今日我開始左對公司啲同事進行復仇大計: 第七十八節

由於Kate姐就走，再加上基於近排公司氣氛變得有啲尷尬，Evans喺今日晏晝約晒全公司嘅人一齊請Kate姐飲茶。我聽到呢個提議忍唔住問Evans：「喂上次咪搞左個party囉，而家又要請佢飲茶，佢都係唔做姐，佢唔係身患絕症不久於世呀嘛，要唔要由頭七食到尾七咁呀大哥。」佢一臉無辜咁望住我，的確以佢黎講佢剩係搞到呢類小學生活動。我無左追問落去，不過以而家嘅氣氛，格硬要坐埋一齊飲茶未仲尷尬。好不容易捱到去食晏時間，由於Evans哥竟然唔識醒水地book定位，所以我自動請纓早啲走左去攞位，而Daisy亦都跟埋我一齊去。喺去酒樓嘅途中，Daisy主動拖住我隻手，而我亦都好自然地畀佢拖住，但我地中途都無講過一句嘢。其實我地已經十一點半去到酒樓度等位，呢啲時間一般打工仔應該都仲未放lunch，而飲早茶嘅人應該都食完走左人。但唔知點解當我地一去到，依然係有好多阿公阿婆阿伯阿嬸坐左喺度吹水睇報紙，唔肯走人。我細心留意過，班阿公阿婆應該係好有組織地拎晒香港咁多份免費報紙，之後圍埋交換睇。酒樓經理對我地愛理不理，因為我講到明唔會食佢地啲午市套餐，所以佢同我講如果要攞大枱就靠自己啦。由於我當時正苦於唔知對住Daisy講咩好，我唯有叫Daisy喺出面等我一陣，我攞到張大枱就會叫佢入黎，借詞同佢分開下。我走到去一張有幾個阿伯阿婆坐左去撘枱嘅大枱處坐低，我一黎到就對住佢地講：「公公婆婆你地好呀，我係平安鐘推廣大使呀。你地聽下我講先，我賣嘅平安鐘同你地平時見開果啲好唔同，呢個平安鐘本身真係一個鐘黎，但因為我地為左幾個魔法師幫個鐘開光，所以可以保你地平安。平安鐘有埋wi-fi同藍牙功能，而且仲支援高清，方便你地睇鐘呀。而家平安鐘仲要有埋鬧鐘功能，雖然你地都無乜嘢搞唔使准時起身，不過都叫勝在有多過功能呀嘛，而且個鐘而家特惠期內，只係需要一千八百八十八蚊……」就算班老人家好得閒，不過對於呢啲銷售技倆佢地都顯得好反感，好快佢地就自動鳥獸散。

 

一如我所料，餐茶大家都飲得好尷尬。全枱人都無乜講野，只係密密地食嘢，坐喺我身邊嘅阿油不斷拎部iPad唔知搞啲咩，但間唔中佢啲手指又好似抽筋咁，仲唸唸有詞，好似鬼上身定發羊吊咁。我細細聲問佢：「喂阿油哥，我要唔要夾你中指呀？你喺度搞咩呀？」阿油話：「你唔好打斷我思路好唔好，我而家用緊珠心算計數呀。尋日莊生佢睇中左我喺電腦方面嘅才能，叫我幫佢寫個程式呀。」阿油大慨以為同我講左莊神搵佢做嘢之後，我會好好奇同對佢另眼相看，點知我只係冷冷地話：「咁你都唔好飲茶果陣搞呀，我同你同枱，我好介意畀人以為我係你啲同類黎架大哥。」阿油不屑地話：「我而家有咩所謂姐，我以前就話要為左條仆街女人隱藏本性姐，我而家怕咩呀。」講完佢望住Miki，之後好大聲咁話：「係呀我係話緊你呀仆街女人，一直當我係狗咁，我而家有人賞識呀，他朝我飛黃騰達果陣，我一定騎晒喺你地班人渣上面呀。」阿油呢啲死毒男真係好有趣，食轉豬肚後啲屎比常人臭好多倍。Miki雖然係一臉無奈，但佢無出聲反駁阿油。文員輝就好開心咁話：「阿油哥，你第日富貴左出人頭地果陣記得睇住細佬呀，你都知我平時尋開心果陣洗費好大架啦，你記住到時要睇住我呀。」阿油唔知係咪見無人反駁佢，再加上覺得自己有莊神照住，佢好大聲咁話：「到我第日發左達，你唔洗再玩北姑啦，玩埋呢枱啲死港女都仲得呀。」Evans忍唔住話：「你好啦下，唔該你尊重下啲女同事。」阿油即刻好大反應咁反擊：「食蕉啦粉腸，如果你唔係含住金鎖匙出世，你而家有鬼資格同我大大聲講嘢咩，收聲啦廢柴二世祖。」見到呢刻嘅阿油，我喺心入面再次暗地裡提醒自己，真係唔好得罪毒男呀。

 

Valarie見到Evans畀人窮追猛打，佢雖然好想加把口，不過佢都明白佢只要一開聲，阿油一定會連佢都攻擊埋，所以佢只係選擇笑。不過我為左幫手轉移視線，我拎左個大包畀Valarie，之後問佢話：「Valarie姐，聽聞幾十年前啲酒樓好興賣大包，你後生果陣係咪成日有得食架？不過你而家就唔同啦，唔食中國嘢走去食洋腸，雖然話你食開果條都係cheap嘢黎。」Valarie無視我拎畀佢嘅大包同我嘅說話，選擇唔理我，阿畸喺隔離話：「畀人漠視慘過畀人歧視，Val姐你呢次係高招喎，唔出聲等阿James哥都無從入手。」我只係志在轉移視線，其實我攻擊邊個都無所謂，我即刻講句：「喂阿唔知乜水，畀人漠視嘅感覺，你應該就最清楚啦，呢番說話由你把口講真係好Q有說服力架姐。」呢個時候，本身係主角嘅Kate姐終於忍唔住話：「夠啦你地，可唔可以出少陣聲呀，我黎緊都無乜機會再見你地架啦，你地自己好自為之啦。」講完之後，佢就拎左個手袋轉身走左。係喎，真係佢唔出聲我都唔記得，今日嘅主角原來係佢喎。」