都唔分畀你架咩？」「睇你個樣都知你唔會發達啦，如果你真係發左達慌你仲會賴死喺屋企咩。不過講真呀，你做咩要辭職姐，有John佢睇住你，你前途都一片光明呀。你唔好話我知你同John佢反左面呀，我都仲未同佢玩夠，我唔理呀，你去求佢跪佢都要佢原諒你呀。」「如果我話你知，我辭職係因為打算創業，你會唔會支持我呢？」「阿哥，我地一世人兩兄妹，只要你每個月準時畀家用同交晒啲水電煤，我話知你係想辭左份工去做太空人呀，我都會支持你。只要唔洗我養埋你就得架啦，不過好心你咁大個人就唔好忽然間扮晒有理想啦。」我唔想再對牛彈琴，喺銀包拎左五百蚊畀佢，之後同佢講：「你放心啦，我今次實掂架，你唔洗擔心我呀。你第時嫁唔出都唔怕架，到時我會倒貼埋大床出黎，咁應該都會有人要你架。你放心啦，他朝你阿哥我名成利就，唔會少左你果份架。」佢拎左我五百蚊之後就轉身離開，不過臨走之際佢都不忘講句：「咁大個人都咁鍾意發白日夢，實際啲啦阿哥，你唔細架啦。以你嘅資質，我真係驚你無左之前份工之後搵唔到第二份呀。」雖然連我阿妹都睇死我，不過我依然信心爆棚，因為我深信終有一日，我可以靠寫game發到達，之後就可以向全世界推廣我嘅小器簿。