今日我開始左對公司啲同事進行復仇大計: 第八十節

今日一返到公司，見到枱頭貼左張memo，張memo上面寫明Miki 因為涉嫌利用他人身份，喺公司帳目上出術，所以已經即時被解僱，而且公司仲會保留向佢追究刑事責任。雖然我尋日已經有預感，件事會演變到呢個地步，不過親眼證實呢件事，我都覺得相當震撼。呢個時候，雙眼通紅嘅阿油走埋黎同我講：「其實明明係Judy個臭西出術架嘛，我唔明Miki點解要咁傻幫佢頂罪。我原本都以為自己好憎佢，見到佢而家折墮會好開心……不過唔知點解，見到佢有難，我覺得好心痛。」「咁既然你覺得心痛，你又知道真相，咁點解你又唔出聲幫佢？」阿油突然一臉認真咁同我講：「我知道你一向都睇我唔起，當我傻條咁玩，不過我其實唔係真係咁無腦架。我同你一樣，都係知道佢咁做一定有佢嘅原因，所以先選擇默默睇住佢受苦都唔出聲，我相信如果可以你都會出聲，你無自己想像中咁衰格。」我冷笑一聲話：「咁你又誤會左我啦，我又唔係你條死毒男，對佢痴心一片，佢變成點都唔關我事。我個人好自私架，對我無好處嘅嘢我係絕對唔會做。所以Miki而家搞到咁都係佢自己攞黎，得罪講句，關我撚事咩。你話係唔係啦……」阿油無言地行開左，第二個走埋黎嘅人，係Judy，佢走黎向我耳語問：「我唔知你做左啲咩，令Miki會幫我頂左罪，不過既然你一直遵守諾言無爆我出黎，我諗我要向你講聲多謝。至於Miki，我應承你佢之後有咩事我會盡力幫佢，不過你地真係我大恩人黎。」我依舊冷冷地道：「你係咪老到慒左呀阿嬸，我咁憎你，我點會幫你呀。不過就算我真係幫左你，我都唔會悕罕你啲所謂謝意囉。你呢啲賤人，眼白白睇住一個唔識嘅人幫你頂罪，你都仲可以咁厚面皮走黎講咩多謝呀感激呀，你係有人性就應該去講清楚啦。至於Miki點解要幫你，我唔知，亦都唔關我事。你無需要多謝我，我亦都對你完全無興趣，你死開啦。我怕同你講多兩句嘢都唔知會惹埋啲咩病返黎呀公廁姐。」

 

我真係唔明，點解張memo一出，個個都要走埋黎同我講嘢，第三個走埋黎同我講嘢嘅人，係Valarie，佢好緊張咁話：「你地都搞到Miki出苦肉計啦，你地已經贏晒啦，我咩都輸晒啦，我唔玩啦，你地可唔可以交返我阿婆出黎呀？」我呢一刻心情已經差到無得再差，明明我最大嘅敵人喺呢一刻竟然走黎投降，我諗畀著平時我一定會好開心，乘機對對方百般侮辱。不過呢一刻，我發覺我腦海只係記掛住Miki嘅安危，我望左Valarie一眼，之後同佢講話：「我唔知你講咩苦肉計，你同我講我唔玩啦做乜？我又唔係賣錶嘅，你要搵阿婆去老人院搵啦好唔好？我而家已經好煩，唔想再見到你呢啲咁厭惡嘅生物呀。」佢忽有有所悟地話：「去老人院搵？即係你地收埋左佢喺老人院？我明啦，既然你而家都話得畀我知佢喺老人院，不如你話埋畀我知佢喺邊頭啦，我而家無得升職，我地之間無衝突架啦，你不如話埋畀我知佢喺邊區嘅老人院，我地大家當係和解啦好唔好？」我估唔到我亂講一句，Valarie竟然都會覺得係我畀緊提示佢，佢真係當我好似啲漫畫入面啲奸角咁，會專登畀啲提示等個主角可以救人咩，佢都痴痴地線，不過我見到佢咁著急，我雖然呢一刻心情係好差，不過都忍唔住答左佢一句：「你阿婆咁老，應該就快歸西啦。」而佢又好似以為我意有所指，一路喃喃自語話：「西邊？唔同係港島西，定係荃灣西…」一邊行開左，不過估唔到連Valarie都睇得出Miki係做苦肉計畀Evans上位，我呢一刻不禁懷疑，Evans係舉報Miki嘅一刻，會唔會都知道Miki其實係因為想畀佢上位而自己受苦？我一諗到呢度，就覺得有啲心寒，我決定親自問Evans，佢究竟同Miki之間發生過啲咩。Evans過左無耐都終於返到公司，當佢見到我果陣，我覺得佢嘅眼神有啲閃縮，好似做錯事咁，我忍唔住一手將佢拉左去公司下面條後巷，問過明白。

 

「係，我的確喺呢件事上有暪過你，不過係暪你係因為知道你一定會阻止我，而且我亦的而且確係有事對你唔住。不過我覺得今次我無做錯，Miki係我朋友，不過佢做錯事，我為左公司利益，我唔可以縱容佢。」我心入面暗抒一口氣，我好驚Evans會同我講，佢明知道Miki係無辜，但佢為左升職都由得佢死。不過我又唔明白，佢點解會覺得有嘢對我唔住，我無出聲，等佢繼續講：「當日係我無意中發現到你本小器薄喺我枱面，我先會喺入面發現到Miki嘅罪行。我無驚你同意睇你啲嘢係我錯，不過我唔同你，我知道左呢啲嘢之後，我唔會包庇佢。」唔洗講，果本所謂小器薄係Miki偽造出黎放喺Evans枱面，唉，Miki竟然連小器薄都用埋，我真係有啲佩服佢做傻事嘅決心，Evans繼續講：「我其實都有考慮過，掙扎過，所以果日你見到我同Daisy返返工行左出公司，因為我果陣係私下問佢嘅意見。Daisy同我講話我應該堅守自己嘅價值觀，如果覺得Miki係有錯，我就唔可以姑息佢，就算佢係我朋友都唔可以。」我呢一刻先真正感到震驚，我估唔到Daisy竟然會叫Evans做阿Miki，以我認識嘅Daisy，佢唔應該會鼓勵Evans做阿Miki掛，點解佢會咁講？我到左呢一刻，先真正覺得有啲頭暈眼花，我真係接受唔到Daisy竟然會叫Evans報Miki串，雖然我係叫過佢鼓勵Evans要博上位，但如果上位代價係要Miki受難的話，Daisy點可以鼓勵Evans去做架。我覺得我嘅世界，我嘅認知，好似慢慢喺度崩潰咁。Evans誤以為我係嬲佢偷睇左我本小器薄，同暪住我舉報Miki而嬲到面都青埋，佢好擔心咁上前同我講話：「James對唔住呀，你唔好咁嬲啦。」我強顏歡笑地答佢：「傻豬黎，我寫到落小器薄，即係我都預左有一日會報Miki串啦，不過而家畀左你用咋嘛，但你個傻仔都叫用得其所，我開心都黎唔切啦。」講完之後我就打發佢走，不過佢臨走之前都堅持地同我講話：「我做呢件事，完全係為公司利益，我真係無諗過上唔上位。」我雖然信佢，不過都不禁感到好難過，而且我亦唔知我可以點面對Daisy。